Лука 1 - Къэбарышӏур (Инджыл)

АПЭРЭШЪХЬ Мы тхылъыр зыкӀэстхыгъэр

¹ Хъугъэ-шӀагъэхэу тапашъхьэ щыхъугъэхэм якъэбархэр атхыжьынхэу цӀыфыбэхэр пылъыгъэх.

² Ахэмэ атхыгъэхэр цӀыфхэу а Ӏофхэр ублапӀэм щегъэжьагъэу нэкӀэ зылъэгъугъэхэмрэ Тхьэм игущыӀэхэм афэлэжьагъэхэмрэ къызэрэтаӀотэжьыгъэхэм атетэу ары.

³ Аущтэу сэри мы хъугъэ-шӀэгъэ Ӏоф пстэуми яублапӀэ щегъэжьагъэу сыфэсакъыпэу зысэгъэунэфым, о, лъытэныгъэ зифэшъошэ Теофил, зэкӀэлъыкӀоу пфэстхынхэу тесыубытагъ,

⁴ о узфагъэсагъэхэм яшъыпкъагъэ пшӀэным пае.

УмэхъэкӀо Иуан къызэрэхъущтыр мэлэӀич ДжэбраӀил къызэриӀуагъэр

⁵ Иудей хэкум ипачъыхьэ Ирод имафэхэм Зэчрей зыцӀэ дин пащэ горэ щыӀагъ. Ар АбиекӀэ заджэхэрэ дин пэщэ купым хэтыгъ. Ишъхьэгъусэ Елизабетэ Хьарунэ къытекӀыгъэ цӀыфхэм ащыщыгъ.

⁶ ТӀуми Тхьэу ЗиусхьанымкӀэ шъыпкъагъэ яӀэу, иунашъохэмрэ ихабзэхэмрэ атетхэу, зэрагъэмысэнхэ Ӏоф зи амышӀэу псэущтыгъэх.

⁷ Лъфыгъэ яӀагъэп, сыда пӀомэ, Елизабетэ сабый хэкӀыщтыгъэп, тӀури аныбжьыкӀэ хэкӀотэгъагъэх.

⁸ Зэчрей зыхэт дин пэщэ купым Тхьэм иунэшхо щылэжьэнэу ичэзыу къызынэсым, Тхьэм ыпашъхьэ Зэчрей дин пэщэ Ӏоф щишӀэу ыублагъ.

⁹ Дин пащэхэм яхабзэ тетэу пхъэдз зырадзэм, Зиусхьаным иунэшхо кӀоцӀ чӀэхьанышъ, мэ ӀэшӀу зыпихырэ уцыр Тхьэм пае ыгъэстынэу Зэчрей къытефагъ.

¹⁰ Уцыр зыщагъэстын фэе сыхьатыр къэсыгъ. Зэчрей уцыр егъэстыфэ, зэкӀэ цӀыфхэр Тхьэм иунэшхо щагу Тхьэм щелъэӀущтыгъэх.

¹¹ Джащыгъум уц гъэстыпӀэм иджабгъукӀэ щытэу, Зиусхьаным имэлэӀич Зэчрей къыщыфэлъэгъуагъ.

¹² Зэчрей ар зелъэгъум, къащти, щынэгъэшхо хэфагъ.

¹³ Джащыгъум мэлэӀичыр къыдэгущыӀагъ: – Укъэмыщт, Зэчрей. УилъэӀу Тхьэм къызэхихыгъ. Уишъхьэгъусэ Елизабетэ къо къыфэхъущт, ащи Иуан цӀэу о фэуусыщт.

¹⁴ Ар оркӀэ гушӀогъошхорэ тхъэгъошхорэ хъущт, ар къызэрэхъугъэм пае, цӀыфыбэхэри гушӀощтых.

¹⁵ ЗиусхьанымкӀэ лӀышхощт, сэнэпсымрэ узгъэутэшъощт шъонымрэ яшъощтэп, янэ ышъо зыхидзагъэм щегъэжьагъэуи Тхьэм ы Псэ ЛъапӀэ инэу ыгу илъыщт.

¹⁶ Израиль цӀыфыбэхэри Зиусхьанэу я Тхьэ игъогу къытыригъэхьажьыщтых.

¹⁷ Пегъымбар Иляс ыгу Тхьэм ы Псэ ЛъапӀэ зэрилъыгъэм фэдэу, ащ ыгу илъэу, Иляс кӀуачӀэ зэриӀагъэм фэдэуи кӀуачӀэ иӀэу, Зиусхьаныр къэкӀоным ыпэкӀэ, ар къэкӀощт. Тыхэмрэ къохэмрэ агухэмкӀэ зэфэгъэзагъэхэу ышӀыщтых, Тхьэм емыдэӀухэри шъыпкъагъэ зиӀэ цӀыфхэм ягъогу тыригъэхьащтых. Аущтэу Зиусхьаным фэшъошэ лъэпкъ хъунэу ащ израиль лъэпкъыр ыгъэхьазырыщт.

