PAULKE ROMKÍDÍLO ATNAM SITHIE 4 - DEENA BAIBÉL (BSI)

Abrahambí Kaayii Sukenge

¹ Demílo, ngoluke opínem olenna Abrahamme kape emyén? Bí ingkuem paatone?

² Arope Abrahamme agérlok deene emla santumílo, de bíkke koyid supename, dekom Shédíke keralo emmang.

³ Dooying kitabe kape emdun? “Abraham bí Shédíme arope mííto, delokke depe ikolok bím yéjiinape santo.”

⁴ Supak tanie séko agér idudí bím bíkke hajirangem bido, idakkom dem amane emmayé; de bíkke iresunam atíe.

⁵ Depe idokom, agérlo míngke sumape idula atí manemte ayana Shédíme míídasuna amiem bíkke míngkelok yéjiinape sandung.

⁶ Dabidkom agom atelem sikepe potung, “Shédíke keralo yéjiina kídíde gérne”, emnamdem agérlok santímang.

⁷ “Séko buluke imemem maabla paab kídíem pokomdudí bulu gérne.

⁸ Sékoke paabem Ruutum bí edílote sanmadí de amide gérne.”

⁹ Si gérnamsi dínbíng iyodsuna kídí petomkía, demangkom dínbíng iyod sumana kídí petomkía? Abrahamme míngkelok yéjiina amipe santo emla ngolu pogong dung.

¹⁰ De ingko paklok lenkane? De bíkke dínbíng iyod surongemía, demangkom kerapía? De méélam pemang, kerang pemino!

¹¹ Delokrongem bí dínbíng iyod iyod, yéjii namlokke nomborem isula bí dínbíng iyod sumang adape míngkenge kato. Dekepe ila yéjii namem bulukíng bidope emla míngke sudola dínbíng iyod sumana takamke abupe bí ito.

¹² Delokrongem ngoluke abu Abrahamke dínbíng iyod sumang adape míngke sula yénam kísape dínbíng iyodsuna petommang idola bíkke ledulok gína takam kídíke abuete bí.

Shédíke Pébisunamem Míngkelok Paaname

¹³ Abraham melang bíkke otíng oyin kídíem amosokke tani opínem dunggemoyé emla Shédíke pébi sunamdem bulu ayonlok paamang idola míngkelok aana yéjiinam lokmin paatone.

¹⁴ Kapeila ayonlo duuna kídíde ruutum dogenape imílo, míngkede are kamang delokke pébi sunamde aromang,

¹⁵ kapeila ayonde Shédíke marlíngem laalík sudung. Delokke ingkolo ayon kamadudí delo imem kamang.

¹⁶ Delok legape, pébi sunamem ayon gooralo duuna petom lomang idola Abrahamke míngkelok otíng oyin takamlo asampe bidope pébi sunamde míngkelok aadung. Bímino ngolu takamke abue.

¹⁷ Dooying kitabe podung, “Ngo nom deddína opín kídílokke abupe imoto.” Ngoluke míngke sunam Shédíke keralo bí ngoluke abue. Shédí bí sinem turmokune delokke bíkke agomlok kamana atí kídíem kamokune.

¹⁸ Míínam sugíng kamapete Abraham bí míngkesula míínamsuto, delokke dekepe ikolok bí deddína opín kídílokke abupe ikai. Dooying kitabe sikepakpe podung, “Nokke otíng oyine takar kísape bojéyé.”

¹⁹ Depe idudelo bíkke dítage língko pííta dobong; idakkom bí agíke amílem míngkí suname simang kísape idubong delokke Sarah bí ome-oo oyimayé emla kénsu dolateng bíkke míngkenge pííram mang.

²⁰ Bíkke míngkenge bím melumang, delokke bí Shédíke pébi sunamem mííne míngomang, delokke míngkelo edíína Shédíme erkígeto.

²¹ Shédí bí ingkuem pébi sutodí dem berokrupe ipíí biyé emla Abraham bí mííto.

²² Sok legalokmin “Bím yéjiina amipe santone.”

²³ “Bím santone” emnam agom kídarde bíkke petom legape atmang.

²⁴ Ngoluke Ruutum Jisume sikolokke kiirepkuna, bím míngkesuna, yéjiina amipe sanpenam ngolu takamke legape dekedem attung.

²⁵ Ngoluke paab legalok bím sidope melíkto, delokke ngolum Shédíkelo yéjii mokupe emla bím kiireptoku.