Пачъыхьэхэр: Апэрэ тхылъыр 1 - Тхьэм и ГущыӀ

Апэрэ шъхьэр Даут ижъыгъом

¹ Пачъыхьэу Даут ыныбжьыкӀэ жъыгъом фигъэзэгъагъ. Щыгъынхэр бэу зэтыралъхьэзэ афапэщтыгъэми, ащ зыфэгъэфэбэшъущтыгъэп.

² Арыти, иӀумэтхэм раӀуагъ: «Пачъыхьэм къыдекӀокӀынэу, ащ ынаӀэ тыригъэтынэу, ыгупэ кӀэлъэу зыгъэфэбэн пшъэшъэ ныбжьыкӀэ тизиусхьан пачъыхьэ къыфарэгъот. Джащыгъум тизиусхьан пачъыхьэ фэбэжьыщт».

³ Джащ пае Израилым ичӀыпӀэ пстэуми пшъэшъэ дахэ ащылъыхъугъэх. Шунэм къалэ щыщ Абищагъ къагъоти, пачъыхьэм къыфащагъ.

⁴ Пшъашъэр дэхэ дэдагъ, ар пачъыхьэм къыдекӀокӀыщтыгъэ, зыфаехэр фишӀэщтыгъэх, ау пачъыхьэр ащ екӀолӀагъэп.

Адоный пачъыхьагъур ыубытмэ зэрэшӀоигъор

⁵ А уахътэм Хъаджэт ишъэо Адоный зыкъышӀошӀыжьэу ыӀощтыгъэ: «Сэ пачъыхьэ сыхъущт». Ку псынкӀэхэр, шыухэр, ишъхьагъырытхэу, ыпэ итэу кӀонхэу псынкӀэрыкӀо нэбгырэ шъэныкъо зэригъэгъотыгъ.

⁶ «Сыда ар зытепшӀыхьэрэр?» – ыӀоу ятэ ар ригъэзыхэщтыгъэп. Ар кӀэлэ дэхэ дэдагъ, Абищэлэм ыуж къэхъугъагъ.

⁷ Ащ Цэруе ыкъо Иоабрэ къурмэнышӀэу Ебыетаррэ джэнджэшэгъу къызфишӀыгъэхэти, ахэр Адоный готыгъэх.

⁸ Ау къурмэнышӀэу Цадокъи, ЕхъоедаӀ ыкъо Бэнайи, тхьэлӀыкӀоу Натани, ЩымӀыйи, РэӀыйи, пачъыхьэм илӀыхъужъ хэшыпыкӀыгъэхэри Адоный готыгъэхэп.

⁹ Адоный мэл-пчэнхэри, былым пӀашъэхэри, шкӀэхъужъ гъэшхагъэхэри Блэ мыжъокӀэ заджэхэу Рэугъэл псынэкӀэчъым дэжь пэблагъэу щытым къурмэн щишӀхи, пачъыхьэм ыкъохэри, Ехъудэм щыщ пачъыхьэ къулыкъушӀэхэри зэкӀэ зэрэзэгъусэхэу къыригъэблэгъагъэх.

¹⁰ Ау тхьэлӀыкӀоу Натани, Бэнаий, лӀыхъужъ хэшыпыкӀыгъэхэри, ежь ыш Сэлмэни къыригъэблэгъагъэхэп.

Сэлмэн пачъыхьагъум зэрэтехьагъэр

¹¹ ЕтӀанэ Натан Сэлмэн янэ БатщэбаӀ риӀуагъ: «Хъаджэт ыкъо Адоный пачъыхьэ зэрэхъугъэр зэхэпхыгъэба, тизиусхьанэу Даут ащ щымыгъуазэуи?

¹² Джы къыосӀощтыр ары: ори уишъэо Сэлмэни шъушъхьэхэр хэшъухыжьых.

¹³ Моу джыдэдэм кӀуи, пачъыхьэу Даут дэжь ихьи еӀу: „Сизиусхьанэу пачъыхьэр, ‘Уишъэо Сэлмэн саужкӀэ пачъыхьэ хъущт, ситахътэ ар тетӀысхьащт’ пӀуи, уиӀумэт тхьэлъанэ фэпшӀыгъагъэба? Сыда адэ Адоный пачъыхьагъур зыкӀиубытыгъэр?“

¹⁴ О пачъыхьэм джыри удэгущыӀэ пэтзэ уауж ситэу сыкъихьанышъ, епӀорэр къэсыушыхьатыжьыщт».

