Марк 13 - Къэбарышӏур (Инджыл)

ЯПШӀЫКӀУЩЭНЭРЭШЪХЬ Тхьэм иунэшхо зэрэзэхакъутэщтыр Исус къызэриӀуагъэр

¹ Исус Тхьэм иунэшхо къычӀэкӀыжьызэ, игъогу рыкӀохэрэм ащыщэу зыгорэм къыриӀуагъ: – Еплъ, дин гъэсакӀу! Мыхэр сыдэу мыжъо ин дэдэха! Мыхэр сыдэу унэ гъэшӀэгъонха!

² – Мы унэшхохэр олъэгъуха? – Исус ащ риӀожьыгъ. – МыжъуитӀу къызэтемынэжьэу пстэури къызэхэтэкъощт.

Къиныбэ щэчыным иублапӀ

³ Ащ ыуж Исус Тхьэм иунэшхо къыпэчӀынатӀэу Елеон Ӏуашъхьэм тесэу, Петри, Якъуби, Иуани, Индрыси язакъоу къызэнэжьхэм, къеупчӀыгъэх:

⁴ – КъытаӀу, о зыфэпӀогъэ Ӏофхэр сыдигъо къэхъущтых, ахэр зэкӀэ къызэрэхъущтхэм янэшанэри сыд фэда?

⁵ – Зыми шъукъызэримыгъэпцӀэщтым шъуфэсакъ, – ариӀоу ахэмэ ыублагъ Исус.

⁶ – Сэ сцӀэкӀэ зэджэжьхэу, «Сэры Христосыр» аӀоу, цӀыфхэу къэкӀощтхэр бэ хъущтых, цӀыфыбэхэри агъэпцӀэщтых.

⁷ Ау благъэми чыжьэми зэо къэбар зызэхэшъухыкӀэ, шъумыщын. А Ӏофхэр къэхъунхэ фае, ау дунаим икӀэух ащыгъум къэсыгъэгоп.

⁸ Зы лъэпкъыр адрэ лъэпкъым, зы пачъыхьагъури адрэ пачъыхьагъум езэонэу къэтэджыщт. ЧӀыпӀэ-чӀыпӀэхэми чӀыгур инэу ащысысыщт, гъаблэхэри къэхъущтых. А Ӏофхэр къиныбэ щэчыным иублапӀ.

⁹ – Ау шъо шъузыфэсакъыжь. Тхьэмэтэ хасэхэм апашъхьэ шъуаращэщт, синэгогухэми къамыщкӀэ къащышъоощтых. Сэ сигъогу шъузэрэрыкӀорэм пае, Ӏэшъхьэтетхэмрэ пачъыхьэхэмрэ апашъхьэ къэбарышӀум шыхьат шъуфэхъунэу шъукъиуцощт.

¹⁰ Ау ыпэ рапшӀэу къэбарышӀур лъэпкъ пстэуми арагъэӀун фае.

¹¹ ХьыкумэшӀым ыпашъхьэ шъуращэнэу шъузаубыткӀэ, «Сыда тӀощтыр?» шъуӀоу, ыпэ рапшӀэу шъумыгумэкӀ. А сыхьат дэдэм гущыӀэхэу Тхьэм ы Псэ ЛъапӀэ шъугухэм къарилъхьэхэрэр къашъуӀох; сыда пӀомэ, шъорэп къэгущыӀэщтыр, Тхьэм ы Псэ ЛъапӀ ары нахь.

¹² – ЦӀыфым ежь ыш, тым ежь илъфыгъэ тетыгъо зиӀэхэм арагъэукӀыным пае, арагъэубытыщт. Лъфыгъэхэри ны-тыхэм апэуцущтых, тетыгъо зиӀэхэми арагъэукӀыщтых.

¹³ Шъо сэ сцӀэ зэрэжъугъэлъапӀэрэм пае, цӀыф пстэуми шъуауджэгъущт. Ау кӀэухым нэсыфэ теубытагъэ зиӀэр мыкӀодэу Тхьэм къыгъэнэжьыщт.

Гузэжъогъушхор

¹⁴ – Ау «Зэхэзыкъутэрэ ГущыкӀыгъоу» пегъымбар Даниел зигугъу ышӀыгъэр зыдэщымытын фэе чӀыпӀэм щытэу зышъулъэгъукӀэ (еджэрэм къыгурэрэӀу), ащыгъум Иудей хэкум ис цӀыфхэр Ӏуашъхьэхэм ярэкӀолӀэжьых.

¹⁵ Унашъхьэм тетыри къызехыкӀэ, зыгорэ зыдихьынэу унэм ерэмыхьажь.

¹⁶ Губгъом итыми ищыгъын кӀыӀутелъ зыдихьынэу къерэмыгъэзэжь.

¹⁷ А мафэхэм бзылъфыгъэ лъэрмыхьхэмрэ сабый быдзашъо зиӀэхэмрэ гъогу мыгъо теуцощтых.