¹⁸ – Ар зэрэшъыпкъэр сыдэущтэу сшӀэщта? – риӀуагъ Зэчрей мэлэӀичым. – Сэ лӀыжъы сыхъугъ, сишъхьэгъуси ыныбжькӀэ хэкӀотагъ.

¹⁹ – Тхьэм ыпашъхьэ ит мэлэӀич ДжэбраӀилыр сэры, – къыриӀожьыгъ мэлэӀичым. – Мы къэбарышӀур осӀоным пае, сыкъыбдэгущыӀэнэу Тхьэм сыкъыгъэкӀуагъ.

²⁰ Джы сэ къыосӀуагъэр пшӀошъ хъугъэпышъ, а зыфэсӀогъэ Ӏофхэр охъухэфэ, умыгущыӀэшъоу, бзакоу ущыӀэщт. Игъо къызысыкӀэ, ахэр къэхъунхэ фае.

²¹ Зэчрей Тхьэм иунэшхо къызэрэчӀэмыкӀыжьырэр цӀыфхэм агъэшӀагъоу ащ нэсыфэ ежэщтыгъэх.

²² ЕтӀанэ Зэчрей Тхьэм иунэшхо къызычӀэкӀыжьым, цӀыфхэм къадэгущыӀэн ылъэкӀыгъэп. Джащыгъум Тхьэм иунэшхо зыгорэ къызэрэщыфэлъэгъуагъэр къашӀагъ. Зэчрей зыфаер ыӀэхэмкӀэ къагуригъаӀоу, бзакоу къэнагъ.

²³ Тхьэм иунэшхо Ӏофэу щишӀэщтыгъэхэм ямафэхэр зытекӀыхэм, Зэчрей иунэ ыгъэзэжьыгъ.

²⁴ Бэ темышӀэу ишъхьэгъусэ Елизабетэ ышъо сабый хидзагъ, мэзитфырэ цӀыфмэ къахэхьагъэп.

²⁵ «Зиусхьаным мыр сэ къысфишӀагъ. Мы мафэхэм ынэшӀу къысщифэу, цӀыфмэ апашъхьэ симыгъуагъэ щыстырихыгъ», – ыӀощтыгъ ащ.

МэлэӀичэу ДжэбраӀил Исус къызэрэхъущтыр Мерэм къызэрэриӀуагъэр

²⁶ Елизабетэ зылъэрмыхьэр мэзих хъугъэу Тхьэм имэлэӀич ДжэбраӀил Галилей хэкум щыщэу, къалэу Назарет къыгъэкӀуагъ.

²⁷ Ар къызфигъэкӀуагъэр Мерэм зыцӀэ пшъашъэр ары. Юсыфэу пачъыхьэ Даутэ къытекӀыгъэ цӀыфхэм ащыщым а Мерэм къыщэнэу ыгъэнэфэгъагъ.

²⁸ Мерэм зыдэщыӀэм мэлэӀичыр къакӀуи, къыӀуагъ: – ГушӀо, о Тхьэм ынэшӀу зыщифагъэр, Зиусхьаныр уигъусэ!

²⁹ МэлэӀичым къыӀуагъэм Мерэм лъэшэу гузэжъогъу хидзагъ, а шӀуфэс гущыӀэу къыриӀуагъэм къикӀырэми егупшысагъ.

³⁰ – Укъэмыщт, Мерэм, – къыриӀуагъ ащ мэлэӀичым, – Тхьэм ынэшӀу къыпщифагъ.

³¹ О пшъо сабый хидзэнышъ, къо къыпфэхъущт. Ащ Исус цӀэу о фэуусышт.

³² Ар цӀыфышхо хъущт, анахь Лъагэм ы КъокӀи еджэщтых. Я Тэшхо пачъыхьэ Даутэ итӀысыпӀэ лъапӀэ Зиусхьан Тхьэм ащ къыритыщт,

³³ мыкӀодыжьын тетыгъуи Якъубэ илъэпкъ фыриӀэщт. Итетыгъошхуи егъэшӀэм кӀэух иӀэщтэп.

³⁴ – Ар сыдэуштэу хъуна? – еупчӀыгъ Мерэм мэлэӀичым. – Сэ сыпшъэшъэ дэмыкӀу.

³⁵ – Тхьэм ы Псэ ЛъапӀэ къыпфехыщт, анахь Лъагэм ыкӀуачӀи уигъусэщт, – къыриӀожьыгъ мэлэӀичым. – Арышъ, кӀэлэ лъапӀэу къэхъущтым Тхьэм ы КъокӀэ еджэщтых.

³⁶ Мары, уиблэгъэ Елизабетэу сабый зыхэмыкӀынэу зыфаӀощтыгъэм ижъышъхьэм ышъо сабый хидзагъэу, джы яхэнэрэ мазэм ит;

³⁷ сыда пӀомэ, Тхьэм ымылъэкӀын Ӏоф зи щыӀэп.

³⁸ – Мары, сэ Зиусхьаным сыриӀорышӀ, – къыӀуагъ Мерэм. – О зэрэпӀуагъэм тетэу къысэрэхъулӀ. ЕтӀанэ мэлэӀичыр, Мерэм къыгъани, ӀукӀыжьыгъ.

