JUDA 1 - DEENA BAIBÉL (BSI)

¹ Jisu Kristoke béérang delokke Jemske bíro Juda Jisu Kristoke kaabomnam delokke Abu Shédíke ayanam, tomlen kunam kídílo atname.

² Yaasame, yéponame delokke ayange edíng daklangka.

Paab Delokke Paabna Ami Kídílokke Anngéé Supekue

³ Angong kídía, ngoluke turpeko tarongem pangku penam legangem ngo nolum atkanlínge idu bongai, deena ami takamlo biyar líknam míngkeng dem nolu bomgap rudope emla ngo nolum atlík míílíkdung.

⁴ Kerangoo pekai dekepe inem Shédí bí mepakyéku emla atto subinam amieke nolu kénsu madope noluke aralo aalíkkai. De amikídí de, Shédí kénma neke, ngoluke Abu Shédíke yanggongem belumna agérlo inakune delokke ngoluke Jisu Kristome, Edíísuna Ruutume emla tomana kídíe.

⁵ Nolu sim takam sim kénsu duakom ngo nolum míípang sudokupe emla pobi lídungku de Shédí bí Bíkke amikídíem Ijipt lok laalen toku idola méélam delo bím arope míímana kídíem pet paktoku.

⁶ Delokrongem sim kénsu topíam, agíke yékollo duusumape igeyéla agí dungkuem mepaksuna teyong kotoki kídíemkom rumkíng belo kaamo ruruklo, alagem yééla duuyardope bulum ingéédíku bottena longem Shédí bí meruu bitung.

⁷ Dekepe Sodom delokke Gomorrah taon annyi, delokke ampeng kerengke taon kídare agísuem abír ajonlo delokke guumang gammalo melíksuto. bulu miyyimana emelo anngéé suku penamem kaayii sukepe idung.

⁸ Dekepakpe, si immang kísape yénakídí si, buluke agí amílem ibul sudung, bulu Shédíke ilanana ralnamem torík sumang delokke teyong lokke angun ralnamem ngilkaadung.

⁹ Ruutum yalum teyong kotoki Mikael, bíkke uyuem Mosike amíl legalo lumín suduem uyuem dekena ngilkaa luyéé agomem lulamape igeyéla, Ruutum bí nom ludung emlamin lutune.

¹⁰ Depe ilate si ami kídí si buluke kénmanam ayardem lukaa luyééla luséme; delokke atí legang kénmana simon sili kísape, buluke míínamem iyamdung, de atíkídí pakde bulum nyokmone.

¹¹ Edítko de bulukepe pesoruname! Bulu Kainke ledulok enkai; paanam donam legape bulu Balaamke imemko bedanglo gímem sulíkkai; bulu Korahke inam kísape bulum petpak toku.

¹² Buluke annying kamape tíngír dobat sula ashéng inamde noluke donam dopéé aralo akang memokpe idung. Bulu pedong omana, asarlok yaptak sunam doomug kísa, delokke ayé éémana gédílo puula sina esing kísa.

¹³ Bulu siyéng asilokke sipyar kísa. Buluke annying agérde siput kísape lengkandung delokke kaamo ruak yalumem agínpe meruu binam gígoona takar kísa.

¹⁴ Adam kelokke kínít nana siirum Henok bí sok amikídí sok legangem sikepe polupoor bitung; “Kaatopíam Ruutum bí bíkke éjar éjar deena amikídíem aabola aadak.

¹⁵ Bí mipil miyongem bisaryéku delokke buluke deemanam bedalok deemana agér inam takamem ajéng iyan suyéku.”

¹⁶ Si ami kídísi lutek manrekla delokke akon imem matíneke; bulu agísue míngkesula delokke amiem buluke paape dopeko legape luuk poukla ineke.

Lutosubiname Delokke Pogaplíkname

¹⁷ Idakkom, ayanam angong kídía, ingkuem ngoluke Ruutum Jisu Kristoke tomlíknam amikídíe luyin bitudí dem míípang sutolangku.

¹⁸ Bulu sikepe nolum potuai, “Yéyin longelo agí míídulok deemape yépena lupu luyééna amie lenyé.”

¹⁹ Si amikídí simin agí aapí míídupelok yéne delokke Aid kamana apan aran imone.

²⁰ Idakkom ayanam angong kídí nolu, agí agíe noluke deenarung míngkelo siirep sulangka delokke Deena Aidlok kumlangka.

²¹ Nolum duuyarna turnamlo bomdope ngoluke Ruutum Jisu Kristoke yaasamem nolu toyang dula agísue Shédíke ayanglo dunggap topíam.

²² Mííne míngona kídíem yaasam langka.

²³ Ayokonem emelokke sogéé langkula, mosing langka; peso kataksuna yaasamem lengkan langka. Idola ayokonem buluke paab akang bítkatnam ege daadiem kangki langka.

Yidnam Kumname

²⁴ Nolum olet kupe kolokke umbompena delokke nolu agí angun ralnamlo atí imem kamadope delokke ashérupe lengkan pena, bíkkíng

²⁵ ngoluke Mosing bokuna Shédíke angun ralname, amín edínge, pauare delokke ila nana ralname, ngoluke Ruutum Jisukelok, siirum siirumlope, supak lokkelang yépenam lope duuyar míndak langka. Amen.