Марк 7 - Къэбарышӏур (Инджыл)

ЯБЛЭНЭРЭШЪХЬ Тыжъхэм къакӀэныжьыгъэ хабзэхэр

¹ Фарисейхэри Ерусалим къикӀыгъэ Тэурат егъэджэкӀо пащэхэм ащыщхэри Исус дэжь къыщызэрэугъоигъэх.

² Ахэмэ Исус игъогу рыкӀохэрэм ащыщхэр Ӏэ мыкъабзэхэмкӀэ, нэмыкӀ къэӀуакӀэкӀэ аӀэхэр амытхьакӀыхэу, зэрэшхэрэм гу лъатагъ.

³ Сыда пӀомэ, фарисейхэмрэ адрэ джурт пстэумрэ ятэжъхэм къакӀэныжьыгъэ хабзэхэм атетэу, аӀэхэр амытхьакӀыхэу шхэхэрэп.

⁴ Бэдзэрым къикӀыжьхэмэ, замыукъэбзэжьэу шхэхэрэп. А хабзэхэм анэмыкӀэу, ятэжъхэм къакӀэныжьыгъэ хэбзабэхэр зэрахьэ, гущыӀэм пае, шъуалъэхэри, къумгъанхэри, лэгъупхэри хабзэм тетэу атхьакӀыныр.

⁵ Арыти, фарисейхэмрэ Тэурат егъэджэкӀо пащэхэмрэ Исус къеупчӀыгъэх: – О уигъогу рыкӀохэрэр тятэжъхэм къытфагъэнэгъэ хабзэхэм атемытхэу, Ӏэ мыкъабзэхэмкӀэ сыд пае шхэхэра?

⁶ – Пегъымбар Ешайа шъо, нэпитӀу зиӀэхэм, шъыпкъэр къышъуиӀолӀагъ, – ариӀожьыгъ Исус. – Мыщ фэдэу итхылъ ит: «Мы цӀыфхэм аӀупэхэмкӀэ сагъэлъапӀэ, ау агухэмкӀэ спэчыжьэх.

⁷ Ахэмэ цӀыфхэр Тхьэм иӀофхэм афагъасэхэзэ, Тхьэм иунашъо ычӀыпэ цӀыф хабзэ зэрэрагъэуцорэм пае, сэ сызэрагъэлъапӀэрэр хьаулый».

⁸ – Тхьэм иунашъо къэжъугъэнагъэу, цӀыфхэм къакӀэныжьыгъэ хабзэхэм шъуатет.

⁹ – Шъуятэжъхэм къакӀэныжьыгъэ хабзэхэр жъугъэцэкӀэнхэм пае, Тхьэм иунашъо зы лъэныкъокӀэ ешъогъэзыкӀы, – къыпигъэхъожьыгъ Исус.

¹⁰ – Сыда пӀомэ, пегъымбар Мусэ ыӀуагъ: «Уятэрэ уянэрэ лъытэныгъэ афэшӀ», ыкӀи «Хэти зятэ е зянэ ӀаекӀэ тегущыӀэрэр шъуукӀын фае».

^11-12 Ау шъо шъоӀо: «„Сэ тынэу шъо шъостын слъэкӀыщтыгъэр джы корбан сшӀыщт“ (ащ къикӀырэр Тхьэм пае тын сшӀыщт) ыӀоу, цӀыф горэм ежь ятэ е янэ риӀомэ, ащыгъум а цӀыфым ятэ е янэ зи фимышӀэн фит».

¹³ Аущтэу шъушӀызэ, шъуятэжъхэм яхабзэхэу шъо шъукъохэм къафэжъугъанэхэрэмкӀэ Тхьэм игущыӀэхэр лъэныкъокӀэ ешъогъэзыкӀых. Ащ фэдэ Ӏаджи шъошӀэ.

¹⁴ Исус цӀыф купышхом джыри зэ къяджи, ариӀуагъ: – Шъо пстэуми шъукъысэдэӀу, къасӀорэри зыгурыжъугъаӀу.

¹⁵ ЦӀыфыр мыкъабзэ зышӀын зылъэкӀырэр ышхырэр арэп, ыгу къикӀыхэрэр ары нахь.

¹⁶ РыдэӀонэу тхьакӀумэ зиӀэм зэхерэх.

¹⁷ Исус цӀыф купышхом хэкӀыжьи, унэм зехьажьым, игъогу рыкӀохэрэр а гъэсэпэтхыдэм ехьылӀагъэу къеупчӀыгъэх.

¹⁸ – Шъори зи къыжъугурымыӀоу ара? – ариӀожьыгъ Исус. – ЦӀыфым шхынэу ышхырэм ежь мыкъабзэу ышӀын зэримылъэкӀырэр къыжъугурыӀорэба?

