Рим 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул, Исус Христос сыфэлажьэ. Христос иапостол сыхъунэу Тхьэр къысаджи, ежь дэжь къикӀырэ къэбарышӀур згъэӀунэу сигъэнэфагъ.

² А къэбарышӀур ипегъымбархэм ажэ къыдэкӀэу Тхьэм цӀыфхэр ыгъэгугъагъэх, игущыӀэ тхыгъэ лъапӀэхэм зэрарытым фэдэу.

³ А къэбарышӀур ы Къо ехьылӀагъ. Ар цӀыфэу къэхъугъ, пачъыхьэ Даутэ къытекӀыгъэ цӀыфхэм ащыщыгъ.

⁴ Исус лӀагъэхэм къызэрахэтэджыкӀыжьыгъэмкӀэ Тхьэм ы Псэ ЛъапӀэ ар Тхьэм зэры Къор лъэкӀыкӀэ къыгъэнэфагъ. Ежьыр ары Исус Христосэу ти Зиусхьаныр.

⁵ Христос иӀэмыркӀэ Тхьэм ынэшӀу сэ къысщифи, Христос ыцӀэкӀэ лъэпкъ пстэуми шӀошъхъуныгъэ яӀэ згъэхъоу, ежь езгъэдэӀунхэм пае, апостолэу сигъэнэфагъ.

⁶ Шъори ахэмэ шъуащыщ, Исус Христос шъори ибынхэм ащыщ шъухъунэу къышъоджагъ.

⁷ Шъо, Рим къэлэшхом дэсхэу, Тхьэм шӀу ылъэгъухэу, ицӀыф лъапӀэхэм ащыщ хъунхэу къызэджагъэхэм, мы тхылъыр къышъуфэсэтхы. Тхьэу тя Тэ лъапӀэмрэ Зиусхьан Исус Христосрэ анэшӀу къышъущарэфи, гупсэф къышъуарэт.

Паул Рим къэлэшхом кӀонэу зэрэфэягъэр

⁸ Ыпэ рапшӀэу шъуишӀошъхъуныгъэ икъэбар дунаим тыдэкӀи цӀыфхэм зэрэщагъэӀурэм пае, Исус Христос ыцӀэкӀэ пстэуми шъощ пае Тхьэм щытхъу фэсэшӀы,

⁹ сыда пӀомэ, Тхьэм ы Къо ехьылӀэгъэ къэбарышӀур згъэӀузэ, сыгу етыгъэу сызфэлажьэрэ Тхьэр сишыхьат. Ащ селъэӀу зыхъукӀэ, сыдигъуи зэпымыоу шъуигугъу зэрэсшӀырэмкӀи ар сишыхьат.

¹⁰ Тхьэм ыӀомэ, шъуадэжь зэгорэм сыкъэкӀоныр къыздэхъункӀэ селъэӀу.

¹¹ Сыда пӀомэ, Тхьэм ы Псэ ЛъапӀэ дэжь къикӀэу, шъугухэр зыгъэпытэн шӀугъэ шъозгъэгъотыным пае, лъэшэу шъуслъэгъу сшӀоигъу.

¹² А зы шӀошъхъуныгъэу тиӀэмкӀэ тызэрэгъэгушхоныр ары зыфасӀорэр.

¹³ Шъуадэжь сыкъэкӀонэу бэрэ сыгу зэрэхэлъыгъэр шъушӀэн фае, сшыхэр, ау джы нэсыфэ пэрыохъу горэ къысфэхъущтыгъ. НэмыкӀ лъэпкъхэм адэжь шӀугъэ къызхэкӀырэ Ӏоф зэрэщысшӀагъэм фэдэу, шъуадэжьи Ӏоф щысшӀэнэу сыфай.

¹⁴ Алыджхэми нэмыкӀ лъэпкъхэми, акъылышӀу зиӀэхэми, зимыӀэхэми пшъэрылъ афысиӀ.

¹⁵ Джары шъо Рим къэлэшхом дэсхэм къэбарышӀур шъозгъэӀу лъэшэу зыкӀысшӀоигъор.

КъэбарышӀум лъэкӀэу хэлъыр

¹⁶ Христос ехьылӀэгъэ къэбарышӀум сытеукӀытыхьэрэп, сыда пӀомэ, къэбарышӀур ары Тхьэм илъэкӀэу хэти шӀошъхъуныгъэ зиӀэр мыкӀодэу къэзгъэнэжьырэр, апэу джуртыр, етӀанэ мыджуртыр.

¹⁷ Сыда пӀомэ, Тхьэм ежь дэжькӀэ цӀыфым шъыпкъагъэ иӀэу зэрилъытэрэ гъогур къэбарышӀум къегъэнафэ. Ыпэ къыщегъэжьагъэу ыкӀэ нэс а Ӏофыр зэрэхъурэр шӀошъхъуныгъэм игъогукӀэ ары, Тхьэм игущыӀэ тхыгъэхэм зэрарытым фэдэу, «ШӀошъхъуныгъэ зэриӀэм пае, Тхьэм дэжькӀэ шъыпкъагъэ зиӀэр псэущт».

