Марк 11 - Къэбарышӏур (Инджыл)

ЯПШӀЫКӀУЗЭНЭРЭШЪХЬ Щытхъушхо иӀэу Исус Ерусалим зэрэдэхьагъэр

¹ Исусрэ игъогу рыкӀохэрэмрэ Ерусалим игъунэгъу хъугъэх. Елеон Ӏуашъхьэм Ӏус къуаджэхэу Бет-Фагиерэ Бет-Аниерэ къазынэсхэм, Исус игъогу рыкӀохэрэм ащыщхэу нэбгыритӀу апэ ыгъэкӀуагъ,

² моущтэу ариӀозэ: – ШъупэчӀынэтӀэ къуаджэм шъудахь. Шъузэрэдахьэу, щыд къунанэу цӀыф ныбжьи зытемытӀысхьагъэр епхыгъэу шъуапэ къифэщт. Ар къэшъутӀати, моу къашъущэ.

³ «Сыда шъушӀэрэр?» ыӀоу зыгорэ къышъоупчӀымэ, «Зиусхьаныр ащ фай» ешъуӀуи, занкӀэу къэшъущэнэу фит шъуишӀыщт.

⁴ Ахэр кӀохи, урамым тетэу къэлапчъэ горэм епхыгъэу, щыд къунан горэ къагъоти, къыкӀэратӀытыкӀыгъ.

⁵ А чӀыпӀэм щытхэм ащыщхэм къараӀуагъ: – Сыд пае а щыд къунаныр къэшъутӀатэра?

⁶ Исус зэриӀуагъэм фэдэу пэгъокӀ аратыжьи, адрэхэм щыд къунаныр Ӏуащынэу фит къашӀыгъэх.

⁷ Щыд къунаныр Исус дэжь къащи, ящыгъынхэр тыралъхьагъ. ЕтӀанэ Исус щыд къунаным тетӀысхьагъ.

⁸ ЦӀыфыбэхэм ящыгъынхэр гъогум тыраубгъощтыгъ, нэмыкӀхэми чъыг къутамэхэр хатэхэм къащыпаупкӀыхэти, гъогум тыралъхьэщтыгъэх.

⁹ ЦӀыфхэу Исус ыпэ итхэу кӀощтыгъэхэми, ыуж итыгъэхэми мэкъэшхокӀэ аӀощтыгъ: – Хьусаннэ! Зиусхьаным ыцӀэкӀэ къакӀорэм щытхъушхор ий!

¹⁰ Тятэшхоу Даутэ и Тетыгъоу къэкӀощтым щытхъушхор ий! Хьусаннэ! Анахь Лъагэм щытхъушхор ий!

¹¹ Исус Ерусалим дахьи, Тхьэм иунэшхо ихьагъ. Зэпстэури къызеплъыхьэм, мафэр хэкӀотагъэти, къалэм дэкӀи, игъогу рыкӀорэ нэбгырэ пшӀыкӀутӀур игъусэу къуаджэу Бет-Ание кӀуагъэ.

Исус ынджыр чъыгым зэребгыгъэр

¹² ЯтӀонэрэ мафэм Бет-Ание зыдэкӀыжьхэм, Исус къэмэлэкӀагъ.

¹³ Тхьапэхэр зыпыт ынджыр чъыг чыжьэкӀэ зелъэгъум, зыгорэ пытмэ еплъынэу кӀуагъэ. Чъыгым зынэсым, тхьапэ нэмыкӀ зи пымытэу къычӀэкӀыгъ, сыда пӀомэ, ынджырым игъуагъэпти ары.

¹⁴ Аущтэу зэхъум, Исус чъыгым риӀуагъ: – Непэ щегъэжьагъэу о къыппыкӀэу егъашӀэми зыми зи ерэмышх. Игъогу рыкӀохэрэм Исус къыӀуагъэр зэхахыгъ.

Исус щэн-щэфакӀохэр Тхьэм иунэшхо къызэрэчӀифыгъэхэр

¹⁵ ЕтӀанэ Ерусалим нэсыгъэх. Исус Тхьэм иунэшхо чӀахьи, щэн-щэфакӀохэу чӀэтхэр къычӀифыхэу ыублагъ. Ахъщэ зыхъожьхэрэм яӀанэхэмрэ тхьаркъо зыщэхэрэм япхъэнтӀэкӀухэмрэ зэпыригъэзагъэх.

¹⁶ Тхьэм иунэшхо кӀоцӀыкӀэ зыми зи щызэпырихыныр ыдагъэп.

¹⁷ ЦӀыфхэм Тхьэм игущыӀэхэр аригъашӀэхэзэ, мыщ фэдэу ариӀуагъ: – Тхьэм къызэриӀорэр игущыӀэ тхыгъэхэм арытба: «Сэ сиунэ лъэпкъ пстэуми тхьэлъэӀупӀэ афэхъущт?» Ау шъо «хъункӀэкӀо гъэбылъыпӀэм» фэдэ шъушӀыгъэ.

