Марк 10 - Къэбарышӏур (Инджыл)

ЯПШӀЭНЭРЭШЪХЬ Шъхьэгьусэр тӀупщыжьыным ехьылӀагъ

¹ Исус а лъэныкъом икӀыжьи, Иудей хэкоу Иордан псыхъом иадрабгъу щыӀэм кӀуагъэ. Джыри зэ цӀыф купышхохэр ыдэжь къыщызэрэугъоигъэх, зэрихабзэуи Исус ахэмэ Тхьэм игущыӀэхэр аригъашӀэхэу ыублагъ.

² Джащыгъум фарисей заулэ Исус къыбгъодахьи, хагъэукъоным пае, къеупчӀыгъэх: – ЛӀым ишъуз ытӀупщыжьыныр хабзэкӀэ хъущта?

³ – Пегъымбар Мусэ унашъоу сыда къышъуфишӀыгъэр? – ариӀожьыгъ Исус.

⁴ – ЛӀы горэм ишъуз зэритӀупщыжьырэ тхылъ ытхымэ, шъузыр ытӀупщыжьынэу пегъымбар Мусэ фит ышӀыгъ, – къаӀожьыгъ ахэмэ.

⁵ – Шъуигуркъагъэ пае пегъымбар Мусэ а унашъор къышъуфитхыгъ, – ариӀожьыгъ Исус.

⁶ – Ау ублапӀэм дэжь Тхьэм щыӀэр зэкӀэ къызегъэхъум, «хъулъфыгъэрэ бзылъфыгъэрэ къыгъэхъугъ».

⁷ «Ащ къыхэкӀыкӀэ хъулъфыгъэм яти яни ыбгынэнхэшъ, ишъуз гъусэ фэхъунышъ,

⁸ итӀур зыпкъ хъущтых». Аущтэу ахэр зыпкъых нахь, пкъитӀу хъужьыхэрэп.

⁹ Арышъ, а тӀоу Тхьэм гъусэ зэфишӀыгъэхэр цӀыфым зэгуигъэкӀыжь хъущтэп.

¹⁰ ЕтӀани унэм исхэу, игъогу рыкӀохэрэр а ӀофымкӀэ Исус къеупчӀыгъэх.

¹¹ Исус ариӀуагъ: – Хэтми зишъуз зытӀупщыжьэу, нэмыкӀ бзылъфыгъэ къэзыщэжьырэм апэрэ шъузымкӀэ зинэ ышӀагъэу мэхъу.

¹² Шъузыри илӀ гокӀыжьэу нэмыкӀ лӀы горэм дэкӀожьмэ, ащи зинэ ышӀагъэу мэхъу.

Исусрэ сабыйхэмрэ

¹³ ЕтӀанэ цӀыфхэм сабыйхэр Исус къыфащагъэх, Тхьэм ынэшӀу ахэмэ къащифэным пае, Исус ыӀэхэр атырилъхьэнхэу Ау Исус игъогу рыкӀохэрэм ахэмэ афадагъэп.

¹⁴ Исус ащ гу зылъетэм, ыгу ябгъэу ариӀуагъ: – Сабыйхэр садэжь къэрэкӀох, пэрыохъу шъуафэмыхъу, сыда пӀомэ, ащ фэдэхэр Тхьэм и Тетыгъошхо ыӀэчӀэгъ чӀэтых.

¹⁵ Шъыпкъэр шъосэӀо, сабыим Тхьэм и Тетыгъошхо зэридэрэм фэдэу, хэтми Тхьэм и Тетыгъошхо зымыдэрэр а Тетыгъошхом ыӀэчӀэгъ чӀэхьащтэп.

¹⁶ ЕтӀанэ Исус сабыйхэм ӀаплӀ арищэкӀи, ыӀэхэр атырилъхьи, Тхьэм ынэшӀу къащифэнэу афелъэӀугъ.

КӀэлэ баир

¹⁷ Исус гъогум зытехьажьым, ыдэжь лӀы горэ къачъи, лъэгонджэмышъхьэкӀэ ыпашъхьэ къитӀысхьи, къеупчӀыгъ: – Дин гъэсэкӀо дэгъу, мыкӀодыжьын щыӀэныгъэ ӀахьышӀоу къыслъыӀэсыным пае, сыда сшӀэщтыр?

¹⁸ – Сыда дэгъукӀэ укъызкӀысаджэрэр? – риӀожьыгъ Исус а лӀым. – Тхьэм нэмыкӀэу зи дэгъу щыӀэп.

¹⁹ Тхьэм иунашъохэр ошӀэх: «ЦӀыф умыукӀ, зинэ умышӀэ, умытыгъу, нэмыкӀ цӀыфхэм пцӀы атемылъхь, цӀыфхэм яӀэр гъэпцӀагъэкӀэ къатемых, уятэрэ уянэрэ лъытэныгъэ афэшӀ».