ЦӀыф пстэуми Тхьэм дэжькӀэ лажьэу яӀэр

¹⁸ Тхьэм шӀолӀыкӀ фырямыӀэу цӀыфхэр зэрэпсэухэрэм паий, ябзэджэгъэ пстэуми апаий игубжэу уашъом къехырэр Тхьэм къегъэнафэ, сыда пӀомэ, ябзэджагъэкӀэ шъыпкъэр аулъэгу.

¹⁹ Тхьэм ехьылӀагъэу цӀыфмэ ашӀэшъущтыр ахэмкӀэ нафэ, Тхьэм ар къафигъэнэфагъ.

²⁰ Сыда пӀомэ, Тхьэм дунаир къызигъэхъугъэм щегъэжьагъэу, ежь ищытыкӀэ-псэукӀэу амылъэгъушъурэм Тхьэм къыгъэхъугъэхэмкӀэ цӀыфхэм нафэу гу лъатэн алъэкӀы. ИщытыкӀэ-псэукӀэ амылъэгъушъоу зыфасӀорэр илъэкӀышхоу мыкӀодыжьыщтри ары, ежь зэрэ Тхьэри ары. Арышъ, цӀыфхэм зызэрагъэхыен зи щыӀэп.

²¹ Тхьэр ашӀагъэ пэтми, ащ фэшъуашэу лъытэныгъи щытхъушхуи фашӀыгъэп. Ау ягупшысэхэр хьаулые хъугъэх, агухэу зэхэшӀыкӀ зимыӀэхэри ушӀункӀыгъэх.

²² АкъылышӀу яӀэу зашӀошӀыжьэу, зэхэшӀыкӀ ямыӀэ хъугъэх.

²³ Щытхъушхо зиӀэ Тхьэу мыкӀодыжьыщтыр агъэлъапӀэщтыгъэп. Тхьэм ычӀыпӀэ рагъэуцо ежьхэм аӀэкӀэ ашӀыгъэ сурэтхэу кӀодыжьыщт цӀыфхэм, бзыухэм, лъэкъуиплӀыкӀэ зекӀохэрэм, ныбэкӀэ цуахъохэрэм афэдэхэр. Ахэр тхьэпапкӀэу агъэлъэпӀагъэх.

²⁴ Арышъ, ахэмэ агухэр Ӏоф мыхъунхэм акӀэхъопсхэу, апкъыхэмкӀэ мыхъун зэрашӀэжьынэу, шӀоим хэтхэу Тхьэм къыгъэнагъэх.

²⁵ Тхьэм ишъыпкъэ ычӀыпӀэ пцӀыр рагъэуцуагъ. Тхьэу зэкӀэ къэзгъэхъугъэр амыгъэлъапӀэу, ащ фэмылажьэхэу, Тхьэм къыгъэхъугъэхэр агъэлъэпӀагъэх, ахэми афэлэжьагъэх. Ежь Тхьэм мыкӀодыжьын щытхъушхор ий. Амин.

²⁶ Арышъ, агу зыкӀэхъопсырэ Ӏоф мыхъунхэм апылъынхэу Тхьэм ахэр къыгъэнагъэх. Ябзылъфыгъэхэри зэрэпсэунхэ фаем текӀыхи, зым адрэм мыхъун ришӀэжьыгъ.

²⁷ Ащ фэдэу хъулъфыгъэхэри зыфэдэнхэ фаем текӀыхи, яшъузхэм якӀолӀэжьынхэр ханэжьи, зы лӀыр адрэ лӀым кӀэхъопс хъугъэ. Аущтэу хъулъфыгъэхэми мыхъун зэрашӀэжьи, апкъыхэмкӀэ язекӀокӀэ емыкӀу ифэшъуашэ агъотыжьыгъ.

²⁸ Ащ нэмыкӀэу, Тхьэр зыфэдэр ашӀэнэу зэрамыдагъэм пае, емыкӀу Ӏофхэр ашӀэнхэу акъыл къуанчэр яӀэу Тхьэм къыгъэнагъэх.

²⁹ Мышъыпкъэ пстэури, зинэ пстэури, тхьагъэпцӀыгъэ пстэури, нэйпсыягъэ пстэури, бзэджэгъэ пстэури агухэм арыз хъугъэ. Шъугъонри, цӀыф укӀынри, зэщыхьанри, пцӀы усынри, уджэгъунри агухэм арылъ зэпытых.

³⁰ Ахэр бзэгухьэх, цӀыфхэм ӀаекӀэ атегущыӀэх, Тхьэр ауджэгъу, цӀыфхэм агу хагъэкӀы, зыщэтхъужьых, загъэпагэ, бзэджагъэхэр къаугупшысых, ятэ-янэхэми афэӀорышӀэхэрэп.

³¹ ЗэхэшӀыкӀ яӀэп, ягущыӀэхэр агъэцакӀэхэрэп, гуфэбагъи ахэлъэп, зэшӀужьынхэри гукӀэгъури зыфэдэхэр ашӀэрэп.

³² А цӀыфхэм Тхьэм иунэшъо зафэ ашӀэ, ащ фэдэ Ӏофхэр зышӀэхэрэм укӀ зэряфэшъуашэри. Ау щытми, ежьхэм ащ фэдэхэр зэрашӀэхэрэм имызакъоу, а Ӏофхэр зышӀэхэри адэх.