Марк 12 - Къэбарышӏур (Инджыл)

ЯПШӀЫКӀУТӀОНЭРЭШЪХЬ СэнэшъхьэшӀэ бзаджэхэм яхьылӀэгъэ гъэсэпэтхыдэр

¹ Исус гъэсэпэтхыдэхэмкӀэ цӀыфхэм адэгущыӀэу ыублагъ: – ЛӀы горэм сэнэшъхьэ хатэ ыгъэтӀысхьагъ. Мыжъо чэукӀэ къышӀыхьи, сэнэшъхьэ фызалъэ хишӀыхьи, унэ плъэпӀэ лъаги дишӀыхьагъ. ЕтӀанэ сэнэшъхьэшӀ горэхэм хатэр аӀэкӀилъхьи, хымэ хэгъэгу кӀуагъэ.

² Сэнэшъхьэ пычыжьыгъор къызэсым, исэнэшъхьэ Ӏахь къаӀихынэу унэӀут горэ сэнэшъхьэшӀхэм адэжь ыгъэкӀуагъ.

³ Ау ахэмэ унэӀутыр къаубыти, къеохи, ӀэнэкӀэу къатӀупщыжьыгъ.

⁴ ЕтӀани сэнэшъхьэ хатэр зием нэмыкӀ унэӀут горэ сэнэшъхьэшӀхэм адэжь ыгъэкӀуагъ. Ащи ышъхьэ къеохи, лые къырахыгъ.

⁵ ЕтӀанэ нэмыкӀ унэӀут горэ ыгъэкӀуагъ; ар къаукӀыгъ; нэмыкӀ унэӀутыбэхэри ыгъэкӀуагъэх; зы купым къеуагъэх, адрэ купыри къаукӀыгъ.

⁶ – ШӀу ылъэгъурэ къо закъуи иӀагъ. «Сэ скъо лъытэныгъэ къыфашӀын» ыӀуи, ауж дэдэу ар сэнэшъхьэшӀхэм адэжь ыгъэкӀуагъ.

⁷ – Ау сэнэшъхьэшӀхэм зэраӀожьыгъ: «Мыры сэнэшъхьэ хатэр къызыфэнэжьыщтыр. Ар тэжъугъэукӀи, сэнэшъхьэ хатэр тэ къытфэнэжьыщт».

⁸ Аущтэу сэнэшъхьэ хатэр зием ыкъо къаубыти, къаукӀи, сэнэшъхьэ хатэм къыдадзыжьыгъ.

⁹ – Сэнэшъхьэ хатэр зием сыда ышӀэщтыр? – къыпигъэхъожьыгъ Исус. – Ар къэкӀонышъ, сэнэшъхьэшӀхэр ыгъэкӀодынхэшъ, сэнэшъхьэ хатэр нэмыкӀхэм аӀэкӀилъхьащт.

¹⁰ Тхьэм мы игущыӀэ тхыгъэхэм шъуяджагъэба: «Унэ зышӀыхэрэм зэрамыпэсэу чӀадзыжьыгъэ мыжъор унэр зыӀыгъырэ лъэпсэ дэдэ хъугъэ.

¹¹ Мыр Зиусхьаным иӀэшӀэгъэ Ӏоф, ари тэ гъэшӀэгъонэу къытфэлъагъо»?

¹² Тэурат егъэджэкӀо пащэхэмрэ дин пэщэшхохэмрэ мы гъэсэпэтхыдэр ежьхэм яхьылӀагъэу Исус къызэриӀотагъэр къагурыӀуагъэти, Исус къаубытынэу пылъыгъэх, ау цӀыф купышхом щыщынэщтыгъэхэти, ыуж икӀыжьхи, ӀукӀыжьыгъэх.

Хьакъулахь ахъщэм ехьылӀагъ

¹³ Ащ нэужым Тэурат егъэджэкӀо пащэхэмрэ дин пащэхэмрэ гущыӀэ горэм тыраубытэным пае, фарисейхэм ащыщхэри пачъыхьэ Ирод дезгъаштэхэрэм ащыщхэри Исус дэжь агъэкӀуагъэх.

¹⁴ Ахэр Исус дэжь къакӀохи, къыраӀуагъ: – Дин гъэсакӀу, шъыпкъагъэ зиӀэ лӀэу узэрэпсэурэри, цӀыфхэм аӀорэм узэримыгъапэрэри тэшӀэ, сыда пӀомэ, цӀыфхэм ятеплъэ уемыплъэу, цӀыф пстэури уизэфэд, шъыпкъагъэми тетэу, Тхьэм игъогу цӀыфхэм яогъашӀэ. Кайсарым хьакъулахь ахъщэр етты хъущта, мыхъущта? Еттына, етымытына?

