Марк 6 - Къэбарышӏур (Инджыл)

ЯХЭНЭРЭШЪХЬ Назарет дэс цӀыфхэм Исус зэрамыштагъэр

¹ Исус игъогу рыкӀохэрэр игъусэхэу, а чӀыпӀэм икӀыжьи, янэ икъалэ кӀожьыгъэ.

² Шэмбэт мафэр къызэсым, синэгогум цӀыфхэм Тхьэм игущыӀэхэр щаригъашӀэу ыублагъ. ЕдэӀущтыгъэ цӀыфыбэхэм агъэшӀагъоу къаӀуагъ: – Мы лӀым къыӀохэрэр тыдэ къырихыгъэха? Сыдэу акъылышӀу Тхьэм къыритыгъа! Сыдэу Ӏофышхо гъэшӀэгъонха къыӀэкӀэкӀыхэрэр!

³ Мерэм ыкъо пхъашӀэр арыба мыр, Якъубэ, Иосый, Иудэ, Симон ашыр? Ышыпхъухэри тэ къытхэсхэба? Аущтэу Исус пае агу мыхъун къырагъэхьагъ.

⁴ – Пегъымбарым лъытэныгъэ фэзымышӀыхэрэр ежь янэ икъалэ дэсхэр, ежь иӀахьылхэр, ежь иунагъо щыщхэр арых ныӀэп, – ариӀуагъ Исус ахэмэ.

⁵ Исус сымэджэ заулэм ыӀэхэр атырилъхьэхэу зэригъэхъужьыгъэхэм нэмыкӀ а чӀыпӀэм Ӏофышхо гъэшӀэгъон зи щишӀагъэп.

⁶ Ахэмэ яшӀошъмыхъуныгъи ыгъэшӀэгъуагъ. ЕтӀанэ цӀыфхэм Тхьэм игущыӀэхэр аригъашӀэхэзэ, гъунэгъу къуаджэхэр къыкӀухьэщтыгъ.

Исус игъогу рыкӀорэ нэбгырэ пшӀыкӀутӀур Тхьэм фэлэжьэнхэу зэрэдигъэкӀыгъэхэр

⁷ Джащыгъум Исус игъогу рыкӀорэ нэбгырэ пшӀыкӀутӀумэ къяджи, тӀурытӀоу дигъэкӀыхэу ыублагъ. ДжынэпцӀэ Ӏаехэр цӀыфхэм ахафынхэу тетыгъо аритыгъ.

⁸ Мы унашъор афишӀыгъ: – Гъогум шъузытехьэкӀэ, зы бэщ нэмыкӀ зи зыдэшъумышт. Хьалыгъуи, Ӏалъмэкъи, бгырыпхым илъ ахъщи зыдэшъумыштэх,

⁹ ау цокъэ къызэрыкӀохэр зыщышъулъэх. ДжэнитӀуи зыщышъумылъ.

¹⁰ – ХьакӀэу унэ горэм шъуихьэмэ, а чӀыпӀэм шъукъекӀыжьыфэ, бысымыр зэблэшъумыхъу, – къыпигъэхъожьыгъ Исус.

¹¹ – ЧӀыпӀэ горэм шъущырамыгъэблагъэмэ е къыщышъомыдэӀухэмэ, ащ шъукъикӀыжь, мыхъунэу ашӀагъэмкӀэ шыхьат щыхъуным пае, ахэмэ апашъхьэ шъуицуакъэхэм ателъ сапэр атешъуутхыпкӀыкӀ. Шъыпкъэр шъосэӀо, ахърэт мафэм а къалэм къинэу ыщэчыщтым нахьи, Содомрэ Ӏаморрэрэ къинэу ащэчыщтыр нахь мэкӀэщт.

¹² Аущтэу а нэбгырэ пшӀыкӀутӀур гъогум техьи, «ШъуипсэкӀодшӀагъэхэм шъуафыкӀэгъожь» араӀозэ цӀыфхэм, къэбарышӀур агъэӀоу аублагъ.