¹⁵ Арыти, БатщэбаӀ пачъыхьэр зыщычъыерэ унэм кӀуагъэ. Пачъыхьэр жъы дэдэ хъугъагъэти, Шунэм щыщ Абищагъ ащ къыдекӀокӀыщтыгъэ.

¹⁶ БатщэбаӀ пачъыхьэм шъхьащэ ин фишӀыгъ. Пачъыхьэр къеупчӀыгъ: «Сыд узфаер?»

¹⁷ Ащ риӀуагъ: «Сизиусхьан пачъыхьэр! „Уишъэо Сэлмэн саужкӀэ пачъыхьагъум тетыщт, ситахътэ ар тетӀысхьащт“ пӀуи, уи Зиусхьанэу Тхьэм ыцӀэкӀэ уиӀумэт тхьэлъанэ фэпшӀыгъагъ.

¹⁸ Джы мары Адоный пачъыхьагъур ыубытыгъ, ау, сизиусхьан пачъыхьэр, хъурэм о ущыгъуазэп.

¹⁹ Ащ цухэри, шкӀэхъужъ гъэшхагъэхэри, мэл-пчэнхэри боу къурмэн ышӀыгъэх, пачъыхьэм адрэ ыкъохэри, къурмэнышӀэу Ебыетари, дзэм иӀэшъхьэтет Иоаби ригъэблэгъагъэх. Ау уиӀумэт Сэлмэн ригъэблэгъагъэп.

²⁰ Ау о, сизиусхьан пачъыхьэр, зэрэ Израилэу къыоплъы, сизиусхьан пачъыхьэ ыуж тахътэм тетӀысхьащтым ыцӀэ епӀонэу къыожэ.

²¹ Армырмэ сизиусхьан пачъыхьэ ятэ пӀашъэхэр зыдэщыӀэм зигъэзэжькӀэ, сэри сишъэо Сэлмэни тагъэмысэщт».

²² Ар пачъыхьэм дэгущыӀэзэ, тхьэлӀыкӀоу Натан къихьагъ.

²³ Арыти, пачъыхьэм раӀуагъ: «Мары тхьэлӀыкӀоу Натан». Ар пачъыхьэм дэжь ихьи, ынэӀу джэхашъом нигъэсэу пачъыхьэм шъхьащэ фишӀыгъ.

²⁴ Натан къыӀуагъ: «Сизиусхьан пачъыхь! „Адоный саужкӀэ пачъыхьагъум тетыщт, ситахътэ ар тетӀысхьащт“ о пӀуагъа?

²⁵ Сыда пӀомэ ар непэ кӀуи цухэри, шкӀэхъужъ гъэшхагъэхэри, мэл-пчэнхэри боу къурмэн ышӀыгъэх, пачъыхьэм ыкъохэри зэкӀэ, дзэпащэхэри, къурмэнышӀэу Ебыетари къыригъэблэгъагъэхэу, ахэр ащ ыдэжь щешхэх, щешъох, „Пачъыхьэу Адоный гъэшӀэ кӀыхьэ орэхъу!“ аӀо.

²⁶ Ау сыуиӀумэт сэри, къурмэнышӀэу Цадокъи, ЕхъоедаӀ ыкъо Бэнайи, уиӀумэт Сэлмэни тыригъэблэгъагъэп.

²⁷ Сизиусхьан пачъыхьэм зэрэшӀоигъоу а зэпстэури мыхъугъэнэуи? Сизиусхьан пачъыхьэм ыуж тахътэм тетӀысхьащтым икъэбар тэ, уиӀумэтхэм, зыкӀытэмыгъэшӀагъэр сыда?»

²⁸ Ащ дэжьым пачъыхьэу Даут джэуап къыритыжьыгъ: «Моу БатщэбаӀ шъукъысфедж». Арыти, адрэр къихьи пачъыхьэм ыпашъхьэ къиуцуагъ.