²⁰ – Дин гъэсакӀу, – къыриӀожьыгъ а лӀым Исус, – сикӀэлэгъу къыщегъэжьагъэу ахэр зэкӀэ сэгъэцакӀэх.

²¹ Джащыгъум Исус а лӀым еплъи, ыгу еӀуи, риӀожьыгъ: – УзыщыкӀэрэр зы. КӀуи, уиӀэ пстэури щэжьи, ахъщэр тхьамыкӀэхэм ят. Джащыгъум уашъом мылъкушхо щыуиӀэ хъущт. ЕтӀанэ къакӀуи, сауж къырыкӀу.

²² Ар Исус къызеӀом, лӀым ынэгу къызэхахьи, ыгу къеоу ӀукӀыжьыгъ, сыда пӀомэ, мылъкушхо иӀагъэти ары.

²³ Исус зиплъыхьи, игъогу рыкӀохэрэм ариӀуагъ: – Мылъку зиӀэхэмкӀэ Тхьэм и Тетыгъошхо ыӀэчӀэгъ чӀэхьанхэр сыдэу къин!

²⁴ Исус игъогу рыкӀохэрэм а гущыӀэхэр зызэхаххэм, лъэшэу агъэшӀэгъуагъ. Ау Исус джыри зэ ариӀуагъ: – Синыбджэгъухэр, мылъкум щыгугъыхэрэмкӀэ Тхьэм и Тетыгъошхо ыӀэчӀэгъ чӀэхьанхэр сыдэу къин!

²⁵ Баир Тхьэм и Тетыгъошхо ыӀэчӀэгъ чӀэхьаным нахьи, махъшэр мэстанэм икӀыныр нахь ӀэшӀэх.

²⁶ Исус игъогу рыкӀохэрэм ар нахьыбэу агъэшӀагъуи, зэраӀожьыгъ: – Ащыгъум, ежь зимыгъэкӀодэу, хэт зыкъэзгъэнэжьын зылъэкӀыщтыр?

²⁷ Исус ахэмэ яплъи, къыӀуагъ: – ЦӀыфхэм ежьхэм замыгъэкӀодэу зыкъагъэнэжьын алъэкӀырэп, ау Тхьэм елъэкӀы; сыда пӀомэ, Тхьэм ымылъэкӀын Ӏоф зи щыӀэп.

²⁸ – Моу къэдаӀолъ, тэ тиӀэгъэ пстэури къэдгъани, о уауж тыкъихьагъ, – Петрэ Исус риӀоу ыублагъ.

^29-30 – Шъыпкъэр шъосэӀо, – къыӀуагъ Исус, – хэт щыщми е зиунэ, е зышхэр, е зышыпхъухэр, е зянэ, е зятэ, е зишъуз, е зилъфыгъэхэр, е зичӀыгухэр сэщ паерэ къэбарышӀум паерэ къэзгъэнагъэу, джы мы дунаим унэхэр, шыхэр, шыпхъухэр, ныхэр, лъфыгъэхэр, чӀыгухэр фэдишъэу щызымыгъотыжьыщт цӀыф зи щыӀэп, а цӀыфми къиныбэ рагъэщэчыщт. Адрэ дунаими мыкӀодыжьын щыӀэныгъэ щыриӀэ хъущт.

³¹ Ау апэ итхэм ащыщхэу бэхэр ауж къинэщтых, ауж итхэри апэ хъущтых.

Ежь зэраукӀыщтри лӀагъэхэм къызэрахэтэджыкӀыжьыщтри ящэнэрэу Исус къызэриӀуагъэр

³² ЕрусалимкӀэ дэкӀуаехэу гъогум зытетхэм, игъогу рыкӀохэрэм апэ итэу Исус кӀуагъэ. Ахэмэ агъэшӀагъоу, щынагъо агухэм арылъэу, ыуж итхэу кӀощтыгъэх. Исус джыри зэ игъогу рыкӀорэ нэбгырэ пшӀыкӀутӀур зы лъэныкъокӀэ Ӏуищыхи, ежь къехъулӀэщтыр ариӀоу ыублагъ.

³³ – Мары, тэ джы ЕрусалимкӀэ тыдэкӀуае, – ыӀуагъ. – Ащ ЦӀыф Лъэпкъым ы Къо дин пэщэшхохэмрэ Тэурат егъэджэкӀо пащэхэмрэ щаӀэкӀэхьащт. Ахэмэ ежь укӀ къытыралъхьащт, хымэ лъэпкъхэми аӀэкӀалъхьащт.

³⁴ Ахэр къыкӀэнэкӀэщтых, къытеужъунтхэщтых, къамыщкӀэ къеощтых, аукӀыщт. Мэфищ нэужми ежь лӀагъэхэм къахэтэджыкӀыжьыщт.

