DANIEL 6 - DEENA BAIBÉL (BSI)

Myomur Kídí Arunglo Danielke Duuname

¹ Darias ke roja among yéta tabungem kaabom dope, bí língko kolang íying annyiko gobonorpe ullento.

² Delok teyolo, rojade Daniel melang annyikonko gobonor ullennam kídíem kaalíknape, delokke rojake míínamem kangge bidope ullento.

³ Abíd kaalíkna kídí emla gobonor kídíem pemílo aiyape Daniel bí agér-anamem aiyadope iladung emla menape lenkansuto. Bí yagorupe kénjing-kénmang kolok, rojade tabung among yétadem bíkkelo kaabom dope bilíkpe míílento.

⁴ Dekepe ikolok abíd kaalíkna, delokke gobonor ullennam kídíde, Danielke among tabungem rungge-igeko aralo imemem airupe matato. Idola bulu bíkkíng imem kaapamato, kapeila Daniel bí míílíknampe ito, delokke atí imem demangkom ingu-irang agér imato.

⁵ Delo buluke aralo pobosuto, “Ngolu Daniel kelo bíkke dormo legalo luamadem edílokom imem kaalen mayé.”

⁶ Delok legape bulu roja delo gíla poto, “Roja Darias, no agínpe duuyar daklangka!

⁷ Nokke among yéta so rungge-igebona kaalíkna kídíe, gobonor kídíe, nínmínna gobonor kídíe, delokke abíd ruutum kídí ngolu takame, roja no ukumko, delokke dem apíírupe igapdope bilendope emla luyin bosutung. Looying angum araso séko amiekom, ingkona uyuem, demangkom amiem nok kékonlo kummadope, ukumko bilen langka. Sékodí sim ukum sim ipéé suyéne, dem amidem myomur kídí dungko arunglo ellíkpe aido.

⁸ Delok legape rojano ikup-ilat yimadope ukum sim bilenla delo sohitoka, delokke de angupe ilang kumanam Medes kelang Parsia ke ayon idongpe ipe aiyé.”

⁹ Dekepe iname, roja Darias ukum dem sohito.

¹⁰ Edílo Daniel bí ukumdem sohito emla kéntodí, bí ekumpe gítoku. Bíkke ekum kumbang delokke pírtek kolo Jirusalem danpe siyyana kirki kídíe kato. Delo agínke iyasunampe, bí siyyanam kirki kídí delo lebíng kooníla, Shédíme longelo lengumpe kumsuto.

¹¹ Edílo Danielke miru kídíe gíla bíme Shédí kíng igulkola kumsudope kaatodí,

¹² bulu takame lekope roja delo Danielke imemem lukanpe emla gíto. Bulu poto, “Roja no looying angum aralo séko amiekom, ingkona uyuem, demangkom amiem, nokke kékonlo kummadope delokke kumnem myomur kídí arunglo yoplíkyé emla ukumko sohito.” Rojade poyansuto. “Em, angupe ilang kumanam Medes kelang Parsia ke ayon idongpe, lugap líknam ukumko bilento.”

¹³ Delo bulu roja deme poto, “Judah lok monnyoknam akon Daniel bí, roja nome mínggemang, delokke nokke bilennam ukum emteng igemang. Bí longelo lengumpe kumsu ayardung.”

¹⁴ Edílo rojade sim tattodí, bí dugrupe mííto, delokke Danielme ingkona bedalok mopít kandodí deme matato. Bí doonyi uangdo loope mííta títo.

¹⁵ Delo ami kídíde aalat sulangkula roja deme poto, “E roja no kéndung, Medes kelang Parsia kídíke ayon idongpe rojake bilennam ukumem edílokom angupe ilang kumang.”

¹⁶ Dekepe iname rojade Danielme umdope ukum bila, bíme myomur kídíke dungko arung delo yoblíkto. Bí Danielme poto, “Nokke arorupe míngkesula agér gérbinam Shédíbí, nome mopít daklangka.”

¹⁷ Arung nappang delo sékoteng Daniel me mopít lamadope elíngko lengkapto, delokke rojade bíkke agíke roja siilem, delokke bíkke kénna ami kídíke siil emkom elíng delo tuplíkto.

¹⁸ Delok rongem rojade agí dungkope gílat sulangkula, atí domape, delokke ingkona kaaman-iman koteng imape, yohdem ipma sényingpe darkokto.

¹⁹ Roh momí-rorí delo rojade dagrepla arung delo lomangto.

²⁰ Edílo bí delo píítodí, bí ankí gomuklok gogto, “Daniel, Turyarna Shédíme agér ibina! Nokke arorupe míngkesula agér gérbinam Shédí bí nome myomur kídí lokke mopít latonía?”

²¹ Daniel poyan suto, “E roja, no turyar daklangka!

²² Shédí bí bíkke teyong kotokiem melíkla, ngom atí idír madope myomur kídíke nappangem itumto. Kapeila bí kéndung, ngo atí imemmang, delokke roja nok keralote ngo atí imem kamang.”

²³ Rojade yagorupe ashéto, delokke Danielme arung delok laalen dokupe lulíkto. Dekepeila bulu bím hosatoku, delokke bím anyong koteng tarí-tape iketdope kaapamato, legade bí Shédí kíng míídasuto.

²⁴ Delo Daniel me imemdung emna ami kídídem umdope rojade ukum líkla, bulume, buluke mime kídí, delokke ome-oo kídí takamem lekope myomur kídí dungko arunglo yoblíkto. Bulu arung delokke rumkíyalumlo píímang adapekai, myomur kídíde sutbomdola, bulum agrík sula buluke along takamem rektír-rekyír yinto.

²⁵ Delo roja Darias tani among tabulok ami kídíem, opín tabungem, delokke agom gomuk atí-atína tabunglo kakot atkanto: “Nolukíng ashénge kadak langka!

²⁶ Ngokke among yéta takam so Danielke Shédíme pesola, delokke míngge langka emla ngo ukum líkdung. Bí turna Shédíko, delokke bí yénam tabulo ruutum bomyé. Bíkke among yétade edílokom nyokmayé, delokke bík pauare edílokom iyindí kamayé.

²⁷ Bí mopídung delokke iguldung; bí míngkén manamem, delokke irisinyo agérem teyong among lolang tani amonglo idung. Bí Daniel me myomur kídíke petpenam lokke mopít toku.”

²⁸ Daniel bí Darias ke rojape duudung emlang Parsia ami Sairaske rojape duudungem agér-anam takamlo airupe ila yéto.