²⁹ Пачъыхьэм тхьэлъанэ ышӀызэ къыӀуагъ: «Къиныгъо пстэуми спсэ ащызыухъумэгъэ Зиусхьаныр зэрэщыӀэр сэӀо!

³⁰ Израилым и Зиусхьанэу Тхьэм ыцӀэкӀэ тхьэлъанэ сшӀи, уишъэо Сэлмэн саужкӀэ пачъыхьагъум тетынэу, сэ счӀыпӀэ тахътэм ар тетӀысхьанэу къызэрэосӀогъагъэм фэдэу непэ джаущтэу сшӀыщт».

³¹ Арыти, БатщэбаӀ ынэӀу джэхашъом нигъэсэу пачъыхьэм шъхьащэ фишӀи, риӀуагъ: «Сизиусхьан пачъыхьэу Даут егъашӀэм орэпсэу!»

³² Ащ ыуж пачъыхьэу Даут къыӀуагъ: «КъурмэнышӀэу Цадокъи, тхьэлӀыкӀоу Натани, ЕхъоедаӀ ыкъо Бэнайи шъукъысфядж». Ахэр пачъыхьэм дэжь къихьагъэх.

³³ Пачъыхьэм ахэм ариӀуагъ: «СиухъумэкӀо шъхьагъырытхэр зижъугъэгъусэхи, сишъэо Сэлмэн сикъыдыр тежъугъэтӀысхьи Гъыхъон псынэкӀэчъым шъущэ.

³⁴ КъурмэнышӀэу Цадокъ тхьэлӀыкӀоу Натан игъусэу Израилым ипачъыхьанэу дагъэр ащ щыщарэф. Бжъэмыем шъукъепщи, „Пачъыхьэу Сэлмэн орэпсэу!“ – шъуӀуи, макъэ яжъугъэӀу.

³⁵ ЕтӀанэ ар мыщ къэжъугъэкӀотэжь. Ар къэкӀожьынышъ ситахътэ тетӀысхьащт. Сэ счӀыпӀэ пачъыхьагъум ар тетыщт, Израилми Ехъудэми ялӀышъхьэ пэщэнэу осыет ащ къыфэсшӀыжьыгъ».

³⁶ Арыти, ЕхъоедаӀ ыкъо Бэнай пачъыхьэм риӀожьыгъ: «Амин, сизиусхьан пачъыхьэм и Зиусхьанэу Тхьэм шӀоигъо ар орэхъу!

³⁷ Зиусхьанэу Тхьэр сизиусхьан пачъыхьэм зэригъусагъэм фэдэу Сэлмэни Ар ерэгъус, сизиусхьан пачъыхьэу Даут итахътэ зэрахиӀэтыкӀыгъэм нахь лъэшыжьэу ащ итахътэ ахерэӀэтыкӀ!»

³⁸ Джаущтэу къурмэнышӀэу Цадокъи, тхьэлӀыкӀоу Натани, ЕхъоедаӀ ыкъо Бэнайи, пачъыхьэм иухъумэкӀо шъхьагъырытхэу къэрэтый, пэлэтый лъэпкъмэ ащыщхэри Сэлмэн дэжь кӀохи, пачъыхьэу Даут икъыдыр ар тырагъэтӀысхьи, Гъыхъон псынэкӀэчъым ащагъ.

³⁹ КъурмэнышӀэу Цадокъ дагъэр зэрыт бжъэр чэтэнгъэӀэгъэ лъапӀэм къычӀихи Сэлмэн пачъыхьанэу ышъхьэ дагъэ щафагъ. Ащ лъыпытэу бжъэмыем къызепщэхэм, «Пачъыхьэу Сэлмэн орэпсэу!» – аӀуи, цӀыфхэр зэкӀэ къэзэрэгъэкууагъэх.

⁴⁰ ЦӀыф пстэуми Сэлмэн къагъэкӀотэжьыгъ, ахэм къамылхэм къарагъаӀощтыгъ, ягушӀогъошхуагъ, якуо мэкъэшхохэм чӀыгур агъэтӀыгурыгущтыгъэ.