¹³ ДжынэпцӀабэхэр цӀыфмэ ахафыщтыгъэх, сымэджабэхэр дагъэ ащафэзэ, агъэхъужьыщтыгъэх.

УмэхъэкӀо Иуан ышъхьэ зэрэпаупкӀыгъэр

¹⁴ Исус цӀэрыӀо хъугъэти, икъэбар пачъыхьэу Ирод нэсыгъ. Зыгорэхэм аӀощтыгъ: – Мыр умэхъэкӀо Иуан ары. Ар лӀагъэхэм къахэтэджыкӀыжьыгъ, джары ащ фэдэ лъэкӀ зыхэлъ Ӏофышхохэр зыкӀыӀэкӀэкӀыхэрэр.

¹⁵ – Ар пегъымбар Иляс ары, – аӀощтыгъ нэмыкӀ цӀыфхэм. – Ар пегъымбар гор, пэсэрэ пегъымбархэм афэдэу, – аӀощтыгъ етӀани нэмыкӀхэми.

¹⁶ Ау Ирод ахэмэ ягущыӀэхэр зызэхехым, ыӀуагъ: – Иуанэу зышъхьэ пязгъэупкӀыгъэр лӀагъэхэм къахэтэджыкӀыжьыгъ.

¹⁷ Ирод ар зыкӀиӀуагъэр мыры: ежь ышэу Филипп зыцӀэр псауми, Ирод а Филипп ишъузэу Иродиадэ къыщэжьыгъ.

¹⁸ Ар къызэрищэжьыгъэм пае, Иуан Ирод риӀощтыгъ: «О пшы ишъуз къэпщэжьыныр хабзэкӀэ хъущтэп».

¹⁹ Ащ пае Иродиадэ Иуан гужъ фыриӀэ хъугъэ. Иродиадэ ихьатыркӀэ Ирод идзэлӀхэм Иуан аригъэубыти, хьапсым чӀаригъэдзагъ. Иродиадэ Иуан аригъэукӀыным фэягъ, ау къыдэхъущтыгъэп.

²⁰ Сыда пӀомэ, Иуан шъыпкъагъэ зиӀэ зэрэцӀыф лъапӀэр Ирод ышӀэщтыгъэти, щыщынэщтыгъ, ыухъумэщтыгъ. Иуан къыӀохэрэм зядэӀукӀэ, инэу гумэкӀыщтыгъ, ау игуапэу едэӀущтыгъ.

²¹ Мафэ горэм Иродиадэ Ӏофэу зылъыхъущтыгъэр къыфызэпыфагъ. Ирод къызыхъугъэ мафэр ыгъэлъэпӀэнэу икъулыкъушӀэхэм, идзэ ипэщэшхохэм, Галилей хэкум итхьэматэхэм ешхэ-ешъошхо афишӀыгъ.

²² Джащыгъум Иродиадэ ыпхъу унэм къихьи, къафэшъуагъ. Иродрэ ихьакӀэхэмрэ агу рихьыгъ. – УзыфаемкӀэ къысэлъэӀуи, укъызэрысэлъэӀурэр къыпфэсшӀэщт, – риӀуагъ пачъыхьэм пшъашъэм.

²³ ТхьарыӀуи фишӀыгъ: – Сыд щыщми узыфаер остын, сипачъыхьагъу ыныкъо нэсми.

²⁴ Пшъашъэр унэм икӀыжьи, янэ еупчӀыжьыгъ: – СыдкӀэ селъэӀущта? – УмэхъэкӀо Иуан ышъхьэ кӀэлъэӀу, – къыриӀожьыгъ янэ.

²⁵ Пшъашъэр псынкӀэу унэм къилъэдэжьи, пачъыхьэм къыриӀуагъ: – Джыдэдэм умэхъэкӀо Иуан ышъхьэ лэгъэшхом илъэу къысэт.

