DANIEL 4 - DEENA BAIBÉL (BSI)

Nebukadnejjarke Immang Annyinane

¹ Roja Nebukadnejjar rumkíngke kobor kídísim tani among sokke ami takamlo, opín tabunglo, agom gomuk atí-atína tabulo melíkto: Nolukíng ashénge bojéyape kalangka!

² Takamem botteyana Shédíke ngome lengkannam míngkén manam, delokke irí-inyo legang kídíem ngokke atnam sim tatgap langka.

³ “Edítko míngkén manamem Shédíke ngolume lengkan namde bottedune! Edítko bík irisinyo inamde ralnam kadune! Shédí bí duuyarna roje; bí yénam-gítnam loope duubomyé.

⁴ “Ngokke roja ekumlo ngo aiyope, jénam-remnamem eraprupe ibomla duusudungai.

⁵ Igeyéla ngo pesorunam immangko, delokke adír genam kaarí-kaanyo kaanamko ipdungem kaato.

⁶ Delok legape ngo Babilon lokke kénna ami kídíem, ngok dungkolo ngokke immang maanam delokke gomroem pobidope, bomadope emla ukum bito.

⁷ Delo kénna miri kídíe, moya-uyu gene, irisinyo ina kídíe, delokke takar miri takamem langaato, delo ngo bulume ngokke immang dem pobito, idokom bulu ngome gomroem pola bimato.

⁸ Delo Daniel bí aato. (Bím ngokke uyu amín kísape Belteshajjar emlangkom mandung.) Deena uyu kídíke aide bíkkíng duumín genam legape, ngok immangem bím pobito. Ngo bím poto:

⁹ Kénna miri kídarlok ruutum Belteshajjar. Deena uyu kídíke aide nokkíng duudung, delokke no míngkén manam takam atíem kéndung emla ngo kéndung. Si ngok immange. Sokke gomroem ngome lubilangka.

¹⁰ “Ngokke ipdungem, ngo kaarí-kaanyope tani among sokke raadanglo esing botterunako duudope kaato.

¹¹ De esingde botte yayang siirepla talengem pííto, delokke tani among sokke ami takame kaayin lato.

¹² Delok anne kídíe kamporunge ido, delokke esingde, tani among sokke ami takamem píípena ayée éédo. Simon kídíe delok ugyum delo ketnosudo, pettang kídíe delok aag kídílo asup suplíkdo, delokke takam turkína kídíe delok ayéem dodo.

¹³ “Ngokke kaarí-kaanyo delokke legangem mííbom dungem, ngo teyong among lok teyong kotokiko an-gap kanggap sula tokdakpe kaato.

¹⁴ Bí botterupe gogtong dola luto, ‘Esingdem teelet langka, delokke aag kídídem sotmík langka; anne kídíem peklen langka, delokke ayé kídídem byarpan-byarran sulangka. Esing rumkíng delo duuna simon kídídem monbín langka, delokke aaglo duuna pettang kídíem yopmo langkuka.

¹⁵ Tengge yéla esing teetung lerídem, arem loklang pitollok pínam íkoli kolok rínla among delo melangka. Dem among delo íínying-tamilo lekope melangka. “ ‘Bíme tangarem olum motoka, delokke bíme simon kídí lolang nesi-neyang kídí pénsamlo duubo sumotoka.

¹⁶ Dítak kíníd kope bíkkíng tanike mííyi-míísange kamayé, idola simon-silike mííyi-míísang kísa ila yéyé.

¹⁷ Si an-gap kanggapna teyong kotoki kídí lokke mííname. Delok legape moole tabunglok ami kídíe, Takamem Botteyana Shédí kelo takam ami kídíke yéta teyolo ralname kadung, delokke bí dekedem mangkem yalumna ami kídí loteng, bíkke ullennam kolo bilík ladung emla kénlangka.’

¹⁸ “Si moko ngok immang maaname,” emla roja Nebukadnejjar bí poto. “Supak, Belteshajjar no sokke gomroem ngom pobilangka. Ngokke kénna ami kídíe ngom sékokom pola bimato, idokom no pola biyé, kapeila nokkíng deena uyu kídíke aide duudung.”

Immang Delok Gomroem Danielke Lubiname

¹⁹ Dem tayyédem, Belteshajjar emlate mínnam Daniel bí yagorupe ansu-pesola agom pokén geyimape ito. Rojade bím poto, “Belteshajjar, immang delang delokke gomrode nom ansu-peso moma daklangka.” Belteshajjar bí poyansuto, “E roja, nok immang kaanam delang delokke gomrode nokkíng aamape, nokke miru kídílo aalík daklangka, emla ngo míídung.

²⁰ Taleng tesim píídope bodoona esing dem tani among sok ami takame kaalato.