¹⁸ Мы Ӏофхэр кӀымафэм темыфэнхэу Тхьэм шъуелъэӀу;

¹⁹ сыда пӀомэ, а мафэхэм гузэжъогъушхо дунаир хэфэщт. Ащ фэдэ гузэжъогъушхо Тхьэм дунаир къызигъэхъугъэм щегъэжьагъэу джырэ нэсыфэ щыӀагъэп ыкӀи щыӀэжьыщтэп.

²⁰ Зиусхьаным а мафэхэр нахь макӀэ ымышӀыгъэхэмэ, зы цӀыфи мыкӀодэу къэнэжьыщтыгъэп. Ау ежь къыхихыгъэ цӀыфхэм яхьатыркӀэ Зиусхьаным а мафэхэр нахь макӀэ ышӀыгъ.

²¹ А мафэхэм «Мары, Христос мыщ дэжьым щыӀ» ыӀоу е «Христос модэ щыӀ» ыӀоу, зыгорэм къышъуиӀомэ, шъушӀошъ шъумыгъэхъу.

²² Христос нэпцӀхэмрэ пегъымбар нэпцӀхэмрэ къэлъэгъощтых. Ахэмэ нэшэнэ гъэшӀэгъонхэри Ӏофышхо гъэшӀэгъонхэри къагъэлъэгъощтых, амал щыӀэмэ, Тхьэм къыхихыгъэ цӀыфхэр агъэпцӀэнхэм пае.

²³ Ау шъо шъузфэсакъыжь, а Ӏоф пстэури къэхъуным ыпэкӀэ ахэмэ якъэбар къышъосӀуагъ.

ЦӀыф Лъэпкъым ы Къо дунаим къызэрэкӀожьыщтыр

²⁴ – Ау гузэжъогъушхом ыуж а мафэхэм тыгъэр ушӀункӀыжьыщт, мазэри къэнэфыжьыщтэп.

²⁵ Жъуагъохэри уашъом къефэхыщтых, уашъом щыӀэ кӀуачӀэхэри хъыещтых.

²⁶ Джащыгъум ЦӀыф Лъэпкъым ы Къо ошъуапщэхэм ахэтэу, лъэкӀышхорэ щытхъушхорэ иӀэхэу, къакӀоу цӀыфхэм алъэгъущт.

²⁷ Джащыгъум ЦӀыф Лъэпкъым ы Къо мэлэӀичхэр ыгъэкӀощтых, дунэе лъэныкъуиплӀым, зы ошъо чапэм къыщегъэжьагъэу адрэ ошъо чапэм нэс, ежь ицӀыфхэу къыхихыгъэхэр къыхащыхэзэ, ежь къыфаугъоижьынхэу.

Ынджыр чъыгым шъыпкъэу къыдгуригъаӀорэр

²⁸ – Ынджыр чъыгым къехъулӀэрэмкӀэ Ӏоф горэ зэжъугъашӀэ: икъутамэхэм псы къахахьэу, ытхьапэхэр къыпыкӀэхэ зыхъукӀэ, гъэмафэр зэрэблагъэр шъошӀэ.

²⁹ Ащ фэдэу шъори, мы Ӏофхэр къэхъухэу зышъулъэгъукӀэ, ЦӀыф Лъэпкъым ы Къо гъунэгъоу, къэлапчъэм дэжь зэрэщытыр зэжъугъашӀэ.

³⁰ Шъыпкъэр шъосэӀо, мы Ӏофхэр зэкӀэ къэхъунхэм ыпэкӀэ, мы лъэпкъыр кӀодыщтэп.

³¹ Уашъомрэ чӀылъэмрэ кӀодыжьыщтых, ау сэ сигущыӀэхэр кӀодыжьыщтхэп.

А мафэри а сыхьатри къызысыщтыр зыми ышӀэрэп

³² – Ау а мафэр е а сыхьатыр къызысыщтыр зыми ышӀэрэп. Уашъом щыӀэ мэлэӀичхэми ашӀэрэп, Тхьэм ы Къуи ышӀэрэп. Ты лъэпӀэ закъор ары ныӀэп ар зышӀэрэр.

³³ Шъузфэсакъыжь! Шъумычъыеу шъусакъ, Тхьэми шъуелъэӀу; сыда пӀомэ, а сыхьатыр къызысыщтыр шъушӀэрэпышъ ары!

³⁴ Ар зыфэдэр мары: чыжьэу къыкӀухьанэу лӀы горэ иунэ екӀы. Хэти ежь иӀоф ышӀэнэу иунэӀутхэм иунэ аӀэкӀелъхьэ, къэлапчъэм Ӏут къэрэгъулэми мычъыеу сакъынэу унашъо фешӀы.

³⁵ Арышъ, шъори шъумычъыеу шъусакъ; сыда пӀомэ, пчыхьэшъхьапэр арыми, чэщныкъор арыми, атэкъэӀогъур арыми, пчэдыжь нэфшъагъор арыми, унэр зиер къызыкӀожьыщтыр шъушӀэрэпышъ ары!

³⁶ Ар шъумышӀахэу къызыкӀожькӀэ, шъучъыеу, шъупэмыплъэу зыкъешъумыгъэгъот.

³⁷ Шъо къышъуасӀорэр зэпстэуми ясэӀо: шъумычъыеу шъусакъ!