²⁶ Пачъыхьэм ар зызэхехым, ыгу лъэшэу къеуагъ, ары шъхьакӀэ хьакӀэхэм апашъхьэ пшъашъэм тхьарыӀоу фишӀыгъэм пае игущыӀэ епцӀыжьыным фэягъэп.

²⁷ Арыти, ардэдэм дзэлӀ горэм Иуан ышъхьэ къыхьынэу унашъо фишӀи, ыгъэкӀуагъ.

²⁸ Ар кӀуи, Иуан ышъхьэ хьапсым щыпиупкӀи, лэгъэшхом илъэу къыхьи, пшъашъэм къыритыгъ. Пшъашъэм янэ ритыжьыгъ.

²⁹ Иуан игъогу рыкӀохэрэм хъугъэ-шӀагъэр зызэхахым, къакӀохи, Иуан ихьадэ хьапсым чӀахыжьи, къэунэм чӀалъхьажьыгъ.

Исус нэбгырэ минитф зэригъэшхагъэр

³⁰ Апостолхэр Исус дэжь къыщызэрэугъоихи, Ӏофэу ашӀэгъэ пстэумрэ цӀыфхэм арагъэшӀэгъэ пстэумрэ раӀотэжьыгъ.

³¹ КъэкӀо-накӀохэр зэрэбагъэм пае, Исусрэ игъогу рыкӀохэрэмрэ шхэгъуи ифэжьыщтыгъэхэпти, Исус ахэмэ ариӀуагъ: – ЧӀыпӀэ Ӏудзыгъэ горэм тизакъоу тыкӀонышъ, зыжъугъэпсэфыщт.

³² Арыти, къуашъом исхэу Ӏудзыгъэ чӀыпӀэ горэм язакъоу ежьагъэх.

³³ ЦӀыфхэм ахэр къуашъом исхэу, ӀукӀыхэу алъэгъугъ, бэми къашӀэжьыгъэх. ЦӀыфхэр къэлэ пстэуми лъэсэу къадэчъыхи, Исусрэ игъогу рыкӀохэрэмрэ къуашъомкӀэ зыдакӀощтыгъэ чӀыпӀэм нэмысхэзэ ахэр нэсхи, къэзэрэугъоигъэх.

³⁴ Исус къуашъом къикӀи, цӀыф купышхор зелъэгъум, ахэр мэлахъо зимыӀэ мэл Ӏэхъогъум фэдэхэу щытыгъэхэти, ыгу ягъуи, Ӏофыбэхэр агуригъаӀоу ыублагъ.

³⁵ Мафэр зыхэкӀуатэм, игъогу рыкӀохэрэр Исус къыбгъодахьэхи, къаӀуагъ: – Мы чӀыпӀэр нэкӀы, мафэри хэкӀотэгъах.

³⁶ Чылэ-къоджэ гъунэгъухэм кӀонхэшъ, гъомлапхъэ къызфащэфыжьыным пае, цӀыфхэр тӀупщыжьых; сыда пӀомэ, ашхын яӀэп.

³⁷ – Шъо ахэр жъугъашхэх, – ариӀуагъ Исус. – ТыкӀонышъ, динар шъитӀум ауасэ хьалыгъу къэтщэфына, мы цӀыфхэм ядгъэшхынэу? – къыраӀожьыгъ адрэхэм.

³⁸ – Хьалыгъу тхьапша шъуиӀэр? – ариӀуагъ Исус. – ШъукӀуи, къызэжъугъашӀ. КъызэрагъашӀи, къаӀуагъ: – Хьалыгъуитфырэ пцэжъыитӀурэ тиӀ.

³⁹ ЕтӀанэ Исус цӀыф пстэури куп-купэу уц къашхъом хагъэтӀысхьанхэу игъогу рыкӀохэрэм унашъо афишӀыгъ.

⁴⁰ ЦӀыфхэр шъэрышъэу, шъэныкъо-шъэныкъоу тӀысыгъэх.

