Марк 9 - Къэбарышӏур (Инджыл)

ЯБГЪОНЭРЭШЪХЬ

¹ – Шъыпкъэр шъосэӀо, – ариӀуагъ Исус ахэмэ, – Тхьэм и Тетыгъошхо лъэкӀышхокӀэ къэкӀуагъэу алъэгъуфэ, мыщ дэжьым щыт цӀыфхэм ащыщхэу заулэм лӀэныгъэр алъэгъущтэп.

Исус итеплъэ зэрэзэрихъокӀыгъэр

² Мэфих зытешӀэм, Исус Петри, Якъуби, Иуани зэригъэгъусэхи, Ӏошъхьэ лъагэ горэм язакъоу дищэягъэх. Джащыгъум ахэмэ апашъхьэ Исус итеплъэ щызэрихъокӀыгъ.

³ Дунаим тет гыкӀакӀо горэм щыгъынхэр фыжьэу зэригыкӀышъущтхэм нахьи, Исус ищыгъынхэр нахь фыжьыбзэу, къэлыдэу хъугъэх.

⁴ Ащ дэжьым пегъымбархэу Илясрэ Мусэрэ ахэмэ къафэлъэгъуагъэх, ахэри Исус къыдэгущыӀэщтыгъэх.

⁵ – Рабби, дэгъу тэ мыщ тыщыӀэныр – риӀуагъ Петрэ Исус. – Чэлищ щыдгъэӀэн, ощ пае зы, Мусэ паий зы, Иляс паий зы.

⁶ Петрэ ыӀони ышӀэщтыгъэп; сыда пӀомэ, ахэр щтагъэхэти ары.

⁷ Джащыгъум ошъуапщэ къашъхьэщыхьагъ. Ошъуапщэм макъэ горэ къыхэӀукӀыгъ: – Мары сэ шӀу слъэгъурэ с Къо кӀасэр. Ащ ыӀорэм шъуедэӀу.

⁸ ОшӀэ-дэмышӀэу зызаплъыхьэм, ахэмэ ягъусэу Исус нэмыкӀ зи алъэгъужьыгъэп.

⁹ Ахэр Ӏуашъхьэм къехыжьхэзэ, ежь ЦӀыф Лъэпкъым ы Къо лӀагъэхэм къахэтэджыкӀыжьыфэ, алъэгъугъэр зыми рамыӀотэжьынэу Исус унашъо афишӀыгъ.

¹⁰ А гущыӀэхэр агу раубытагъэх, «ЛӀагъэхэм къахэтэджыкӀыжьынэу Исус зэриӀуагъэм къыригъэкӀыгъэр сыда?» аӀозэ, зэупчӀыжьыгъэх.

¹¹ Ахэр Исус къеупчӀыгъэх: – Тэурат егъэджэкӀо пащэхэм ыпэ рапшӀэу пегъымбар Иляс къэкӀон фаеу сыда зыкӀаӀорэр?

¹² – Шъыпкъэ, ыпэ рапшӀэу Иляс къэкӀонышъ, Ӏоф пстэури тэрэзэу зэтыригъэуцожьын фае, – ариӀожьыгъ Исус, – ау Тхьэм игущыӀэ тхыгъэхэм зэрарытым фэдэу, ЦӀыф Лъэпкъым ы Къо къиныбэ ыщэчын фаеу къыпыщылъ, цӀыфхэми зэрамыпэсын фае.

¹³ Ау сэ шъосэӀо, Иляс къэкӀогъах, Ӏоф бзэджагъэу рашӀэнхэу зыфэягъэхэри рашӀагъэх, ащ ехьылӀагъэу Тхьэм игущыӀэ тхыгъэхэм зэрарытым фэдэу.

Исус джынапцӀэ зыхэс кӀалэ горэ зэригъэхъужьыгъэр

¹⁴ Исусрэ игъусищрэ адрэ нэбгырэхэу игъогу рыкӀохэрэм адэжь къызагъэзэжьым, цӀыф купышхом ахэр къауцухьагъэхэу, Тэурат егъэджэкӀо пэщэ куп къянэкъокъоу алъэгъугъ.

¹⁵ Исус къызалъэгъум, зэкӀэ цӀыф купышхом агъэшӀагъуи, къыбгъодэлъадэхи, шӀуфэс къырахыгъ.

¹⁶ – Сыдым ехьылӀагъэу мыхэмэ шъуянэкъокъура? – яупчӀыгъ Исус игъогу рыкӀохэрэм.