Якъубэрэ Иуанрэ Исус зыкӀелъэӀугъэхэ Ӏофыр

³⁵ Зебедей ыкъохэу, Якъубэрэ Иуанрэ Исус къыбгъодахьэхи, къыраӀуагъ: – Дин гъэсакӀу, тэ тыкъызэрэолъэӀущтыр къытфэпшӀэнэу тыфай.

³⁶ – Сыда къышъуфэсшӀэнэу шъузыфаер? – ариӀуагъ Исус.

³⁷ – О уищытхъушхо къызыскӀэ, зыр уиджабгъукӀэ адрэр уисэмэгубгъукӀэ тыкъэтӀысынэу фит тышӀ, – къыраӀожьыгъ ахэмэ.

³⁸ – Шъо шъузыкӀэлъэӀурэр шъушӀэрэп, – ариӀуагъ Исус. – Къиным ишъуалъэ итэу сэ сызэшъощтым шъо шъуешъон шъулъэкӀыщта, хьауми цӀыфхэм Ӏаеу сызэраумэхъыщт шӀыкӀэм фэдэу, зяжъугъэумэхъын шъулъэкӀыщта?

³⁹ – ТлъэкӀыщт, – къыраӀожьыгъ ахэмэ. – Къиным ишъуалъэ итэу сэ сызэшъощтым шъори шъуешъощт, – ариӀуагъ Исус. – ЦӀыфхэм сэ Ӏаеу сызэраумэхъыщт шӀыкӀэм фэдэу, шъори шъуаумэхъыщт.

⁴⁰ Ау сэ сиджабгъукӀэ е сисэмэгубгъукӀэ шъукъэтӀысынэу фит шъусшӀын слъэкӀыщтэп. А тӀысыпӀэхэр Тхьэм зыфигъэхьазырыгъэхэ цӀыфхэм яй.

⁴¹ Адрэ нэбгырипшӀэу Исус игъогу рыкӀохэрэм ар зызэхахым, Якъубрэ Иуанрэ афэгубжыгъэх.

⁴² Ащ дэжьым Исус игъогу рыкӀохэрэм къяджагъ. – Шъо шъошӀэ, – ариӀуагъ Исус, – мы дунаим пщыкӀэ заджэхэрэр цӀыфхэм апшъэ зэрэдэсхэрэри, ятхьэматэхэм цӀыфхэм тетыгъо зэрафыряӀэрэри шъошӀэ.

⁴³ Шъо шъузэрэзэфыщытын фаер арэп. Шъуащыщэу ины хъу зышӀоигъор Ӏофтабгэ къышъуфэхъун фае.

⁴⁴ Шъуащыщэу апэ ит зышӀоигъори пстэуми пщылӀ афэхъун фае.

⁴⁵ Сыда пӀомэ, ЦӀыф Лъэпкъым ы Къо цӀыфхэм яшӀуагъэ ежь зэригъэкӀыжьыныр арэп къызкӀэкӀуагъэр, ежь ишӀуагъэ цӀыфхэм аригъэкӀыныр, цӀыфыбэхэми апае ыпсэ шъхьэщэфыжьэу ытыныр ары нахь.

Бар-Тимай зыцӀэ нэшъур Исус зэригъэхъужьыгъэр

⁴⁶ Исусрэ игъогу рыкӀохэрэмрэ къалэу Ерихон къэкӀуагъэх. ЦӀыф купышхо ягъусэу ахэр къалэм дэкӀыжьхэ зэхъум, Тимей ыкъоу Бар-Тимай зыцӀэ лъэӀокӀо нэшъу горэ гъогу напцэм Ӏусыгъ.

⁴⁷ Назарет щыщ Исус зэрэблэкӀырэр зызэхехым, мэкъэшхокӀэ къэджагъ: – Даутэ ы Къо Исус, гукӀэгъу къысфэшӀ!

⁴⁸ ЦӀыфыбэхэм амыдэу «Щыгъэт!» – раӀуагъ. Ау ар джыри нахь мэкъэшхокӀэ къэджагъ: – Даутэ ы Къу, гукӀэгъу къысфэшӀ!

⁴⁹ Исус къызэтеуцуи, къыӀуагъ: – Моу шъукъедж. – Умыщын, къэтэдж, ежь къыоджэ, – аӀуи, нэшъум къеджагъэх.

⁵⁰ Нэшъум ищыгъын кӀыӀутелъ зытыридзи, къызщылъэти, Исус дэжь къэкӀуагъ.

⁵¹ – Сыда къыпфэсшӀэнэу узыфаер? – риӀуагъ Исус а лӀым. – Рабби, сынэхэр къэгъэплъэжь, – къыриӀуагъ нэшъум.

⁵² – КӀожь, – риӀуагъ Исус. – О уишӀошъхъуныгъэ уигъэхъужьыгъ. Ардэдэм нэшъум ынэхэр къэплъэжьыгъэх, Исуси ыуж итэу гъогум техьагъ.