MARK 9 - DEENA BAIBÉL (BSI)

¹ Delokrongem bí bulum pokai, “Ngo nolum arorupe podung, so dakna ayokone Shédíke teyong amonge ralnamlok aadokupe kaasu mangadape simape duuyé.”

Ballupname

² Longkéko doorongem Jisu bí Pitor, Jems delokke Joanme gíbola bulum kedonko díítekolo gíboto, delo bulu petom yéto. Delo bí buluke keralo ballupto.

³ Bíkke ege kídíde, tani among so etpunnam punnam emte pakyape punnam runge ito.

⁴ Delokrongem buluke keralo Elijah lang delokke Mosi bí lenla Jisume luposuto.

⁵ Pitor bí Jisume poto, “Ruutume, so duunamsi ngolu kepe ainame. Kaju dungko angumko ilaju nokke kolang, Mosi kekolang delokke Elijah keko.”

⁶ Bí ingkuem pope míítuadí kénsumang, bulu pesorunge ito.

⁷ Delokrongem doomuge aala bulum yéllup bomkai, delo doomug aradelo agom poto, “Si ngokke Ue, bím ngo ayadung. Bím tallangka!”

⁸ Menang asak bulu kanggo suname, séko meteng kaamang, Jisu petomme kaato.

⁹ Bulu dííte delok oidakkuem, Jisu bí bulum Tanike Ue sikolokke gerep kumang adape bulu ingkuem kaatodí dem séko meteng pokan mapeka emla lugap serapto.

¹⁰ Bulu atídem asoope buluke aralo mesuto, idola, “Sikolokke gerep kunamde” ingkuedí dem legadem pobosuto.

¹¹ Delo bulu bím ingkíto, “Kapeila ukil kídíe Elijah bí kerape lenyé rungku emkane?”

¹² Jisu bí poyansuto, “Berokpe pomílo Elijah bí kerape lendungku, delokke takam atíem mosiidung. Demílo kape Tanike Ue aréégela delokke mepak kosuyé emla attune?

¹³ Idokom ngo nolum podung Elijah bí aatobong, delokke bím bíkke legangem atbinam akampe bulu agí agí mínggípe ito.”

Deemana Aide Duubomnam Kookonem Jisuke Ipíkuname

¹⁴ Bulu luyilsuna kídí abídem dumsu dokudem ayoko mibam bamdí gooralo ukil kídíem pétmínsula duudope kaato.

¹⁵ Ami takame Jisume kaasu yédem, bulu irisinyope mííla bím yamrík kape emla dukto.

¹⁶ Nolu bulum ingkueke pétmín sudungane emla bí tatkíto.

¹⁷ Mibam delok amiko pobikai, “Saare, deemana aidde duubomla agom poimana ngokke uem ngo nokkíng bomatuai.

¹⁸ Edílo de bím aalup bomyédí, bím amolo gelet dung. Bíkke nappalok apud ayude lendung, bíkke iipange kotek sudung delokke tolname ila jindung. Ngo nokkelo luyilsuna kídíem deemana aidem monpak bikui emla rogutuai, idokom bulu ilamato.”

¹⁹ “E, aro míímana siiruma,” emla ludola Jisu bí poto, “Edítko ngo nolum duubo supene? Edítko nolukíng ngo yébosupene? Koodem ngokkíng bomatola.”

²⁰ Delo bulu bím aaboto. Deemana aidde Jisume kaasu yédem koodem jin-go sudope geletto. Bí amodelo oletla longgo longgosula, nappalok apud ayud lenla dongkai.

²¹ Jisu bí koo delokke abudem, “Edítko bí sikepe idubon?” emla tatkíto. “Ojing lokkekai” emla bí pobito.

²² “Deemana aidsi deddíko bím emelo gelíkla demangkom asilo geyula bím petpe emla ralbomto. Idakkom no ngolum ayasula, pakla yémílo atíko igultoyika” emto.

²³ Jisu bí poyansuto, “No ilamílo atí takamde míngkesuna kepe ilamanam kamang.”

²⁴ Menang asak koo delokke abude, “Ngo arope míngke sudung; ngokke míngke pííramem igultoyika!” emto.

²⁵ Jisu bí mibamdem depe ikolo dakdum suadope kaayédelo, bí deemana aiddem luto. “No ruubéna delokke agom pomana aid nom, ngo bíkke lokke gígéétoku emdung delokke lekoda bíkkíng aalat kuimapeka” emla bí luto.