¹⁵ Ау Исус ахэмэ янэпитӀугъэ гу лъитагъэти, ариӀуагъ: – Сыд пае сыхэжъугъэукъонэу шъупылъа? Зы динар ахъщэ къысфэшъухьи, сэжъугъэлъэгъу.

¹⁶ Динарыр къыфахьыгъ. – Хэта зисурэт мыщ итыри, хэта зыцӀэ мыщ тетхагъэри? – яупчӀыгъ Исус. – Кайсарыр ары, – къыраӀожьыгъ ахэмэ.

¹⁷ – Ащыгъум Кайсарым иер Кайсарым ешъутыжь, Тхьэм иери Тхьэм ешъутыжь, – джэуап аритыжьыгъ Исус. Ахэмэ ар бэу агъэшӀэгъуагъ.

Саддукейхэр лӀагъэхэм къэтэджыжьыкӀэ афэхъущтым ехьылӀагъэу Исус къызэреупчӀыгъэхэр

¹⁸ ЛӀагъэхэр къызэрэтэджыжьыщтхэр зышӀошъ мыхъухэрэ саддукейхэм ащыщхэр Исус къыбгъодахьэхи, къеупчӀыгъэх:

¹⁹ – Дин гъэсакӀу, пегъымбар Мусэ моущтэу къытфитхыгъ: «ЛӀы горэм ыш лӀэу, лъфыгъэ имыӀэу шъуз къыкӀэнмэ, ыш унагъо фишӀэным пае, а лӀым шъузабэр къыщэжьын фае».

²⁰ Зэкъошибл щыӀагъ. Ахэмэ ащыщэу апэрэм шъуз къыщагъ, ау лъфыгъэ имыӀэу дунаим ехыжьыгъ.

²¹ ЯтӀонэрэми а шъузыр къыщэжьыгъ. Ащи лъфыгъэ имыӀэу дунаим ехыжьыгъ, ящэнэрэри ащ фэдагъ.

²² Блыми а шъузыр къащэжьыгъ, ау лъфыгъэ яӀагъэп. Зэпстэуми ауж дэдэ шъузыри дунаим ехыжьыгъ.

²³ Джы лӀагъэхэр къызытэджыжьхэкӀэ, хэта зишъузыщтыр ар? Сыда пӀомэ, нэбгыриблыми шъузэу яӀагъэшъ ары?

²⁴ – Тхьэм игущыӀэ тхыгъэхэмрэ Тхьэм илъэкӀышхорэ зэрэшъумышӀэхэрэр арыба шъузкӀыхэукъорэр? – ариӀожьыгъ Исус ахэмэ.

²⁵ – Сыда пӀомэ, лӀагъэхэр къызытэджыжьхэкӀэ, шъуз къащэжьыщтэп, лӀыми дэкӀожьыщтхэп, уашъом щыӀэ мэлэӀичхэм афэдэщтых нахь.

²⁶ Ау лӀагъэхэр къызэрэтэджыжьыщтхэр пегъымбар Мусэ итхылъ зэритым шъуеджагъэба? Пэнэ куандэм икъэбар зэрыт чӀыпӀэм дэжь ит Тхьэр пегъымбар Мусэ къыдэгущыӀи, моущтэу къызэриӀуагъэр: «Сэры Ибрахьими, Исхьакъи, Якъуби я Тхьэр».

²⁷ Ащ къикӀырэр Тхьэр псаухэмрэ лӀагъэхэу зыфаӀохэрэмрэ зэря Тхьэр ары. Шъо инэу шъухэукъо.

Тхьэм иунашъохэм ащыщэу анахь лъэпӀэ дэдэр

²⁸ Тэурат егъэджэкӀо пащэхэм ащыщэу зыгорэм Исусрэ саддукейхэмрэ зэнэкъокъухэу зэхихыгъ, Исус дэгъоу пэгъокӀ къызэраритыгъэри ешӀэти, къыбгъодахьи, къеупчӀыгъ: – Тхьэм иунэшъо пстэуми ащыщэу анахь лъэпӀэ дэдэр тара?

²⁹ – Анахь лъэпӀэ дэдэр мыры: «ШъукъэдаӀу, израиль цӀыфхэр, Зиусхьанэу ти Тхьэ ары зизакъоу Зиусхьаныр;

³⁰ зэкӀэ о угурэ упсэрэкӀи, зэкӀэ уизэхэшӀыкӀыкӀи, зэкӀэ пкӀуачӀэкӀи Зиусхьанэу уи Тхьэ шӀу лъэгъу».

³¹ ЯтӀонэрэ унашъор мыры: «О пшъхьэ шӀу зэрэплъэгъурэм фэдэу, уигъунэгъуи шӀу лъэгъу». Мы унэшъуитӀум анахь унэшъо лъапӀэ щыӀэп, – къыӀожьыгъ Исус.