⁴¹ Арыти, Адоныйрэ ащ ригъэблэгъагъэхэмрэ шхэныр зэрэзэпагъэоу жъот макъэхэр къызэхахыгъэх. Иоаб бжъэмые макъэр къызызэхехым къыӀуагъ: «Сыда къалэр къэзгъэбырсырыгъэр?»

⁴² Ащ къыӀощтыгъэр джыри къымыухыгъэу, къурмэнышӀэу Ебыетар ыкъо Ионэтан къыӀухьагъ. Арыти, Адоный къыӀуагъ: «КъакӀо, уцӀыф заф о, къэпхьырэр къэбарышӀу».

⁴³ Ионэтан ащ ипэгъокӀэу Адоный риӀуагъ: «ЗытетымкӀэ, тизиусхьан пачъыхьэу Даут Сэлмэн пачъыхьанэу тыригъэхьагъ.

⁴⁴ Пачъыхьэм къурмэнышӀэу Цадокъи, тхьэлӀыкӀоу Натани, ЕхъоедаӀ ыкъо Бэнайи, пачъыхьэм иухъумэкӀо шъхьагъырытхэу къэрэтыйхэмрэ пэлэтыйхэмрэ ащыщхэри ащ къыдигъэкӀуагъэхэти, Сэлмэн пачъыхьэм икъыдыр тырагъэтӀысхьагъ.

⁴⁵ ЕтӀанэ къурмэнышӀэу Цадокърэ тхьэлӀыкӀоу Натанрэ пачъыхьанэу ащ ышъхьэ дагъэ Гъыхъон щыщафагъ. ЯгушӀогъошхоу ащ къикӀыжьыгъэхэшъ ары къалэр къызкӀэпчӀыгъэр. Жъот макъэу зэхэшъухырэр джары къызхэкӀырэр.

⁴⁶ Сэлмэни пачъыхьэм итахътэ тетӀысхьэгъах.

⁴⁷ Пачъыхьэм иӀумэтхэри тизиусхьан пачъыхьэу Даут дэжь къакӀохи, „Уи Тхьэ Сэлмэн ищытхъу о уищытхъу нахь лъэшыжьэу ерэгъэӀу, итахъти о уитахътэ нахь лъэшыжьэу ахерэӀэтыкӀ!“ аӀуи, къыфэгушӀуагъэх. Арыти, пачъыхьэм ипӀэ зэрэхэлъэу ащ ипэгъокӀэу шъхьащэ къышӀыгъ.

⁴⁸ ЕтӀани ащ къыӀуагъ: „Израилым и Зиусхьанэу Тхьэм, сэ къысхэкӀыгъэу ситахътэ непэ тетӀысхьагъэр сэзгъэлъэгъурэм щытхъур ыдэжь!“»

⁴⁹ Ащ дэжьым Адоный ригъэблэгъагъэхэр зэкӀэ къащтэхи къэтэджыжьхи, шъхьадж игъогу техьажьыгъ.

⁵⁰ Адоный Сэлмэн щыщынэу кӀуи къурмэншӀыпӀэм ыкъуапэу къыпыщхэрэм захигъэнагъ.

⁵¹ Къэбарыр Сэлмэн къынагъэси къыраӀуагъ: «Адоный пачъыхьэу Сэлмэн щэщынэшъ, къурмэншӀыпӀэм ыкъуапэу къыпыщхэрэм захигъэнагъэу, „Пачъыхьэу Сэлмэн иӀумэт чатэкӀэ ымыукӀынэу джыдэдэм тхьэлъанэ къысферэшӀ“ еӀо».

⁵² Арыти, Сэлмэн ыӀуагъ: «ЦӀыф зафэу зыкъигъэлъагъомэ, зы шъхьац налъи ащ ышъхьэ къыхэзынэп, ау хъор-шэрыгъэ къызызхигъафэкӀэ, кӀодыщт».

⁵³ Джащ тетэу пачъыхьэу Сэлмэн ащ лъигъакӀохи къурмэншӀыпӀэм къыкӀэраригъэщыжьыгъ. Ар къакӀуи пачъыхьэу Сэлмэн шъхьащэ къызфешӀым, Сэлмэн ащ риӀуагъ: «Уиунэ кӀожь».