Марк 5 - Къэбарышӏур (Инджыл)

ЯТФЭНЭРЭШЪХЬ Исус джынапцӀэ зыхэс лӀы горэ зэригъэхъужьыгъэр

¹ Галилей псыхъураем иадрабгъу ит хэкоу къалэу Гадарэ епхыгъэм нэсыгъэх.

² Исус къуашъом къызэрикӀэу, джынэпцӀэ Ӏае зыхэс лӀы горэ къэунэхэм алъэныкъокӀэ къикӀи, къыпэгъокӀыгъ.

³ А лӀыр къэунэхэм ахэсыгъ. ГъучӀ Ӏэхъу-лъэхъу пытэ зыми тырилъхьан ылъэкӀыщтыгъэп.

⁴ Сыда пӀомэ, гъучӀ Ӏэхъу-лъэхъу бэрэ тыралъхьэщтыгъ, ау Ӏэхъур ээпичыщтыгъ, лъэхъури зэпиутыщтыгъ. Аущтэу зыми а лӀыр ыгъэуцун ылъэкӀыщтыгъэп.

⁵ Чэщи мафи къэунэхэри Ӏуашъхьэхэри къыкӀухьэ зэпытыщтыгъ, куомэ-кӀыизэ, мыжъохэмкӀэ зэожьыщтыгъ.

⁶ ЧыжьэкӀэ а лӀым Исус зелъэгъум, къачъи, лъэгъонджэмышъхьэкӀэ ыпашъхьэ къитӀысхьагъ.

⁷ МэкъэшхокӀэ куозэ, къыӀуагъ: – Исус, Тхьэу анахь Лъагэм ы Къу, сыда уиӀофэу къысхэлъыр? Тхьэм ыцӀэкӀэ сыолъэӀу, къин сэмыгъэлъэгъу!

⁸ А лӀым аущтэу зыкӀиӀуагъэр, Исус джынапцӀэм, «О джынэпцӀэ Ӏай, мы лӀым хэкӀыжь!» риӀуагъэти ары.

⁹ – Сыда о пцӀэр? – еупчӀыгъ Исус а лӀым. – Сэ сцӀэр Дзэ, – пэгъокӀ къытыжьыгъ, – сыда пӀомэ, бэ тэхъушъ ары.

¹⁰ ЕтӀанэ Исус ахэр а хэкум римыфынхэу лъэшэу къелъэӀугъэх.

¹¹ А чӀыпӀэ дэдэм къо Ӏэхъогъушхо Ӏошъхьэ нэпкъым щыхъущтыгъ.

¹² Джащыгъум джынэпцӀэ Ӏаехэр Исус къелъэӀугъэх: – Къохэм адэжь тыгъакӀуи, ахэмэ апкъыхэм тахэгъахь.

¹³ Исус ахэр фит ышӀыгъ. ДжынэпцӀэ Ӏаехэр лӀым хэкӀыжьхи, къохэм апкъыхэм ахэхьагъэх. Къо Ӏэхъогъур Ӏошъхьэ нэпкъ зандэм ечъэхи, псыхъураем хэлъэдагъ, псыми ытхьэлагъ. Ахэр минитӀу фэдиз хъущтыгъэх.

¹⁴ Къуахъохэр хэхьажьхи, къалэмрэ къуаджэхэмрэ хъугъэ-шӀагъэр щаӀотэжьыгъ, цӀыфхэри хъугъэр зэрагъэлъэгъунэу къэкӀуагъэх.

¹⁵ Ахэр Исус дэжь къызэкӀохэм, джынэпцӀабэхэр къызхэкӀыжьыгъэ лӀыр фэпагъэу, иакъыл ыгъотыжьыгъэу, а чӀыпӀэм щысэу алъэгъугъ ыкӀи къэщтагъэх.

¹⁶ Джащыгъум къэхъугъэр зылъэгъугъэ цӀыфхэм джынапцӀэхэр зыхэсыгъэ лӀымрэ къохэмрэ къяхъулӀагъэр цӀыфхэм араӀотэжьыгъ.

¹⁷ ЦӀыфхэм ар зызэхахым, Исус яхэку ыбгынэнэу къелъэӀугъэх.

¹⁸ Исус къуашъом итӀысхьажь зэхъум, джынапцӀэхэр къызхэкӀыжьыгъэ лӀыр ащ къелъэӀугъ: – Гъусэ сызыфэшӀ.

¹⁹ – О уибынхэм адэжь уиунэ кӀожьи, Зиусхьаным къыпфишӀэгъэ шӀугъэшхомрэ гукӀэгъу къызэрэпфишӀыгъэмрэ яӀотэжь, – риӀуагъ Исус ар фимыдэу.

²⁰ Аущтэу ар кӀуи, Исус къыфишӀагъэр КъэлипшӀ зыцӀэ хэкум щиӀуатэу ыублагъ, цӀыфхэми зэкӀэ агъэшӀэгъуагъ.

