Апостол Паул тхылъэу Тит фитхыгъэр 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул, Тхьэм сыфэлажьэ, Исус Христос сыриапостол. Апостол сызкӀэхъугъэр Тхьэм къыхихыгъэ цӀыфхэм шӀошъхъуныгъэ яӀэ згъэхъунэуи, Тхьэм игъогу ехьылӀэгъэ шъыпкъэр язгъэшӀэнэуи ары.

² Аущтэу мыкӀодыжьын щыӀэныгъэ зэрагъотыщтым щыгугъыхэу, пэплъэщтых. А мыкӀодыжьын щыӀэныгъэр цӀыфхэм аритынэу шъыпкъагъэ зиӀэ Тхьэм лъэхъанхэм апэ цӀыфхэр къыгъэгугъагъэх.

³ КъэбарышӀоу згъэӀурэмкӀэ Тхьэм икъэбар игъо дэдэм нафэ ышӀыгъ. ТымыкӀодэу тыкъэзгъэнэжьырэ Тхьэм а къэбарышӀур спшъэ къырилъхьи, згъэӀунэу унашъо къысфишӀыгъ.

⁴ О, Тит, мы тхылъыр къыпфэсэтхы. А зы шӀошъхъуныгъэр зэрэтиӀэм пае, сэ скъо шъыпкъэм фэдэ ухъугъ. Тхьэу Ты лъапӀэмрэ Зиусхьан Исус Христосэу тымыкӀодэу тыкъэзгъэнэжьырэмрэ анэшӀу къыпщарэфи, гупсэф къыуарэт.

Чылыс зэӀукӀэм фэлэжьэрэ тхьэматэхэм яшэн зыфэдэн фаер

⁵ Крит хыгъэхъунэм укъызкӀэзгъэнагъэр Ӏофхэу къэнагъэхэр ыкӀэм нэбгъэсынхэуи сэ унашъо къызэрэпфэсшӀыгъэм фэдэу, тыдрэ къали нахьыжъхэр чылыс зэӀукӀэхэм афэбгъэнэфэнхэуи ары.

⁶ Нахьыжъыр зыми зэригъэмысэн зыбгъодэмылъэу, зы шъуз нахь зимыӀэ лӀын фае. Илъфыгъэхэми шӀошъхъуныгъэ яӀэн фае. Ахэр мыхъо-мышӀэ псэукӀэмкӀи мыдэӀоныгъэмкӀи мысэхэу хъухэ хъущтэп.

⁷ Тхьэм иӀоф чылыс зэӀукӀэм иӀэшъхьэтет ыпшъэ зэрилъым пае, зыми зэригъэмысэн зыбгъодэмылъ лӀын фае: къаигъэу, псынкӀэу губжырэр хъущтэп, ешъуакӀоуи, лӀы Ӏэлэуи, мылъкум кӀэхъопсэуи щыт хъущтэп.

⁸ Ау хьакӀэхэр зыгъэлъапӀэу, шӀур шӀу зылъэгъоу, гулъытэ зиӀэу, зафэу, гукъэбзагъэ зиӀэу, щэӀагъэ зиӀэ лӀын фае.

⁹ ЕтӀанэ Ӏоф шъыпкъэхэу шъодгъэшӀагъэхэм пытэу атетын фае. Аущтэу тишӀошъхъуныгъэ тызфигъэсэрэ Ӏофхэу тызщыгугъушъущтхэмкӀэ цӀыфхэр ыгъэгушхонхэ ылъэкӀыщт, а Ӏофхэм апэуцухэрэми агуригъэӀон ылъэкӀыщт.

¹⁰ Сыда пӀомэ, цӀыф мыдаӀоу бэ щыӀэр, зэкӀэми апэу сунэт ашӀыгъэхэм ащыщхэр ары. ПкӀэ зимыӀэ гущыӀэхэр къаӀо зэпыт, нэмыкӀ цӀыфхэри дахьыхых.

¹¹ Ахэмэ ажэ ябгъэубытын фае, сыда пӀомэ, емыкӀу шӀыкӀэкӀэ ахъщэ къагъэхъэным пае, цӀыфхэр зыфамыгъэсэпхъэ Ӏофхэм афагъасэхэзэ, унагъохэр зэрэунагъохэу агъэунэхъух.

¹² Ахэмэ ащыщэу тхакӀо горэм къыӀуагъ: «Крит цӀыфхэм пцӀы аус зэпыт, хьэкӀэ-къокӀэ бзаджэхэм афэдэх, фэмыфых, бэшхых».

¹³ А тхакӀом ишыхьат шъыпкъэ. Арышъ, пхъашэу агурыгъаӀу, зишӀуагъэ къакӀорэ шӀошъхъуныгъэ яӀэ хъуным паий,

¹⁴ джуртхэм ятхыдэжъхэми, шъыпкъэм зыкӀыб фэзгъэзагъэхэм яунашъохэми анаӀэ тырамыдзэнэу.

¹⁵ Зыгу къабзэхэмкӀэ зэкӀэ къабзэ мэхъу, ау зыгу мыкъабзэхэмкӀи, ТхьэмкӀэ шӀошъхъуныгъэ зимыӀэхэмкӀи къабзэ зи щыӀэп. Сыда пӀомэ, яакъыли зэщыкъуагъэ, агухэми шӀури ери зэхадзыжьын алъэкӀырэп.

¹⁶ Тхьэр ашӀэу аӀо, ары шъхьакӀэ Ӏофхэу ашӀэхэрэмкӀэ Тхьэр зэрамышӀэрэр нафэу къагъэлъагъо. Ахэр гущыкӀыгъо цӀыфых, мыдаӀох, зыкӀи яшӀуагъэ къакӀорэп.