Марк 2 - Къэбарышӏур (Инджыл)

ЯТӀОНЭРЭШЪХЬ ЗыӀэпкъ-лъэпкъ узым зэкӀиубытэгъэ лӀы горэ Исус зэригъэхъужьыгъэр

¹ Мэфэ заулэ тешӀагъэу Исус къалэу Капернаум къызегъэзэжьым, иунэ къызэрэкӀожьыгъэр цӀыфмэ зэхахыгъ.

² ЦӀыфхэу къэзэрэугъоигъэхэр зэрэбагъэм пае, унэ пчъэӀупэми хэуцуапӀэ имыӀэжь хъугъэ, Исуси Тхьэм игущыӀэхэр аригъэӀухэу ыублагъ.

³ Джащыгъум цӀыф куп къэкӀуагъ; ахэмэ ащыщ нэбгыриплӀым зыӀэпкъ-лъэпкъ узым зэкӀиубытэгъэ лӀы горэ къыздахьыгъ.

⁴ ЦӀыфхэр зэрэбагъэм къыхэкӀыкӀэ, сымаджэр Исус рахьылӀэн алъэкӀыгъэп. Унашъхьэм дахьыий, Исус зыдэщыӀэ лъэныкъомкӀэ унашъхьэм щыщ тырахи, сымаджэр пӀуаблэм телъэу ратӀупщэхыгъ.

⁵ Исус ахэмэ яшӀошъхъуныгъэ зелъэгъум, зыӀэпкъ-лъэпкъ узым зэкӀиубытэгъэ лӀым риӀуагъ: – СикӀал, уипсэкӀодшӀагъэхэр къыпфэгъугъэх.

⁶ Тэурат егъэджэкӀо пащэхэу ащ дэжьым щысыгъэхэм ащыщхэм агукӀэ аӀуагъ:

⁷ – Сыд пае мы лӀыр моущтэу гущыӀэра? Ащ Тхьэр егъэпцӀыба? Тхьэм нэмыкӀэу, хэта псэкӀодшӀагъэхэр зыгъэгъун зылъэкӀырэр?

⁸ Ардэдэм Исус ыгукӀэ ахэмэ агухэм арылъыр ешӀэти, ариӀуагъ: – Сыд пае ащ фэдэхэр шъо шъугухэмкӀэ шъуӀора?

⁹ Тара нахь псынкӀагъор, зыӀэпкъ-лъэпкъ узым зэкӀиубытэгъэ лӀым «УипсэкӀодшӀагъэхэр къыпфэгъугъэх» епӀоныр ара, хьауми «Тэджи, уипӀуаблэ къашти, къэкӀухь» епӀоныр ара?

¹⁰ Ау шъушӀэным пае, ЦӀыф Лъэпкъым ы Къо псэкӀодшӀагъэхэр ыгъэгъунхэу дунаим тетыгъо зэрэщыриӀэр, – Исус зыӀэпкъ-лъэпкъ узым зэкӀиубытэгъэ лӀым риӀуагъ:

¹¹ – Сэ осэӀо, къэтэджи, уипӀуаблэ къашти, шъуадэжь кӀожь!

¹² Ардэдэм лӀыр къэтэджи, ипӀуаблэ ышти, цӀыф пстэуми алъэгъоу унэм икӀыжьыгъ. Ар пстэуми инэу агъэшӀагъозэ, Тхьэм щытхъу фашӀэу аӀуагъ: – Мыщ фэдэ Ӏоф тэ ныбжьи тлъэгъугъэп.

Исус игъогу рыкӀонэу Лэуй къызэреджагъэр

¹³ Исус джыри Галилей псыхъурэе Ӏушъом Ӏухьажьыгъ. ЦӀыф купышхо ыдэжь къэкӀуагъ, Исуси Тхьэм игущыӀэхэр аригъашӀэхэу ыублагъ.

¹⁴ ЕтӀанэ нахь чыжьэу кӀозэ, хьакъулахь ахъщэр зыщыхахырэ унэм Ӏусэу, Алфей ыкъо Лэуй ылъэгъугъ. – Сауж къырыкӀу, – риӀуагъ Исус. Лэуй къэтэджи, Исус ыуж ихьагъ.

¹⁵ ЕтӀанэ Исус Лэуй иунэ щышхэ зэхъум, хьакъулахь ахъщэр хэзыххэрэмрэ псэкӀод зышӀэхэрэмрэ бэ хъухэу, Исусрэ игъогу рыкӀохэрэмрэ адашхэщтыгъэх; сыда пӀомэ, Исус ыуж ихьагъэхэр бэ хъущтыгъэх.