¹⁸ Дин пэщэшхохэмрэ Тэурат егъэджэкӀо пащэхэмрэ Исус къыӀуагъэхэр зызэхаххэм, ар зэрагъэкӀодыщт шӀыкӀэм лъыхъухэу аублагъ; сыда пӀомэ, Исус Ӏофхэу аригъашӀэщтыгъэхэр цӀыф купышхом ыгъэшӀагъоти, дин пэщэшхохэмрэ Тэурат егъэджэкӀо пащэхэмрэ Исус щыщынэщтыгъэх.

¹⁹ ЕтӀанэ пчыхьэ зэхъум, Исусрэ игъогу рыкӀохэрэмрэ къалэм дэкӀыжьыгъэх.

Ынджыр чъыг гъугъэр

²⁰ Пчэдыжьым ынджыр чъыгым къызыблэкӀыжьхэм, ылъапсэ нэсэу ар зэрэгъугъэр алъэгъугъ.

²¹ Петрэ ащ дэжьым Исус ыӀогъагъэр ыгу къэкӀыжьи, къыриӀуагъ: – Рабби, еплъ, ынджыр чъыгэу узэбгыгъэр гъугъэ!

²² – ТхьэмкӀэ шӀошъхъуныгъэ шъугухэм арыжъугъэлъ, – ариӀожьыгъ Исус ахэмэ.

²³ – Шъыпкъэр шъосэӀо, зыгорэм ыгу щэч къыримыгъахьэу, къыӀорэр хъункӀэ шӀошъхъуныгъэ иӀэу, мы Ӏуашъхьэм «ЗыкъэӀэти, хым зыхадз» зиӀокӀэ, ар къыдэхъущт.

²⁴ Арышъ, шъосэӀо, сыд щыщкӀи Тхьэм шъуелъэӀумэ, Тхьэм къызэрэшъуфишӀэщтымкӀэ шӀошъхъуныгъэ шъугухэм арыжъугъэлъи, къышъуфишӀэщт.

²⁵ Тхьэм шъузелъэӀукӀи, гукъанэ зыгорэм фышъуиӀэмэ, фэжъугъэгъу, шъуя Тэ лъапӀэу уашъом щыӀэм шъо мыхъунхэу шъушӀагъэхэр къышъуфигъэгъунхэм пае.

²⁶ Ау шъо фэшъумыгъэгъумэ, шъуя Тэ лъапӀэу уашъом щыӀэм шъо мыхъунхэу шъушӀагъэхэри къышъуфигъэгъущтхэп.

Исус итетыгъо къезытыгъэмкӀэ джурт тхьэматэхэр къызэреупчӀыгъэхэр

²⁷ Джыри зэ Исусрэ игъогу рыкӀохэрэмрэ Ерусалим къэкӀожьыгъэх. Исус Тхьэм иунэшхо къыкӀухьэзэ, дин пэщэшхохэри, Тэурат егъэджэкӀо пащэхэри, нахьыжъхэри къыбгъодахьэхи,

²⁸ къыраӀуагъ: – Мы Ӏофхэр пшӀэнхэу фитыныгъэр тыда къыздипхыгъэр е ахэр пшӀэнхэу тетыгъор хэта о къыозытыгъэр?

²⁹ – Сэри шъо Ӏоф горэкӀэ сышъоупчӀыщт, – ариӀуагъ Исус. – ПэгъокӀ къысэшъутыжьмэ, сэри шъосӀон мы Ӏофхэр сшӀэнхэу фитыныгъэр къыздисхыгъэр.

³⁰ Иуан цӀыфхэр ыумэхъынхэу хэта къэзгъэкӀуагъэр? ЦӀыфхэр ара, хьауми Тхьэр ара? ПэгъокӀ къысэшъут.

³¹ – «Тхьэр ары Иуан къэзгъэкӀуагъэр» тӀомэ, ежь къытиӀожьыщт: «Адэ, сыда Иуан къыӀуагъэхэр шъушӀошъ зыкӀэмыхъугъэр?» – аӀозэ, ахэр зэупчӀыжьыгъэх.

³² – «ЦӀыфхэр ары Иуан къэзгъэкӀуагъэхэр» етӀожьына? – ау ахэр цӀыфхэм ащыщынэщтыгъэх; сыда пӀомэ, цӀыф пстэуми Иуан шъыпкъэу пегъымбарэу алъытэщтыгъэти ары.

³³ Арыти, – ТшӀэрэп, – къыраӀожьыгъ Исус. – Ащыгъум сэри шъосӀощтэп мы Ӏофхэр сшӀэнхэу фитыныгъэр къыздисхыгъэр, – ариӀожьыгъ Исус ахэмэ.