Ạsuor 8 - Ạḍinya Iigbia

Eegu Ẹnaan rꞌeghuan oye

¹ Ọmoogh-we, Ọmoogh-we phọ ayoor, aḍigbogh aḍien phọ ạna eepaany ni oomo aḅirini phọ. Igbogh phọ ạna esi ni ạnyu ạke.

² Nạ kụ ụto bọ ni mọ ạnmuny rꞌạbuphe rọmaam ghan bọ mạmaam ọmoor sụor oghueniom nyịna. Ịyaar nyịna ị́kan. Nạ rakikima ghan bụlo ọlhogh nyịna ḍien.

³ Mem lọ mị aphogh ạnyu ạke phọ ọpo nạ ạlhem bọ, ạmiin ụnwanyu phọ rꞌạraanaan phọ ịpe nạ asereghi bọ riisi kịrokiro phọ ạbidi,

⁴ oye phọ pọ eeghe kụ nạ aseerian bọ nyọdi ologhi, oopho phọ oye kụ ọdi nạ rapogh ghan!

⁵ Ghạlamo ịduon ni nạ ạlhem nyọdi asooromi ẹphurukpu apuemi rụukpaany phọ ạna bịn, nạ azu nyọdi eghoony eegu rꞌeghuan.

⁶ Nạ ạdaami nyọdi mọ aphogh ghan oomo ạraraar phọ nạ ạlhem bọ. Nạ ạḅogh oomo ạraraar ạlogh ḍịghaagh ọdi,

⁷ oomo iyool-ịga rꞌạsinam mọ, rꞌilhom ịnam mọ kẹn,

⁸ ịnun okuaḍio phọ rꞌina ọphiiny phọ, rꞌoomo ịpe edi bọ ologhi ạrumuum mọ.

⁹ Ọmoogh-we, Ọmoogh-we phọ ayoor, igbogh phọ ạna eepaany ni oomo aḅirini phọ.