¹⁹ Сыда пӀомэ, цӀыфым шхынэу ышхырэр ыгу ихьэрэп, ыныбэ ехьэ нахь, етӀани пкъым хэкӀыжьы. (А гущыӀэхэмкӀэ Исус шхын пстэури хьалэлэу ыӀуагъ.)

²⁰ – ЦӀыфым ыгу къикӀырэр ары мыкъабзэ зышӀырэр, – къыпигъэхъожьыгъ Исус.

²¹ – Сыда пӀомэ, цӀыфым ыкӀоцӀ, ыгу ары мыхэр къызэрыкӀыхэрэр: гупшысэ бзаджэхэр, зинэ шӀэныр, тыгъоныр, цӀыф укӀыныр,

²² нэйпсыеныр, бзэджагъэр, тхьагъэпцӀыгъэр, мыхъо-мышӀэ псэукӀэр, шъугъоныр, цӀыфхэм ӀаекӀэ атегущыӀэныр, пэгагъэр, делагъэр.

²³ А бзэджэгъэ пстэури гу кӀоцӀым къекӀышъ, цӀыфыр мыкъабзэ ашӀы.

Сирофиникие хэкум щыщ бзылъфыгъэм шӀошъхъуныгъэу иӀагъэр

²⁴ ЕтӀанэ Исус а чӀыпӀэм икӀи, къалэхэу Тиррэ Сидонрэ яӀэгъо-благъо кӀуагъэ. Унэ горэм зехьэм, ащ ежь зэрэщыӀэр зыми ышӀэнэу фэягъэп, ау къыдэхъугъэп.

²⁵ ДжынапцӀэ зыхэс пхъу зиӀэ бзылъфыгъэ горэ Исус къызэрэкӀуагъэр зэрэзэхихэу къакӀуи, ылъакъохэм адэжь ыпашъхьэ зыщыридзыхыгъ.

²⁶ А бзылъфыгъэр Сирофиникие хэкум щыщыгъ, алыджыбзэм рыгущыӀэщтыгъ. Ыпхъу джынапцӀэр хифынэу Исус къелъэӀугъ.

²⁷ – Ыпэ рапшӀэу сабыйхэм зягъэгъэшхэкӀ, – риӀуагъ Исус а бзылъфыгъэм, – сыда пӀомэ, сабыйхэм хьалыгъур аӀыпхэу, хьэхэм ябгъэшхыныр тэрэзэп.

²⁸ – Шъыпкъэ, тхьэматэ, – къыриӀожьыгъ бзылъфыгъэм, – ау сабыйхэм къаӀэпытэкъурэ хьалыгъу шкъойхэр Ӏэнэ чӀэгъым чӀэс хьэхэми ашхы.

²⁹ – А гущыӀэр къызэрэпӀуагъэм пае, джынапцӀэр о ппхъу хэкӀыжьыгъ, – риӀуагъ Исус. – О уиунэ кӀожь.

³⁰ Бзылъфыгъэр унэм къызэкӀожьым, ыпхъу джынапцӀэр хэкӀыжьыгъэу пӀэм хэлъэу рихьылӀэжьыгъ.

ГущыӀэгъое лӀы дэгу горэ Исус зэригъэхъужьыгъэр

³¹ Ащ ыужым Исус къалэхэу Тиррэ Сидонрэ яӀэгъо-благъо къикӀыжьи, КъэлипшӀ зыцӀэ хэкум зэпырыкӀи, Галилей псыхъураем къекӀолӀэжьыгъ.

³² Джащыгъум дэгоу, гущыӀогъое лӀы горэ цӀыфхэм Исус къыфащи, ыӀэ тырилъхьанэу къелъэӀугъэх.

³³ Исус а лӀыр цӀыфхэм лъэныкъокӀэ ахищи, язакъоу къызэнэхэм, ыӀэхъуамбэхэр лӀым ытхьакӀумэхэм ариӀухи, ужъунтхи, лӀым ыбзэгу теӀэбагъ.

³⁴ ЕтӀанэ уашъом дэплъыий, лъэшэу хэщэтыкӀи, а лӀым риӀуагъ: «Еффатэ!» (Еффатэм къикӀырэр «ПтхьакӀумэхэм зыкъызэӀуарэхыжь!»)

³⁵ Ардэдэм лӀым ытхьакӀумэхэм зэхахы хъужьыгъэ, ыбзэгуи къытӀупщыжьи, къабзэу къэгущыӀэу ыублагъ.

³⁶ Исус цӀыфхэм ар зыми рамыӀотэжьынэу унашъо афишӀыгъ. Ау сыд фэдизэу унашъо афишӀыгъэми, а къэбарыр нахьыбэу агъэӀущтыгъ.

³⁷ ЦӀыфхэм хъугъэ-шӀагъэр ин дэдэу агъэшӀагъозэ аӀощтыгъ: – ЗэкӀэри дэгъоу ышӀагъ. Дэгухэр зэхахэу егъэхъужьых, бзакохэри къегъэгущыӀэжьых.