¹⁷ ЦӀыф купышхом хэт горэм къыриӀуагъ: – Дин гъэсакӀу, сикӀалэ джынапцӀэу бзако зышӀырэр хэсти, къыпфэсщагъ.

¹⁸ ДжынапцӀэм кӀалэр зэкӀиубытэ къэс, чӀыгум къытыредзэ, Ӏупс тхъурбэр къыӀуифэу, ыцэхэр зэригъэшхыхэу зэтекъэ. О уигъогу рыкӀохэрэм джынапцӀэр хафынэу сялъэӀугъ, ау ахэмэ хафын алъэкӀыгъэп.

¹⁹ – Е-о-ой, шъо, джырэ цӀыфхэу шӀошъхъуныгъэ зимыӀэхэр, – ариӀожьыгъ Исус, – сыд фэдизрэ сышъухэтын фая? Сыд фэдизрэ шъусщыӀэн фая? Къысфашъущ а кӀалэр.

²⁰ Ахэмэ кӀалэр Исус къыфащагъ. Ау джынапцӀэм Исус зэрилъэгъоу, кӀалэр къыгъэкӀэзэзыгъ. Ар чӀыгум къытефи, Ӏупс тхъурбэр къыӀуифэу, зигъэукӀорэеу ыублагъ.

²¹ – Сыд фэдиз хъугъа мыщ фэдэу зыщытыр? – еупчӀыгъ Исус кӀалэм ятэ. – ИцӀыкӀугъэ къыщегъэжьагъэу аущтэу мэхъу, – къыӀожьыгъ тым.

²² – ДжынапцӀэм ар ыгъэкӀодыным пае, машӀоми псыми бэрэ ахидзэщтыгъ. Зыгорэ пшӀэн плъэкӀыщтмэ, гукӀэгъу къытфэшӀи, къыддэӀэпыӀ.

²³ – «Зыгорэ пшӀэн плъэкӀыщтмэ» оӀо, – риӀуагъ Исус а лӀым. – ШӀошъхъуныгъэ зиӀэм сыдрэ Ӏофи ышӀэн елъэкӀы.

²⁴ Ардэдэм кӀалэм ятэ къэкууагъ: – Сэ сшӀошъ мэхъу, сишӀошъхъуныгъэ хэзгъэхъонэу къыздэӀэпыӀ, тхьэматэ.

²⁵ Исус цӀыф купышхо къэзэрэугъоигъэу зелъэгъум, джынэпцӀэ Ӏаем егыий, риӀуагъ: – О, цӀыфхэр бзакоу, дэгоу зышӀырэ джынапцӀ, унашъо къыпфэсэшӀы, мы кӀалэм хэкӀыжьи, ныбжьи укъыхэмыхьажь.

²⁶ ДжынэпцӀэ Ӏаер къыхэкуукӀи, кӀалэр лъэшэу къыгъэкӀэзэзи, хэкӀыжьыгъ. КӀалэр хьадэм фэдэ хъугъэ. Арыти, а цӀыфхэм ащыщыбэхэм «ар лӀагъэ» аӀуагъ.

²⁷ Ау Исус кӀалэм ыӀэ къыубыти, ылъакъохэм атыригъэуцуагъ, кӀалэри къэтэджыжьыгъ.

²⁸ Ащ ыуж Исус унэ горэм ихьагъ. Игъогу рыкӀохэрэр язакъоу къызынэжьхэм, къеупчӀыгъэх: – А джынапцӀэр тэ хэтфын зыкӀэтымылъэкӀыгъэр сыда?

²⁹ – Мыщ фэдэ лъэпкъыр тхьэлъэӀумрэ нэкӀымрэ афэшъхьафкӀэ цӀыфым хэпфышъущтэп, – ариӀожьыгъ Исус.

Ежь зэраукӀыщтри лӀагъэхэм къызэрахэтэджыкӀыжьыщтри ятӀонэрэу Исус къызэриӀуагъэр

³⁰ Исусрэ игъогу рыкӀохэрэмрэ а чӀыпӀэм икӀыхи, Галилей хэкум пхырыкӀыщтыгъэх. Ахэр зыдэщыӀэхэр Исус зыми къышӀэнэу фэягъэп,

³¹ сыда пӀомэ, игъогу рыкӀохэрэм Тхьэм игущыӀэхэр аригъашӀэщтыгъ. Ахэмэ моущтэу ариӀуагъ: – ЦӀыф Лъэпкъым ы Къо цӀыфхэм аубытынышъ, ахэмэ ар аукӀыщт, ау заукӀ ужым мэфищ тешӀагъэу лӀагъэхэм къахэтэджыкӀыжьыщт.

