Марк 8 - Къэбарышӏур (Инджыл)

ЯЕНЭРЭШЪХЬ Исус нэбгырэ миниплӀ зэригъэшхагъэр

¹ А мафэхэм джыри зэ цӀыф купышхо къэзэрэугъоигъ Ахэмэ ашхын зи яӀагъэпти, Исус игъогу рыкӀохэрэм къяджи, ариӀуагъ:

² – ЦӀыфхэм сыгу ягъу, сыда пӀомэ, мэфищ хъугъэу сигъусэх, ашхыни яӀэп.

³ МэлакӀэ лӀэхэу цӀыфхэр стӀупщыжьхэмэ, гъогум щызэхэфэщтых, сыда пӀомэ, чыжьэу къикӀыгъэхэри ахэмэ ахэтых.

⁴ – Мы шъоф нэкӀым ахэмэ афикъун хьалыгъу зыгорэм тыдэ къырихын ылъэкӀына? – аӀуи, игъогу рыкӀохэрэм Исус къыраӀожьыгъ.

⁵ – Хьалыгъу тхьапша шъуиӀэр? – яупчӀыгъ Исус – Хьалыгъуибл тиӀ, – къаӀожьыгъ ахэмэ.

⁶ Джащыгъум Исус цӀыф купышхор чӀыгум етӀысэхынэу унашъо ышӀыгъ. Хьалыгъуиблыр къышти, Тхьэм щытхъу фишӀыгъ. ЕтӀанэ хьалыгъухэр зэгуичыхи, цӀыф купышхом ыпашъхьэ ралъхьанхэу игъогу рыкӀохэрэм аритыгъ. Ахэми аущтэу ашӀыгъ.

⁷ Пцэжъые цӀыкӀу заули яӀагъ. Ахэмэ апаий Исус Тхьэм щытхъу фишӀи, ахэри цӀыфмэ апашъхьэ ралъхьанхэу игъогу рыкӀохэрэм ариӀуагъ.

⁸ ЦӀыфхэр шхагъэх, загъэшхэкӀыгъ. Ащ нэужым хьалыгъу такъырхэу къялыжьыгъэхэр мэтиблымэ арызэу аугъоижьыгъэх.

⁹ Шхагъэхэр нэбгырэ миниплӀ фэдиз хъущтыгъэх. ЕтӀанэ Исус цӀыфхэр ытӀупщыжьыгъэх.

¹⁰ ЕтӀанэ игъогу рыкӀохэрэр игъусэхэу къуашъом итӀысхьи, къуаджэу Далманутэ иӀэгъо-благъо кӀуагъэ.

Нэшэнэ гъэшӀэгъон уашъом къафыригъэхынэу фарисейхэр Исус къызэрелъэӀугъэхэр

¹¹ Фарисейхэр Исус дэжь къакӀохи, гущыӀэкӀэ къеныкъокъухэу къаублагъ. Ежь агъэунэфыным пае, нэшэнэ гъэшӀэгъон горэ уашъом къафыригъэхынэу фэягъэх.

¹² Исус лъэшэу хэщэтыкӀи, къыӀуагъ: – Джырэ цӀыфхэр нэшэнэ гъэшӀэгъоным сыд пае кӀэупчӀэхэра? Шъыпкъэр шъосэӀо, Тхьэм джырэ цӀыфхэм нэшэнэ гъэшӀэгъон зи къаритыщтэп.

¹³ ЕтӀанэ Исус ахэр къыгъанэхи, къуашъом итӀысхьи, псыхъураем иадрабгъу зэпырыкӀыжьынэу ежьагъ.

Фарисейхэмрэ саддукейхэмрэ ятэджэпс

¹⁴ Исус игъогу рыкӀохэрэм икъун хьалыгъу къыздахьынэу ащыгъупшэгъагъ. Къуашъом илъэу, зы хьалыгъу закъо нэмыкӀ яӀагъэп.

¹⁵ Исус ахэмэ афигъэпытэу ариӀуагъ: – Шъуфэсакъ, фарисейхэм ятэджэпсырэ пачъыхьэ Ирод итэджэпсырэ защышъуухъум.

¹⁶ – Хьалыгъу тиӀэпышъ ары ащ зыкӀиӀорэр, – зэраӀозэ, игъогу рыкӀохэрэр а Ӏофым тегущыӀагъэх.

¹⁷ Исус ахэмэ аӀорэм гу лъити, ариӀуагъ: – Хьалыгъу зэрэшъуимыӀэм сыд пае шъутегущыӀэрэ? Джыри зи зэхэшъумышӀыкӀэу, къыжъугурымыӀоу ара? Ащ фэдизэу шъугуркъа?

¹⁸ Нэ шъуиӀэ пэтми, шъумылъэгъоу ара? ТхьакӀумэ шъуиӀэ пэтми, зэхэшъумыхэу ара?

¹⁹ Шъугу къэкӀыжьырэба, хьалыгъуитфыр цӀыф минитфым зафызэгосэчым, хьалыгъу такъырхэр матэхэм арызэу шъуугъоижьыгъэхэр зыфэдизыгъэхэр? – Мэтэ пшӀыкӀутӀу, – къыраӀожьыгъ ахэмэ.

²⁰ – Хьалыгъуиблыри цӀыф миниплӀым зафызэгосэчым, хьалыгъу такъыхэр арызэу мэтэ тхьапша шъуугъоижьыгъэр? – Мэтибл, – къыраӀожьыгъ ахэмэ.