³² – Дэгъу, дин гъэсакӀу, – къыриӀожьыгъ Тэурат егъэджэкӀо пащэм Исус, – Тхьэр зэрэзакъор, ащ нэмыкӀэу Тхьэ зэрэщымыӀэри шъыпкъэу къэпӀуагъ.

³³ ЗэкӀэ о угурэ упсэрэкӀи, зэкӀэ уизэхэшӀыкӀыкӀи, зэкӀэ пкӀуачӀэкӀи ар шӀу плъэгъуныр, о пшъхьи шӀу зэрэплъэгъурэм фэдэу, уигъунэгъуи шӀу плъэгъуныр, Тхьэм пае агъэстырэ къурмэныпхъэ пстэумрэ тын пстэумрэ анахьи бэкӀэ нахь лъапӀ.

³⁴ Исус Тэурат егъэджэкӀо пащэм губзыгъэу пэгъокӀ къызэритыгъэр зелъэгъум, риӀуагъ: – О Тхьэм и Тетыгъошхо ыӀэчӀэгъ учӀэхьаным упэчыжьэп. Ащ къыщегъэжьагъэу нэмыкӀыкӀэ Исус къеупчӀыжьынэу хэти тегушхуагъэп.

Христос хэта зыкъор?

³⁵ Исус Тхьэм иунэшхо чӀэтэу, цӀыфхэм Тхьэм игущыӀэхэр аригъашӀэзэ, къыӀуагъ: – Тэурат егъэджэкӀо пащэхэм Христос Даутэ ыкъоу сыдэущтэу аӀора?

³⁶ Сыда пӀомэ, Тхьэм ы Псэ ЛъапӀэ ежь Даутэ ыгу къырилъхьи, моущтэу къыригъэӀуагъэба: «Тхьэу Зиусхьаным сэ си Зиусхьан къыриӀуагъ: О уипыихэр плъэкъо чӀэгъ къычӀэсэгъэуцофэхэ, сэ сиджабгъукӀэ къызгос»?

³⁷ – Ежь Даутэ Христос «си ЗиусхьанкӀэ» еджэ, – къыпигъэхъожьыгъ Исус. – Арэу зыхъукӀэ, сыдэущтэу Христос Даутэ ыкъо хъура? ЦӀыф купышхор игуапэу Исус едэӀущтыгъ.

Тэурат егъэджэкӀо пащэхэм ямысагъэ Исус къызэрэхигъэщыгъэр

³⁸ Исус цӀыфхэм Тхьэм игущыӀэхэр аригъашӀэзэ, къыӀуагъ: – Тэурат егъэджэкӀо пащэхэм шъуафэсакъ. Ахэмэ шъошэ кӀыхьэхэр ащыгъхэу къакӀухьаныр якӀас. ЗэӀукӀэхэми ежьхэм аӀэхэм цӀыфхэр щарагъэбэунхэри,

³⁹ синэгогухэм цӀыфхэр зыщызэӀукӀэхэкӀи, гухэхъо Ӏанэхэм тхьэмэтэ тӀысыпӀэхэр щаубытынхэри якӀас.

⁴⁰ Шъузабэхэм яунэхэри атырахых. ЦӀыфхэм агъэшӀэгъоным пае, тхьэлъэӀухэр агъэкӀыхьэх. Тхьэм ахэр инэу ыпщынэжьыщтых.

Шъузабэм ахъщэу Тхьэм пае ытыгъэр

⁴¹ ЦӀыфхэм Тхьэм тын фашӀэу, ахъщэхэр зыдалъхьэрэ пхъуантэхэм апашъхьэ Исус тӀысыгъэу, ахъщэхэр зэрэдалъхьэхэрэм еплъыщтыгъ. ЦӀыф баибэхэм ахъщэ бэу далъхьагъ.

⁴² Шъузэбэ тхьамыкӀэ горэ къакӀуи, гъоплъэ ахъщитӀу пхъуантэм дилъхьагъ. Ащ дилъхьагъэр зы чапыч фэдиз мэхъу.

⁴³ Джащыгъум Исус игъогу рыкӀохэрэм къяджи, ариӀуагъ: – Шъыпкъэр шъосэӀо, мы шъузэбэ тхьамыкӀэм изакъоу адрэ дэзылъхьэгъэ цӀыф пстэуми анахьи нахьыбэ дилъхьагъ;

⁴⁴ сыда пӀомэ, ахэмэ ахъщэу къялыжьыгъэм щыщ далъхьагъэр, ау а шъузабэм анахьыбэ дилъхьагъ – зэрэпсэунэу зэкӀэ мэкӀэ тӀэкӀоу иӀэр.