⁴¹ ЕтӀанэ Исус хьалыгъуитфымрэ пцэжъыитӀумрэ къыштэхи, уашъом дэплъыий, Тхьэм щытхъу фишӀыгъ. ЕтӀанэ хьалыгъухэр зэгуичыхи, цӀыфмэ апашъхьэ ралъхьанхэу игъогу рыкӀохэрэм аритыгъ. ПцэжъыитӀури зэкӀэми афигощыгъ.

⁴² ЦӀыф пстэури шхагъэ, загъэшхэкӀыгъ.

⁴³ Ащ нэужым къялыжьыгъэ хьалыгъу такъырхэмрэ пцэжъыехэмрэ мэтэ пшӀыкӀутӀумэ арызэу аугъоижьыгъэх.

⁴⁴ Шхагъэхэр лӀы минитф хъущтыгъэх.

Исус псы кӀыӀум тетэу зэрэкӀуагъэр

⁴⁵ Исус цӀыф купышхор етӀупщыжьыфэ, игъогу рыкӀохэрэр ежь ыпэ псыхъураем иадрабгъу ит къалэу Бет-Сайдэ зэпырыкӀынхэу къуашъом ригъэтӀысхьагъэх.

⁴⁶ Исус цӀыфхэр зетӀупщыжьыхэ ужым, Тхьэм елъэӀунэу Ӏуашъхьэм дэкӀоягъ.

⁴⁷ Пчыхьэ къызэхъуми, къуашъор псыхъурэе гузэгум нэсыгъагъ, Исуси изакъоу чӀыгум къытенагъ.

⁴⁸ Къуашъом исхэм жьыбгъэр къапеоти, къинкӀэ къошъо бэщхэмкӀэ афэу Исус ылъэгъугъ. АтэкъэӀогъум дэжь къуашъом исхэм алъэныкъокӀэ псы кӀыӀум тетэу, Исус къэкӀуагъ. Ахэмэ аблэкӀ пэтыгъ.

⁴⁹ Исус псы кӀыӀум тетэу къакӀоу залъэгъум, хьадэджадэу ашӀошӀи, къэкууагъэх,

⁵⁰ сыда пӀомэ, зэпстэуми ар алъэгъуи, лъэшэу щтагъэхэти ары. Ардэдэм Исус къадэгущыӀагъ: – Шъугу шъумыгъэкӀоды, Сэры ар, шъумыщын.

⁵¹ ЕтӀанэ ахэмэ къуашъом адитӀысхьагъ, жьыбгъэри уцужьыгъэ. Лъэш дэдэу агъэшӀэгъуагъ,

⁵² сыда пӀомэ, Ӏофышхо гъэшӀэгъонэу Исус хьалыгъухэмкӀэ ышӀагъэр къагурыӀуагъэп, агухэр зэфэшӀыгъагъэти.

Исус Геннисарет хэкум сымаджэхэр зэрэщигъэхъужьыгъэр

⁵³ Псыхъураем зызэпырэкӀыхэм, Геннисарет хэкум нэсхи, гъурзэр щырадзыхыгъ.

⁵⁴ Къуашъом къызэрикӀхэу, цӀыфхэм Исус къашӀэжьыгъ.

⁵⁵ ЦӀыфхэм а хэкур зэрэщытэу къачъыхьэу, сымаджэхэр пӀуаблэхэм акӀоцӀылъхэу Исус зыдэщыӀэу зыфаӀорэ чӀыпӀэм къахьэу къаублагъ.

⁵⁶ Къуаджэми, къалэми, чылэми Исус тыдэ кӀуагъэми сымаджэхэр а чӀыпӀэхэм ягузэгупӀэхэм ащагъэгъолъыхэти, ищыгъын цыпэ нигъэсынхэ къодыеу къелъэӀущтыгъэх, Исус ищыгъын цыпэ нэсыгъэ пстэури хъужьыгъэх.