²¹ – Джыри зи къыжъугурымыӀоу ара? – ариӀуагъ Исус ахэмэ.

Исус къуаджэу Бет-Сайдэ щыщэу лӀы нэшъу зэригъэхъужьыгъэр

²² ЕтӀанэ Исусрэ игъогу рыкӀохэрэмрэ къуаджэу Бет-Сайдэ къэкӀуагъэх. ЦӀыфхэм лӀы нэшъу горэ Исус къыфащи, ыӀэхэр тырилъхьэнхэу къелъэӀугъэх.

²³ Исус нэшъум ыӀэ ыубыти, къуаджэм дищыгъ. ЕтӀанэ нэшъум ынэхэм акӀэужъунтхи, ыӀэхэр нэшъум тырилъхьи, еупчӀыгъ: – Зыгорэ олъэгъуа?

²⁴ Нэшъум ышъхьэ къыӀэти, къыӀуагъ: – ЦӀыфхэм къакӀухьэу сэлъэгъу. Ахэр чъыгхэм афэдэх.

²⁵ ЕтӀани Исус ыӀэхэр джыри зэ нэшъум ынитӀумэ атырилъхьагъ. Ащ дэжьым лӀым тэрэзэу ылъэгъоу хъугъэ. Пстэури нафэу ылъэгъоу, ар хъужьыгъэ.

²⁶ Ащ нэужым Исус а лӀым риӀуагъ: – Къуаджэм удэмыхь, зыми зи емыӀу. ЕтӀанэ ядэжь ыгъэкӀожьыгъ.

«Оры Христосыр» Петрэ Исус зэрэриӀуагъэр

²⁷ Исусрэ игъогу рыкӀохэрэмрэ къалэу Кайсарфилипие иӀэгъо-благъо ит къуаджэхэм адэхьанхэу ежьагъэх. КӀохэзэ, Исус игъогу рыкӀохэрэм яупчӀыгъ: – ЦӀыфхэм сэ хэт сыщыщэу аӀора?

²⁸ – Зы купым о уумэхъэкӀо Иуанэу аӀо, – къыраӀожьыгъ ахэмэ. – НэмыкӀхэми о упегъымбар Илясэу аӀо. ЕтӀанэ адрэхэми о пегъымбархэм уащыщ горэу аӀо.

²⁹ – Адэ шъо, сэ хэт сыщыщэу шъуӀора? – яупчӀыгъ Исус ахэмэ. – Оры Христосыр, – къыриӀожьыгъ Петрэ Исус.

³⁰ Джащыгъум ар зыми рамыӀотэжьынэу Исус ахэмэ афигъэпытагъ.

Ежь зэраукӀыщтри лӀагъэхэм къызэрахэтэджыкӀыжьыщтри Исус къызэриӀуагъэр

³¹ Джащыгъум Исус игъогу рыкӀохэрэм мыхэр аригъашӀэу ыублагъ: – ЦӀыф Лъэпкъым ы Къо къиныбэ ыщэчын фаеу къыпыщылъ. Нахьыжъхэми, дин пэщэшхохэми, Тэурат егъэджэкӀо пащэхэми ежь зэрамыпэсэу аукӀын фае, мэфищ нэужми лӀагъэхэм къахэтэджыкӀыжьын фае.

³² Исус мы Ӏофхэр шъхьаихыгъэу къыӀуагъ. Джащыгъум Петрэ Исус лъэныкъокӀэ Ӏуищи, фимыдэу фежьагъ.

³³ Ау Исус зыкъызэригъэзэкӀи, игъогу рыкӀохэрэм яплъи, Петрэ егыигъ: – Сауж икӀ, шэйтан! О уигупшысакӀэ Тхьэм игупшысакӀэп, цӀыфым игупшысакӀ нахь.

³⁴ ЕтӀанэ Исус цӀыф купышхомрэ игъогу рыкӀохэрэмрэ къяджи, ариӀуагъ: – Зыгорэ сэ сауж къырыкӀонэу фаемэ, ежь зыфэе Ӏофхэр къерэгъанэхи, лӀэныгъэм икъащ къерэшти, сауж къырэрэкӀу;

³⁵ сыда пӀомэ, хэти зыпсэ мыкӀодэу къэзгъэнэжьынэу фаем ыпсэ шӀокӀодыщт, ау хэти сэщ паерэ къэбарышӀум паерэ зыпсэ зышӀокӀодрэм ыпсэ мыкӀодэу къыгъэнэжьыщт.

³⁶ Дунаир зэкӀэ цӀыфым ие хъоу, ежь кӀодмэ, а цӀыфым ишӀуагъэу къекӀыщтыр сыда?

³⁷ ЦӀыфым ыпсэ пае уасэу сыда ытышъущтыр?

³⁸ Джырэ цӀыфхэу Тхьэр зымышӀэхэу, псэкӀод зышӀэхэрэм ащыщэу хэти сэррэ сэ сигущыӀэхэмрэ къыттеукӀытыхьэрэм, сэ, ЦӀыф Лъэпкъым ы Къуи, а цӀыфым сытеукӀытыхьажьыщт, мэлэӀич лъапӀэхэр сигъусэхэу ся Тэ ищытхъушхо фэдэ щытхъушхо сиӀэу сыкъызыкӀожьыкӀэ.