Исус Иаир ыпхъоу лӀагъэр къызэригъэтэджыжьыгъэр; Исус ищыгъын къынэсыгъэ бзылъфыгъэр зэригъэхъужьыгъэр

²¹ Исус къуашъомкӀэ Галилей псыхъураем иадрабгъу къызызэпырэкӀыжьым, цӀыф купышхо ежь дэжь къыщызэрэугъоигъ. Исус псы Ӏушъом Ӏутэу,

²² Иаир зыцӀэ синэгогу пащэ горэ къэкӀуагъ. Ащ Исус зелъэгъум, ылъакъохэм адэжь зыкъыщыридзыхи,

²³ лъэшэу къелъэӀугъ: – Сэ спхъу цӀыкӀу малӀэ пэт. Хъужьынышъ, псаоу къэнэжьыным пае, къакӀуи, пӀэхэр телъхь.

²⁴ Джащыгъум Исус а лӀым дежьагъ. ЦӀыф купышхор Исус ыуж итэу зэтезэрэгъэгуагъэхэу кӀощтыгъэх.

²⁵ А цӀыфхэм бзылъфыгъэ горэ ахэтыгъ. Илъэс пшӀыкӀутӀо бэрэ лъы къыкӀэкӀэу ар гуӀэщтыгъ.

²⁶ Ӏэзэ Ӏаджи еплъыгъагъ, къиныби рагъэщэчыгъагъ. Бзылъфыгъэм иӀэ пстэури ахэмэ атыригъэкӀодэгъагъ, ау нахь Ӏае хъущтыгъэ нахь, яшӀуагъэ къэкӀуагъэп.

²⁷ Ащ Исус икъэбар зэхихыгъэти, цӀыф купышхом хэтэу ыкӀыбкӀэ къакӀуи, ищыгъын къынэсыгъ;

²⁸ сыда пӀомэ, а бзылъфыгъэм мыщ фэдэу ыгукӀэ ыӀощтыгъ: «Исус ищыгъынхэм санэс къодыеми, сыхъужьыщт».

²⁹ Ардэдэм лъыкӀэкӀыныр уцужьыгъэ, зэрэхъужьыгъэри ыпкъыкӀэ зэхишӀагъ.

³⁰ Исус кӀуачӀэ зэрэхэкӀыгъэм гу лъитагъ. ЦӀыф купышхом хэтэу зыкъызэригъэзэкӀи, ариӀуагъ: – Хэта сищыгъынхэм къанэсыгъэр?

³¹ – ЦӀыф купышхор къызэрэптезэрэгъэгуагъэхэр плъэгъузэ, етӀани «Хэта къызнэсыгъэр?» оӀуа? – къыраӀуагъ игъогу рыкӀохэрэм.

³² Ау Исус ар зышӀагъэр ылъэгъуным пае, зиплъыхьэщтыгъ.

³³ Джащыгъум бзылъфыгъэм къехъулӀагъэр ешӀэти, щтагъэу, кӀэзэзэу къыӀухьи, Исус ыпашъхьэ зыкъыщыридзыхи, шъыпкъэр зэкӀэ къыриӀуагъ.

³⁴ – Сипшъашъ, – риӀуагъ Исус, – уишӀошъхъуныгъэ уигъэхъужьыгъ. Гъогу маф, гупсэф уиӀэу опсэу. Узынчъэу ухъужьыгъ.

³⁵ Исус джыри ахэр къыӀозэ, лӀы заулэ синэгогу пащэм иунэ къикӀыгъэхэу, къакӀохи, Иаир къыраӀуагъ: – Ппхъу дунаим ехыжьыгъ. Дин гъэсакӀом сыд пае джыри къин ебгъэлъэгъужьыра?

³⁶ Ау Исус ахэмэ къаӀуагъэр зэрэзэхихэу, синэгогу пащэм риӀуагъ: – Умыщын, шӀошъхъуныгъэ зигъэӀэ къодый.

³⁷ ЕтӀанэ Петри, Якъуби, ащ ыш Иуани нэмыкӀ зыдимыщэу, Исус кӀуагъэ.

³⁸ Синэгогу пащэм иунэ зынэсхэм, Исус цӀыфхэр бырсырхэу, хьэдагъэ къаӀэтэу, пыхьэхэу ылъэгъугъ.

³⁹ Исус унэм къызехьэм, ариӀуагъ: – Сыд пае бырсыр къэшъуӀэтэу, хьадагъэ шъушӀыра? Пшъэшъэжъыер лӀагъэп, мэчъые нахь.

⁴⁰ Исус ар къызеӀом, къыдэхьащхыгъэх. Ау Исус зэпстэури унэм къыригъэкӀи, пшъэшъэжъыем ятэ-янэхэмрэ игъусищрэ зыдищэхи, пшъэшъэжъыер зэрылъ унэм ихьагъ.

⁴¹ ЕтӀанэ пшъэшъэжъыем ыӀэ ыубыти, риӀуагъ: – Талита кум! (Ащ къикӀырэр, – Сипшъэшъэжъый, сэ осэӀо, къэтэдж!)

⁴² Пшъэшъэжъыер ардэдэм къэтэджыжьи, унэ кӀоцӀыр къыкӀухьагъ. Ар илъэс пшӀыкӀутӀум итыгъ. Ар залъэгъум, лъэшэу агъэшӀэгъуагъ.

⁴³ Ау Исус хъугъэр зыми рамыӀотэжьынэу унэшъо пытэ афишӀыгъ. ЕтӀанэ пшъэшъэжъыер агъэшхэнэу ариӀуагъ.