²⁶ Deemana aidde ngerpíkkai, bím jinmo langaala gíkaku. Koode simang kísape iname ami kídíe bím “Bí sikai” emla manbomsuto.

²⁷ Depe iduem Jisu bí bím alaglok gakrepto delo bídaksutoku.

²⁸ Jisu bí aralo duusu rongkuem bíkkíng luyilsuna kídíde pesuppe bím “Kapeilai ngolu sim monlang kumatone?” emla tatkísuto.

²⁹ Bí poto, “Sikena atíem kumnam petom lokmin monlang dungkune.” emdo.

Jisuke Lekoda Agí Sigang Nyoggangem Pobisuname

³⁰ Bulu dem among dem megeyéla delokke Galil raadalok gíto. Jisu bí bulu ingkolo yédudídem séko meteng kénmo límang,

³¹ kapeila bí bíkkelo luyilsuna kídíem luyil poyil dungai. Bí bulum poto, “Tanike Uem tani mirulo yadlíkdak. Bulu bím petyé, delokke longum méélamlo bí gerepyéku.”

³² Depe idola bí ingko legangem podudí bulu tatkénmang delokke bím legangem íípe namemte pesoto.

Sékoi Botte Yalumne?

³³ Bulu Kapernaumlo aato. Bí ekumlo duudungem, bí bulum tatkíto, “Nolu ingkue keda bedalo pétmín sudungane?”

³⁴ Idakkom bulu asoope ito kapeila bedalo bulu ingkuei botte yalumdune emnam legadem lukíbosuto.

³⁵ Dungadola, Jisu bí luyilsuna íying kolang annyidem tompala poto, “Séko keralídudí, bí méélam yalumpe delokke takamlokke béérape iperung aido.”

³⁶ Bí koo aménako gakla buluke keralo dakmoto. Bíkke alaglo bodola, bí bulum poto,

³⁷ “Séko bí sok kookídí sokke akonem ngokke amínlok torík sududí ngomkom torík sudung; delokke séko bí ngom torík sududí de ngommang idakkom ngom melíkna bímmin torík sudune.”

Séko Ngolum Akmadudí De Ngolukepene

³⁸ Joan bí pokai, “Saare, ngolu nokke amínlok uromem monpak kuna amiko kaato delo ngolu bím lutumto, kapeila bí ngoluke opéé sokkemang.”

³⁹ “Bím lutum mapeka” Jisu bí emto. “Ngokke amínlok irisinyo inade sékokom méélamlo ngom aimang emmayé,

⁴⁰ kapeila séko bí ngolum akmadudí bí ngolu kepene.

⁴¹ Ngo nolum arorupe podung, séko nolum ngok amínlok nolu Kristoke emla sian batiko bisuyédí bí berokrupe bíkke amanem menyok sumayé.

Paab Imoname

⁴² “Delokrongem séko ngom arope míína koo akon sim paab imodudí, bottena anyat lííbyangko bíkke alíílo paklík sugeyéla siyéng asilo yopyu sunamde bíkkepe aiberokyado.

⁴³ Nokke alag kone paab imodumílo, dem teepak sutola. Alag annyiem gedola miyyimana doorum líísam amolo gípemílo, laktula turpeko amolo anggenamde nokkepe aiyadung.

⁴⁵ Delokke nokke ale akone nom paab imodumílo, dem teepak sutola. Ale annyiem gedola doorum líísamlo yoplík kosu pemílo, lebééla turpeko amolo angge namde nokkepe aiyado,

⁴⁷ Delokke nokke amig kone nom paab imodumílo, dem roobín sutola. Amig annyiem gedola doorum líísamlo yoplík kosu pemílo, Shédíke amolo amig atelko gedola anggenamde nokkepe aiyadung.”

⁴⁸ Kapeila doorum líísam amodelo, “Buluke tapume siyimang, delokke eme guyin yimang!

⁴⁹ Mipil miyongem alope emelo yolmoyé.”

⁵⁰ “Alode aine, idakkom si sokke tíínamde nyokku mílo, kape kísa nolu dem tíídokupe ilayékune? Nolu agíe alo tíínam kísa imotoka, delokke noluke aralo yépope yébo sulangka.”