MARK 16 - DEENA BAIBÉL (BSI)

Gerepkuname

¹ Edílo Sabbath Gíídíe gíyinkadí, Mari Magdalini lang Jemske ane Mari, delokke Salom bulu, Jisuke simanglo nyoolíkpe emla nyoopenam atíeke reto.

² Rokomope hoptalokke kerayalum longedelo, doonyi saaro pagem, bulu agodanpe endungai,

³ delo bulu mipile ííbosukai, “Sékoi lamgélo pyangkapnam lííbyangem loopak biyéne.”

⁴ Idokom bulu kaasu toname, botteruna lííbyadem longgétuupe kaato.

⁵ Bulu agodelo aaname, yaaméko yalunna ege genako lakbík danlo duudope kaato, delo bulu pesoto.

⁶ “Pesomapeka” emla bí pokai, “Nolu pansang tonam Najarini Jisume kaatadung. Bí gerepkaku! Bí so duuyimang.

⁷ Gílat langkula, bíkkelo luyilsuna kídí emlang Pitorme sikepe pobi tolangku, ‘Bí noluke kerape Galillo gídak. Delomoko nolu bím, bíkke nolum ponam kísape kaapayéne.’”

⁸ Pesuem dan go sulangala mime kídíde ago delok lenlangkula dukkaku. Bulu séko mete atí pobimang, kapeila bulu pesoto.

Mari Magdalinime Jisuke Lengkan Sukuname

⁹ Edílo Jisu bí hoptalokke kerayalum longedelo gerep tokudi, bí kerayalumpe bíkke uyu kínítko monpak kuko Mari Magdalini me lengkan sutoku.

¹⁰ Bí gíla bíkkíng yémín gena kídílo pobitoku.

¹¹ Bulu Jisu bí turdung delokke bí Jisume kaato emnamem tayyédelo, bulu dem arope míímato.

Jisukelo Luyilsuna Midum Annyikolo Lengkan Sukuname

¹² Méélamdem Jisu bí angu angupe bulum midum annyi konem buluke doolunglo endakkuem lengkansuto.

¹³ Bínyi enlat langkula dem abíd ami kídíemte popang bitoku; depe ilate bulu bínyi kemte arope míímang.

Luyilsuna Íying Kolang Atello Jisuke Lengkan Sukuname

¹⁴ Méélampe Jisu bí midum íying kolang ateldem, buluke dotké dongo dungem lengkan subitoku; bí buluke míngke pííram namem delokke bíkke gerep rongkuem bím kaana kídí agomem aro míípemang emla buluke eda aapí genamem kaala bulum nooto.

¹⁵ Bí bulum poto, “Tani among takamlo gíla turkí ngakína takamlo tatpona ngiitomem pogoo langka.

¹⁶ Séko bulu arope mííla baptis isuyédí de turyéku, idakkom séko bulu aro míímayédí bulu nyokyéku.

¹⁷ Delokrongem sim iyod sangod kídísim arope míína kídílo biyé: Ngokke amínlok bulu uyu kídíem monyé; bulu aní agomem poyé;

¹⁸ bulu tabíem agí alaglok gagonyé; delokke díkpe kopena atíem dodokom de bulum atí ilamayé; bulu agí alage kina ami kídílo leetanyé; delo bulu aiyéku.”

Jisume Teyong Amope Laasangkuname

¹⁹ Ruutum Jisu bí bulum depe porongem, bím teyong telo laasatoku delo bí Shédíke lakbíklo dungkaku.

²⁰ Delokrongem luyilsuna kídíe gígongkai delokke rego mipílo ngiitomem pogooto, delo Ruutum bí bulukíng agér gérbosula delokke delo lekope iyod sangod kídarlok bíkke agomem apíímoto.