¹⁶ Тэурат егъэджэкӀо пащэхэу фарисейхэм ащыщхэм хьакъулахь ахъщэр хэзыххэрэмрэ псэкӀод зышӀэхэрэмрэ Исус адашхэу залъэгъум, Исус игъогу рыкӀохэрэм араӀуагъ: – Хьакъулахь ахъщэр хэзыххэрэмрэ псэкӀодышӀэхэмрэ сыда ар зыкӀадашхэрэр, зыкӀадешъорэр?

¹⁷ Исус ар зызэхехым, ариӀуагъ: – Псаухэр арэп Ӏазэ зищыкӀагъэхэр, сымаджэхэр ары нахь. Шъыпкъагъэ зиӀэ цӀыфхэм сяджэнэу арэп сыкъызфэкӀуагъэр, псэкӀодышӀэхэр япсэкӀодшӀагъэхэм афыкӀэгъожьынхэм пае сяджэнэу ары нахь.

Джурт тхьэматэхэр нэкӀым ехьылӀагъэу Исус къызэреупчӀыгъэхэр

¹⁸ УмэхъэкӀо Иуан игъогу рыкӀохэрэмрэ фарисейхэмрэ анэкӀыщтыгъ. ЦӀыф заулэ къакӀуи, Исус къыраӀуагъ: – Иуан игъогу рыкӀохэрэмрэ фарисейхэм ягъогу рыкӀохэрэмрэ анэкӀы. О уигъогу рыкӀохэрэм сыда зыкӀамынэкӀырэр?

¹⁹ – Шъаор ягъусэфэкӀэ, шъаом игъусэхэм анэкӀын алъэкӀына? Хьау, шъаор ягъусэфэкӀэ, анэкӀын алъэкӀыщтэп, – ариӀожьыгъ Исус ахэмэ.

²⁰ – Ау шъаор затырахыщт мафэхэр къэкӀощтых. А мафэр къызыкӀокӀэ, анэкӀыщт.

²¹ – ШэкӀыкӀэм щыщ идэжьын щыгъыныжъым зыми фишӀырэп. Аущтэу ышӀымэ, шэкӀыкӀэм щыщ идэжьыным щыгъыныжъыр зэӀитхъынышъ, гъуанэр нахь ин ышӀыщт.

²² Джащ фэдэу, зыми сэнэпс шӀыгъакӀэр шъонтыжъхэм аригъахъорэп. Аущтэу ышӀымэ, сэнэпсым шъонтхэр къызэгуитхъынхэшъ, сэнэпсыри къичъыщт, шъонтхэри кӀодыщтых. Ау сэнэпс шӀыгъакӀэр шъонтыкӀэхэм арагъэхъон фае.

Шэмбэт мафэм Исус игъогу рыкӀохэрэм коцышъхьэхэр къызэрэпачыгъэхэр

²³ Шэмбэт мафэ горэм Исус коц хьасэхэр зэпичыхэзэ кӀощтыгъ. Игъогу рыкӀохэрэр кӀом хэтхэу, коцышъхьэхэр къыпачыхэу аублагъ.

²⁴ Фарисейхэм Исус къыраӀуагъ: – Еплъ, ахэмэ шэмбэт мафэм хабзэкӀэ пшӀэ мыхъущтыр сыд пае ашӀэра?

²⁵ – Даутэрэ игъусэхэмрэ къин хэтхэу, мэлакӀэ лӀэхэ зэхъум, ащ ышӀагъэм зыкӀи шъуеджагъэба? – ариӀожьыгъ Исус.

²⁶ – Абиатар зыцӀэ дин пэщэшхом имафэхэм Даутэ Тхьэм иунэ ихьи, цӀыфхэм Тхьэм ыпашъхьэ ралъхьэгъэ хьалыгъур ышхыгъ. А хьалыгъур дин пащэхэм анэмыкӀ хабзэкӀэ зыгорэм ышхы хъущтыгъэп, ау Даутэ ышхыгъ, игъусэхэми аригъэшхыгъ.

²⁷ ЕтӀанэ Исус ариӀуагъ: – Тхьэм шэмбэт мафэр цӀыфым пае къыгъэхъугъэ нахь, цӀыфыр шэмбэт мафэм пае къыгъэхъугъэп.

²⁸ Арышъ, ЦӀыф Лъэпкъым ы Къо шэмбэт мафэм итхьэмат.