²¹ Delok annede kamporunge ito, delokke tani among sok ami takamem dobo lanana ayée delo kato. Simon-sili kídíe delok rumkílo ketno suto, delokke pettang kídíe delok aag kídílo asup kídíem suplíkto.

²² “E roja, nomino kedonna delokke tolnarung esingde. No botterupe sisaala taleng emkom píngkai, delokke nok ralname tani among tabulo pííyinkai.

²³ E roja, nokke kaadungem, teyong among telok tokna kotokide pokai, ‘Esingdem teepak langka, delokke agérlo aayimadope ilangka, idola esing teetung leríng dem among delo melangka. Arem loklang pitollok pínam íkoli kolok situng leríng dem yééla íínying-tamilo lekope melangka. Delokke bíme tangarem okat motoka, delokke bíme dítak kínídko simon-sili kídílo yémín gemo langka.’

²⁴ “E roja simino immang delokke gomroe, delokke simino Takamem Botteyalumna Shédíke nokke yépenamlo ipenam legangem nom pokanname.

²⁵ Nome tani yéta lokke monpakyé, delokke no simon-sili kídílo duumín geyé. Dítak kíníd kope no rubo, delokke tangar okatko rulong kolo mér kísape yéla tamilok doyé. Delo no Takamem Botteyalumna Shédíbí tani yéta takamem ruutumdung emla, delokke bí dekedem sékome míídudí bím biladung emla kényé.

²⁶ Teyong kotokide esing teetung leríng dem among delo medope lulígto. Delok gomrode idung, edílo no Shédí bí tani amongem ruutum bomdung emla kénsu yékudí, delo no lekoda rojape iyéku.

²⁷ Delok legape, E roja, ngokke poyilnam sim igelangka. Paab iyimapeka, delokke aroem gérlangka, delokke opan kídíem ayang langka. Dekepe iyémílo no jéla-remla yéyaryé.”

²⁸ Takam pokan tonam si roja Nebukadnejjar kíng arope ilíkto.

²⁹ Poolo íying kolang annyiko irongem, edílo bí Babilon lok bík roja ekum míílong kídílo gíman goodo delo,

³⁰ bí poto, “Kaatola, Babilon si edítko bottedune: sim ngokke ralnam loklang tolnam, delokke angun-abélok, delokke roja agérem botterupe amín kadope lengkan sunana luunepe motung.”

³¹ Bíkke agomem luyinmang adape, teyong among loge agomko polento, “Roja Nebukadnejjar, ngokke ponamem tatlangka: Nokke roja ralnamem supak nokke lok laabín toku.

³² Nom tani yékul loge monpakyé, no simon-sili kídílo duumín geyé, delokke dítak kínídko rubo kísape tami nakla yéyé. Delomin no Takamem Botteyalumna Shédíbí tani roja yéta kídí teyolo ruutumdung, delokke bí dekedem sékome míídudí bím biladung emla kényékune.”

³³ Agomde menarupe arolíkkai. Nebukadnejjarme tani yékul lokke monpakto, delokke rubo kísape tami nakla bí yélenkai. Tangar ete bík amíllo okatto, delokke bík dumíd ete pemí míya amíd kísape bodongla, delokke bík lakyin kídíete pettang kídíke leyin kísape bodongkai.

Nebukadnejjarke Shédíme Yidname

³⁴ “Edílo dítak kíníde gíyintodí,” emla rojade pola, “Ngo taleng danpe kaadu sutonam, ngok tani mííyi-míísange aalat sutoku. Ngo Takamem Botteyalumna Shédíme yidgeto, delokke agínpe turyarna bím yitge-rínggela kumsuto. Bí agínpe ruutum bomyaryé, delokke bík yétade yénam tabungke duuyé.

³⁵ Bí tani among sokke angun-abéem atí kopeteng kaamang; teyong among telokke kotoki kídíe, delokke tani among sokke ami takamde bíkke ruutumko aralo duudung. Sékokom bíkke míínamem lupé sulamang, demangkom bíkke agérem sékokom íngkílamang.

³⁶ “Edílo ngokke tanipe mííyi-míísang kénname aalat tokudí, ngokke bottena amínem, ngok roja yétaem, delokke ngok roja among lokke jénam-remnamem ngokkelo bilat sutoku. Ngok ruutum kídíe, delokke kénna ami kídíe, ngom airupe kaarík sutoku, delokke ngok roja agérem kerangkem pemílo míngge yanampe ngome ruutem líktoku.

³⁷ “Delokke supak ngo, Nebukadnejjar, Teyong among lokke Rojaem yidgedung, arope mínggedung, delokke bík angun-abéna agérem botterupe yitgedung. Ingkoko bí idudí, de arolok lang mííjinam lok idung, delokke adumpe míísuna sékomemte bí mínggíp lamodungku.”