Маттэ 28 - Къэбарышӏур (Инджыл)

ЯТӀОКӀЫРЭ ИНЭРЭШЪХЬ Исус лӀагъэхэм къызэрахэтэджыкӀыжьыгъэр

¹ Шэмбэтыр блэкӀыгъэу, тхьэмафэм иапэрэ мафэм нэф къызэшъым, Магдалэ щыщ Мерэмрэ адрэ Мерэмрэ къэунэм еплъынхэу кӀуагъэх.

² ОшӀэ-дэмышӀэу чӀыгур лъэшэу къэсысыгъ, сыда пӀомэ, Зиусхьаным имэлэӀич уашъом къехи, къэунэм Ӏухьи, мыжъошхор ӀуигъэукӀорэикӀи, ащ тетӀысхьагъ.

³ Ащ итеплъэ пчыкӀэм фэдэу ищыгъынхэри осым фэдэу фыжьыбзагъэх.

⁴ Къэрэгъулэхэр ащ зэрэщыщынэхэрэм пае къэкӀэзэзыгъэх, хьадашъуи яӀэ хъугъэ.

⁵ – Шъумыщын, – ариӀуагъ мэлэӀичым бзылъфыгъэмэ. – Исусэу къащым тыраӀулӀагъэм шъузэрэлъыхъурэр сэшӀэ.

⁶ Ар мыщ щыӀэжьэп. ЗэриӀуагъэм тетэу, ар лӀагъэхэм къахэтэджыкӀыжьыгъ. ШъуӀухьи, шъуеплъ Зиусхьаныр зыдэщылъыгъэ чӀыпӀэм.

⁷ Джы псынкӀэу шъукӀуи, игъогу рыкӀохэрэм яшъуӀу: «Исус лӀагъэхэм къахэтэджыкӀыжьыгъ. Шъо шъуапэ ар Галилей кӀощт. Ащ дэжьым ар щышъулъэгъужьыщт». Джары, къэбарыр сэ шъосӀуагъэ.

⁸ Бзылъфыгъэхэр къэунэм ӀукӀыжьхи, агучӀэ изыгъэу, ау гушӀогъошхуи яӀэу, макъэ арагъэӀунэу Исус игъогу рыкӀохэрэм адэжь ечъэжьагъэх.

⁹ Игъогу рыкӀохэрэм макъэ арагъэӀунэу а бзылъфыгъэхэр чъэхэзэ, ошӀэ-дэмышӀэу Исус къаӀукӀи, къариӀуагъ: – Шъопсэу. Мыдрэхэр Исус ечъалӀэхи, ыпашъхьэ лъэгонджэмышъхьэкӀэ итӀысхьэхи, ылъакъохэр аубытыгъ.

¹⁰ Джащыгъум Исус къариӀуагъ: – Шъумыщын. ШъукӀуи, сшыхэр Галилей кӀонхэу макъэ яжъугъэӀу. Ащ сэри сыщалъэгъущт.

Дин пэщэшхохэм къэрэгъулэхэр къуалъхьэкӀэ зэращэфыгъэхэр

¹¹ Бзылъфыгъэхэр кӀохэ зэхъум, къэрэгъулэхэм ащыщхэр къалэу Ерусалим дахьэхи, дин пэщэшхохэм адэжь кӀохи, зэкӀэ хъугъэр араӀотагъ.

¹² Дин пэщэшхохэр, нахьыжъхэр ягъусэхэу, зэрэугъоихи, зэупчӀыжьыгъэх. Ахъщабэ къэрэгъулэхэм арати,

¹³ араӀуагъ: – «Чэщым тэ тызыхэчъыем, Исус игъогу рыкӀохэрэр къакӀохи, ихьадэ атыгъугъ» шъуӀон фае.

¹⁴ А къэбарыр Ӏэшъхьэтетым зызэхихыкӀэ, дгъэсамбырынышъ, шъори зи къышъуимыӀонэу тшӀыщт.

¹⁵ Аущтэу къэрэгъулэхэм ахъщэр ашти, араӀуагъэм тетэу зекӀуагъэх. Непэ къынэсыжьэу а къэбарыр джуртмэ зэрахьэу ахэлъ.

Исус игъогу рыкӀохэрэм Ӏофэу ашӀэнэу апшъэ рилъхьагъэр

¹⁶ Ащ нэужым Исус игъогу рыкӀорэ нэбгырэ пшӀыкӀузыр Галилей кӀохи, ежь зыфиӀогъэгъэ Ӏуашъхьэм дэкӀоягъэх.

¹⁷ ЕтӀанэ Исус залъэгъум, лъэгонджэмышъхьэкӀэ ыпашъхьэ итӀысхьагъэх; ау зышӀошъ мыхъурэ заулэ ахэмэ ахэтыгъ.

¹⁸ Исус игъогу рыкӀохэрэм къабгъодахьи, ариӀуагъ: – Уашъоми чӀылъэми тетыгъошхор зэкӀэ щысиӀэу сӀэ илъ.

¹⁹ Арышъ, шъукӀуи, лъэпкъ пстэури сигъогу къытежъугъахь. Ты лъапӀэми, ы Къуи, Тхьэм ы Псэ ЛъапӀи ацӀэкӀэ шъуумэхъыхи,

²⁰ унашъохэу шъосӀуагъэхэр зэкӀэ агъэцэкӀэнхэу яшъуӀу. ШъыпкъэмкӀэ, дунаим икӀэух нэс сэ ренэу сышъуигъусэщт. Амин.