Марк 3 - Къэбарышӏур (Инджыл)

ЯЩЭНЭРЭШЪХЬ ЗыӀэ лъэныкъо пыгъукӀыгъэ лӀы горэ Исус зэригъэхъужьыгъэр

¹ Джыри зэ Исус синэгогум чӀэхьагъ. ЗыӀэ лъэныкъо пыгъукӀыгъэу лӀы горэ ащ чӀэтыгъ.

² Шэмбэт мафэм тефэу Исус а лӀыр ыгъэхъужьыщтмэ, фарисейхэр еплъакӀощтыгъэх, зэрагъэмысэн Ӏоф горэ къагъотыным пае.

³ Исус зыӀэ лъэныкъо пыгъукӀыгъэ лӀым риӀуагъ: – Къэтэджи, утыгум къихь.

⁴ ЕтӀанэ ахэмэ ариӀуагъ: – Шэмбэт мафэм шӀу пшӀэныр ара, хьауми бзэджагъэ пшӀэныр ара хабзэкӀэ хъущтыр, псэ мыкӀодэу къэбгъэнэжьыныр ара, хьауми бгъэкӀодыныр ара? Ау ахэмэ заушъэфыгъ.

⁵ Ахэмэ яжъалымыгъэ Исус ыгу къеуи, губжыгъэу ахаплъи, лӀым риӀуагъ: – О пӀэ къэщэй. ЛӀым ыӀэ къыщэигъ, адрэ Ӏэ псауми фэдэ хъужьыгъэ.

⁶ Джащыгъум фарисейхэр синэгогум чӀэкӀыжьхи, ежьхэмрэ пачъыхьэ Ирод дезгъаштэхэрэмрэ Исус агъэкӀодынэу зэдырахъухьагъ, зэрагъэкӀодыщт шӀыкӀэмкӀэ зэупчӀыжьхэзэ.

ЦӀыф купышхор Исус зэрэкӀэлъыкӀуагъэр

⁷ Исус игъогу рыкӀохэрэр игъусэхэу а чӀыпӀэм икӀыжьи, Галилей псыхъураем кӀуагъэ. Галилей хэкум щыщ цӀыфыбэхэр Исус ыуж ихьагъэх.

⁸ Исус ышӀэгъэ Ӏоф пстэури зэхахыгъэти, Иудей хэкуми, Ерусалими, Идумей хэкуми, Иордан псыхъом иадрабгъу щыӀэ хэкуми, къалэхэу Тиррэ Сидонрэ алъэныкъоми цӀыфыбэхэр къарыкӀыхи, Исус дэжь къэкӀуагъэх.

⁹ Ащ дэжьым цӀыф купышхор тезэрэмыгъэбэнэным пае, Исус игъогу рыкӀохэрэм къуашъо ежь хьазырэу фаӀыгъынэу ариӀуагъ.

¹⁰ Сыда пӀомэ, Исус цӀыфыбэхэр ыгъэхъужьыщтыгъэти, уз зиӀэ пстэури нэсынхэу задзыщтыгъ.

¹¹ ДжынэпцӀэ Ӏаехэми Исус залъэгъукӀэ, ыпашъхьэ зырадзыхти, куощтыгъэх: «О Тхьэм ури Къу».

¹² Ау Исус ежь зыщыщыр цӀыфхэм къарамыгъэшӀэнэу джынапцӀэхэм ишъыпкъэу афигъэпытэщтыгъ.

Исус игъогу рыкӀорэ нэбгырэ пшӀыкӀутӀур зэригъэнэфагъэр

¹³ Исус Ӏуашъхьэм дэкӀуаий, ежь зыфаехэм къяджагъ, ахэри ыдэжь къэкӀуагъэх.

¹⁴ Нэбгырэ пшӀыкӀутӀу ежь игъусэнхэуи, Тхьэм игущыӀэхэр цӀыфхэм арагъэӀунхэм пае, ыгъэкӀонхэуи ыгъэнэфагъ.

¹⁵ Ащ нэмыкӀэу, сымаджэхэр агъэхъужьынхэуи, джынапцӀэхэр цӀыфхэм ахафынхэуи тетыгъо аритыгъ.