³² Ау игъогу рыкӀохэрэм а гущыӀэхэм къарыкӀырэр къагурыӀуагъэп, Исус къеупчӀынхэкӀи щынэщтыгъэх.

Хэта анахь ин дэдэр?

³³ Къалэу Капернаум къэкӀожьыгъэх. Унэм зехьэхэм, Исус игъогу рыкӀохэрэм яупчӀыгъ: – Гъогум шъузытетым, сыда шъузытегущыӀагъэр?

³⁴ Ау ахэмэ заушъэфыгъ, сыда пӀомэ, ахэр гъогум зытетхэм, «Тэ тщыщэу хэта анахь ин дэдэр» аӀоти, зэнэкъокъущтыгъэх.

³⁵ Исус тӀыси, игъогу рыкӀорэ нэбгырэ пшӀыкӀутӀум къяджи, ариӀуагъ: – Зыгорэ апэ итынэу фаемэ, ар ауж дэдэ хъун фае, пстэуми Ӏофтабгэуи афэхъун фае.

³⁶ Сабый горэм ыӀэ къыубыти, агузэгу ригъэуцуи, ӀаплӀ рищэкӀи, ариӀуагъ:

³⁷ – Хэти мыщ фэдэ сабыир сэ сцӀэкӀэ къезгъэблагъэрэм сэ сыригъэблэгъагъэу мэхъу; хэти сэ сезгъэблагъэрэми сэ сизакъоу арэп ригъэблагъэрэр, сэ сыкъэзгъэкӀуагъэри ары.

Къытпэмыуцурэр тигъус

³⁸ – Дин гъэсакӀу, лӀы горэм о пцӀэкӀэ джынапцӀэхэр цӀыфхэм ахифхэу тлъэгъугъэ, – къыриӀуагъ Иуан Исус. – Ар тэ зэрэтщымыщым пае зэтетӀэжьэнэу тыпылъыгъ.

³⁹ – ЗэтешъумыӀажь ар, – къыӀуагъ Исус, – сыда пӀомэ, сэ сцӀэкӀэ Ӏофышхо гъэшӀэгъон зышӀэрэр, ащ лъыпытэу ӀаекӀэ къыстегущыӀэн ылъэкӀыщтэп.

⁴⁰ Сыда пӀомэ, тэ къытпэмыуцурэр тигъусэшъ ары.

⁴¹ Шъыпкъэр шъосэӀо, Христос игъогу шъузэрэрыкӀорэм пае, псы шъуалъэ шъуезгъашъорэм ифэшъошэ ӀахьышӀу шӀокӀодыщтэп.

ЦӀыфхэм псэкӀод ашӀэнэу дэзыхьыхырэ Ӏофхэр

⁴² – Мы цӀыкӀухэм ащыщэу сэркӀэ шӀошъхъуныгъэ зиӀэм псэкӀод ышӀэнэу хэти дэзыхьыхырэм ыпшъэ мыжъошъхьал рашӀэу, хым хадзагъэмэ, ежьыркӀэ нахьышӀущтыгъ.

^43-44 О пӀэ псэкӀод пшӀэнэу удихьыхмэ, пыупкӀыжь. ПӀитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым укӀоным нахьи, уӀащэу мыкӀодыжьын щыӀэныгъэ бгъотыныр оркӀэ нахьышӀу.

^45-46 О плъакъуи псэкӀод пшӀэнэу удихьыхмэ, пыупкӀыжь. ПлъэкъуитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым упадзэным нахьи, улъащэу мыкӀодыжьын щыӀэныгъэ бгъотыныр оркӀэ нахьышӀу.

^47-48 Ащ фэдэуи, о унэ псэкӀод пшӀэнэу удихьыхмэ, къитхъыжь. УнитӀу псаоу джэхьнэмэу цӀыфылыр зышхыщтэу, хьамлыухэр зыщымылӀэжьыщтэу, зимашӀуи мыкӀосэжьыщтым упадзэным нахьи, зы нэ нахь уимыӀэми, Тхьэм и Тетыгъошхо ыӀэчӀэгъ учӀэхьаныр оркӀэ нахьышӀу.

⁴⁹ Тхьэм хэтрэ цӀыфи машӀокӀэ ыщыущт, сыдрэ къурмэныпхъэри щыгъукӀэ ащыущт.

⁵⁰ – Щыгъур дэгъу. Ау щыгъум ищыугъэ хэкӀымэ, сыдэущтэу ар шъущыущта? Щыугъэ зыхэжъугъэлъ, шъузэгурыӀоуи шъузэдэпсэу.