DANIEL 5 - DEENA BAIBÉL (BSI)

Belshajjarke Doboe

¹ Roja Belshajjar bí yume konem éjarkope kénna ami kídíem botteruna dobo kolo gogto, delo bulu lekope takame apongem tííbosuto.

² Buluke tíídungem, Belshajjar bí bík abu Nebukadnejjar ke Jirusalem Kumkeng Ekumlok laanam uun, delokke baldín lok pínam ekung-batidem bomadope políkto. Rojade delok bati kídí delok bí, bík kénna ami kídí, bík mime kídí, delokke bík éémé kídí takame, lekope tíína dope emla bomamoto.

³ Delo uun ekung-bati kídíem menarupe bomato, delokke bulu apongem deke delok tíínato,

⁴ delokke uun, baldín, pitol, arem, esing, delokke elínglok pínam mimang kídíem yidgeto.

⁵ Menang asak tani alagko lenla, lém meru kídí lokke angun kídíke bojéyalumpe ngunbomko, roja ekum lokke molnam suppi delo akor eke atkai. Alag delokke atdungem rojade kaato.

⁶ Dem kaala bí mikmoe sémal gela, yagorupe pesokolok bíkke lebíng annyie danto.

⁷ Bí moya-montrong kídíem, irisinyo ina kídíem, delokke takar miri kídíem menape bomadope emla amiko gogtamoto. Edílo bulu pííyintodí, rojade bulume poto, “Séko amiedí akor atnam sim porilala, delokke atnam sok gomroem pola biyédí, dem roja lukdorem leemo líkyé, bíkke alínglo mínggenam uun tadogem kellíkyé, delokke roja among gooralo bí botteyalumna ami angumnape iyé.”

⁸ Rojake kénna ami kídíe lubikape aato, idakkom bulu sékokom atnamdem rikén lamato, demangkom delok legangem rojaem lubi lamato.

⁹ Roja Belshajjar bí yagorupe pesoríanla sémal yayang ito, delokke bíkke kénna ami kídíde kape ipedí emla mínga aloosuto.

¹⁰ Roja delokkelang bík kénna ami kídíke pesolok ngomnam dem tatla rani anede dobo doko delo aato. Bí poto, “Roja no duuyar daklangka! No siddípe míídír sumapeka, delokke mikmoe sémal gemapeka.

¹¹ Nokke amoso deena uyu kídíke aid gena amiko kadung. Edílo nok abue rojape ituadí, delo si ami si bíkke mííjing kaajinam aangem, kénnamem, delokke gyanem uyu kídíke gyan kísape lengkantuai. Delokke nok abu Nebukadnejjar bí bíme, kénna miri kídí, moya-montrong ina kídí, irisinyo ina kídí, delokke takar miri kídí lokke ruutumpe metuai.

¹² Bí kénna rungko, kénrí-kénnyonako, immang legangem tatjinako, porí-ponyo pojiinako, delokke míngkén kíramnamem lubi lanako; dekepeila rojake Belteshajjar emla mínnam Daniel me tomatola, delokke bí sok legang takam sim pobiyé.”

Atnam Legangem Danielke Lubiname

¹³ Danielme rojake keralo menarupe langaato, delokke rojade bím íngkíto, “Judah amonglok ngokke abuke langaanam monnyoknam Jihudi ami Daniel ya no?

¹⁴ Ngo tatdung deena uyu kídíke aide nokkíng duumíndung, dekepeila no agér ijing genana kénnam elang míngkok sunana kénname nokkíng kadung.

¹⁵ Kénna kídíem, delokke moya uyu gena kídíem, atnam sim poridope, delokke sok legang si ingkuedí dem pobidope gogatuai, idola bulu gomroem míílen-kénlen lamato.

¹⁶ No duusupna gomroem kénlen ladung, delokke míngkén manam kídíem pobi ladung emla ngo supak tatdung. No atnam kídí sim poridola, delok gomroem lubi layémílo, nome gaina roja lukdorem leemolíkyé, mínggenam uun tadogem alínglo tulígyé, delokke no ngok roja among yéta sokke botteruna ami angumnape iyé.”

¹⁷ Daniel poyan suto, “Nok aman bipenam kídídem nok legape mesiisutoka, demangkom dekedem akonem biyantoka. E roja ngo nokke legape atnam sim poribiyé, delokke sok gomroem pobiyé.

¹⁸ “Takamem Botteyalumna Shédí bí nokke abu Nebukadnejjarme botteruna rojape imola, amín kanarungpe imola kímte-remtepe míísudope delokke bím angun-abédope ruuto.

¹⁹ Bí bojérupe mite-mirem kolok tani amonglok ami takame, opín tabunge, delokke agom gomuk atí-atína tabunge bím pesola dan-geto. Bí sékomedí petpe emla míítone, dem petto; bí sékomedí turmope emla míítone, dem turmoto. Bí bíkke míínampe akonem mínggeto, delokke akonem annying paadope ito.

²⁰ Idola bí míngkímsula, miképla, ayang kamape ikolok, bíme roja dungkeng lokke laabíntoku, delokke bíkke mínggenam yétae nyokkaku.

²¹ Bíme tani yékul lokke monpakto, delokke bíkke mííyi-míísange simon-sili kísape ito. Bí moonam gado kídílo yémín geto, rubo kísape tamiem nakgoto, delokke rulong kolo, tangare okatdope ipto. Méélam delo bí Takamem Botteyalumna Shédí bí roja takamke among yétaem ruutumdung, delokke dekedem bík míínampe sékometeng biladung emla bí kéntoku.

²² “Idola no, bíkke ue, sim atí kídí sim kéndu lateng no mínggíp sumang.

²³ No teyong amonglok Ruutumem ipéésula, delokke bíkke Kumkeng Ekum loge laanam ekung-bati kídíem no laabito. No, nok kénna ami kídíe, nok mime kídíe, delokke nok éémé kídí takame, deloge apongem tíínato, delokke uun, baldín, pitol, arem, esing delokke elínglok pínam mimang kídíem yitgeto. De uyu kídíde kaapamang delokke tatpaamang, delokke bulu atí koteng kénmang. Idola no, nome turmopedín ma simopedín, dekena kebangem luna, delokke nokke inam takamem ruutum bomna Shédíme mínggemato.

²⁴ Dekepe ilamin Shédí bí alagdem akor kídísim atdope melíktune.

²⁵ “Simin atanamde: ‘MÉNÉ, MÉNÉ, TÉKÉL, delokke PARSIN.’

²⁶ Delokke simin delokke gomrode: MÉNÉ, emnamde Shédíbí nok yéta lokke longe kídíeme santo, delokke dem yérídope imoto;

²⁷ TÉKÉL, emnamde nom bekkínana kolo bekkíla, nome etsa teyukdope paato.

²⁸ PARSIN, emnamde nokke among yétaem kípan-kíransula, among kídarem Medes emlang Parsia kídílo bilíkto.”

²⁹ Delopak Belshajjar bí bíkke béérang kídíem Danielme roja lukdorem leemo líkdope, delokke mínggenam uun tadok emkom bíkke alínglo tulíkdope ukum líkto. Delokke bík roja among yéta delo bím bottena ami angumnape ullento.

³⁰ Delo yoh deloi Babilonlok roja Belshajjarme petto;

³¹ delokke Medes lokke takying akké kolang taknyina Darias bí roja yétadem laato.