¹⁶ Исус нэбгырэ пшӀыкӀутӀоу ыгъэнэфагъэр мыхэр арых: Симонэу Исус ятӀонэрэ цӀэу Петрэ зыфиусыгъэр;

¹⁷ Зебедей ыкъуитӀоу Якъубэрэ Иуанрэ (ахэмэ ятӀонэрэ цӀэу Бне-Регеш афиусыгъ; Бне-Регешым къикӀырэр «Шыблэм ыкъохэр» ары);

¹⁸ етӀанэ Индрыс, Филипп, Бар-Талмай, Маттэ, Фомэ, Алфей ыкъо Якъуб, Таддей, Симонэу зихэгъэгу ыпсэ емыблэжьэу фэлажьэщтыгъэр,

¹⁹ Иудэ Искариот. А Иудэр ары нэужым Исус тетыгъо зиӀэхэм язгъэубытыгъэр.

Исусрэ джынапцӀэхэм япащэу БаӀал-Зэбулрэ

²⁰ ЕтӀанэ Исус унэм кӀожьыгъэ. Ежьыррэ игъогу рыкӀохэрэмрэ шхэгъу имыфэхэзэ цӀыф купышхо джыри къэзэрэугъоигъ.

²¹ Исус иунэкъощхэм ежь къызэригъэзэжьыгъэр зызэхахым, «Ащ зишӀэжьырэп» аӀуи, къащэжьынэу лъыкӀуагъэх.

²² Тэурат егъэджэкӀо пащэхэу Ерусалим къикӀыгъэхэм Исус ехьылӀагъэу аӀощтыгъ: – БаӀал-Зэбулэу ащ хэс, БаӀал-Зэбулэу джынапцӀэхэм япащэ илъэкӀ ары джынапцӀэхэр цӀыфхэм зэрахифырэр.

²³ Арыти, Исус ахэмэ къяджи, гъэсэпэтхыдэхэмкӀэ ариӀуагъ: – Шэйтаным сыдэущтэу шэйтаныр цӀыф горэм хифын ылъэкӀына?

²⁴ Зы пачъыхьагъум лъэныкъуитӀоу зигощымэ, щыӀэжьын ылъэкӀыщтэп.

²⁵ Ащ фэдэу зы унэри лъэныкъуитӀоу зигощымэ, щыӀэжьын ылъэкӀыщтэп.

²⁶ Шэйтанри къэтэджэу, ежь ышъхьэ пэуцужьэу, лъэныкъуитӀоу зигощымэ, ари щыӀэжьын ылъэкӀыщтэп, икӀодыжьыгъо къэсыгъэ нахь.

²⁷ Зыми кӀуачӀэ зиӀэ лӀы горэм иунэ ихьэу, ихьапщыпхэр къырихын ылъэкӀыщтэп, ыпэ рапшӀэу а лӀэу кӀуачӀэ зиӀэр зэкӀоцӀимыпхэмэ. Ау а лӀыр зэкӀоцӀипхэмэ, иунэ къыхъункӀэн ылъэкӀыщт.

²⁸ Шъыпкъэр шъосэӀо, цӀыфхэм сыд фэдизэу Тхьэр агъэпцӀыми, япсэкӀод пстэури къафэгъущтых.

²⁹ Ау хэтми Тхьэм ы Псэ ЛъапӀэ зыгъэпцӀырэм егъашӀэми фэгъущтэп, мыкӀодыжьын псэкӀодкӀэ мысэ мэхъу нахь.

³⁰ Исус ар зыкӀиӀуагъэр «ДжынэпцӀэ Ӏае хэс» ахэмэ ежь ехьылӀагъэу аӀуагъэти ары.

Исус янэрэ ышхэмрэ

³¹ Джащыгъум Исус янэрэ ышхэмрэ къэкӀуагъэх. Щагум дэтхэу, Исус къеджэнэу зыгорэ агъэкӀуагъ.

³² ЦӀыф купышхоу Исус къетӀысэкӀыгъэхэм къыраӀуагъ: – О уяни, пшыхэри, пшыпхъухэри щагум дэтхэу къыпкӀэупчӀэх.

³³ – Хэта сяни сшыхэри? – ариӀожьыгъ Исус ахэмэ.

³⁴ ЕтӀанэ къетӀысэкӀыгъэхэм ахаплъи, къыӀуагъ: – Мыхэр ары сэ сянэри сшыхэри.

³⁵ Хэти Тхьэр зыфаер зыгъэцакӀэрэр ары сэ сшыри, сшыпхъури, сянэри.