Мерэм Елизабетэ дэжь зэрэкӀуагъэр

³⁹ А мафэхэм Мерэм зигъэхьазыри, Ӏошъхьэ хэкум щыщэу Иудэ текӀыгъэ лӀапкъор зыдэс къуаджэм псынкӀэу кӀуагъэ.

⁴⁰ А къуаджэм зынэсым, Зэчрей иунэ Мерэм ихьи, Елизабетэ шӀуфэс рихыгъ.

⁴¹ Елизабетэ Мерэм ишӀуфэс гущыӀэ зызэхехым, сабыеу ышъо хэлъым зыкъыгъэхъыягъ. Джащыгъум Тхьэм ы Псэ ЛъапӀэ Елизабетэ ыгу инэу илъ хъугъэ,

⁴² Елизабети мэкъэшхокӀэ къыӀуагъ: – Бзылъфыгъэ пстэумэ анахьи Тхьэм ынэшӀу о нахь къыпщифагъ, о ппкъы къыхэкӀыщт сабыими Тхьэм ынэшӀу къыщифагъ.

⁴³ Сэ сыхэт, си Зиусхьан янэ садэжь къэкӀонэу?

⁴⁴ О уишӀуфэс гущыӀэ сэ стхьакӀумэ къызынэсым, сшъо хэлъ сабыим гушӀуагъокӀэ зыкъыгъэхъыягъ.

⁴⁵ Зиусхьаным къыриӀуагъэр къехъулӀэнкӀэ зышӀошъ хъугъэр гъогу мафэ теуцуагъ!

Зиусхьаным Мерэм щытхъушхо зэрэфишӀыгъэр

⁴⁶ ЕтӀанэ Мерэм къыӀуагъ: – Сэ спсэкӀэ Зиусхьаным илъэгагъэ щытхъушхор фэсэшӀы,

⁴⁷ сымыкӀодэу сыкъэзгъэнэжьырэ Тхьэм инэу сегъэгушӀо,

⁴⁸ сыда пӀомэ, Зиусхьаныр иӀорышӀэ тхьамыкӀэ нэшӀукӀэ къеплъыгъ. Мары, джы щегъэжьагъэу лъэхъан пстэуми яцӀыфхэм сэ гъогу мафэ сытеуцуагъэу аӀощт,

⁴⁹ сыда пӀомэ, ЛъэкӀышхо ЗиӀэм Ӏоф гъэшӀэгъонхэр къысфишӀагъэх. Ежь ыцӀэр ары лъапӀэр.

⁵⁰ ШӀолӀыкӀ ежь фызиӀэ цӀыфхэм гукӀэгъу афешӀы Тхьэм, ятэ щегъэжьагъэу ыкъо нэс.

⁵¹ Ӏоф гъэшӀэгъонхэр ыӀэкӀэ ыгъэхъагъэх, пэгагъэ зыгу илъхэр зэбгырифыгъэх.

⁵² Тетыгъо зиехэр ятӀысыпӀэхэм къаридзыхыгъэх, пэгагъэ зыгу имылъхэр къыӀэтыгъэх.

⁵³ ЩыкӀагъэ зиӀэхэм тынышӀухэр аритыгъ, ау байхэр ӀэнэкӀхэу къыгъэнагъэх.

^54-55 ИӀорышӀэу израиль лъэпкъым лъэплъэ. Тятэшхохэр къызэригъэгугъагъэхэм атетэу, Ибрахьимэрэ ащ къытекӀыгъэ цӀыфхэмрэ гукӀэгъу афишӀыныр ыгу илъ зэпыт.

⁵⁶ Елизабетэ дэжь Мерэм мэзищэ щыӀагъ, етӀанэ ядэжь ыгъэзэжьыгъ.

УмэхъэкӀо Иуан къызэрэхъугъэр

⁵⁷ Елизабетэ илъфэгъу мафэ къэси, къо къыфэхъугъ.

⁵⁸ Игъунэгъухэмрэ иблагъэхэмрэ Зиусхьаным гукӀэгъушхо ащ къызэрэфишӀыгъэр зызэхахым, Елизабетэ фэгушӀуагъэх.

⁵⁹ Яенэрэ мафэм сабыир сунэт ашӀынэу зызэрэугъоихэм, тым ыцӀэкӀэ еджэнхэу, Зэчрей фаусынэу фэягъэх.

⁶⁰ Ау сабыим янэ афидагъэп. – Хьау, ащ Иуан ыцӀэщт, – ыӀуагъ.

⁶¹ – О уиблагъэхэм зи ахэтэп ащ фэдэ цӀэ зиӀэ, – къыраӀожьыгъ ахэмэ.

⁶² Ащ нэуж сабыим ятэ ӀэкӀэ зэхырагъэшӀыкӀызэ, цӀэу фиусынэу зыфаемкӀэ еупчӀыгъэх.

⁶³ Ащ пхъэмбгъу цӀыкӀу къахьынэу агуригъэӀуагъ. Ар къызахьым, ащ тыритхагъ: – Ащ ыцӀэщтыр Иуан. Ахэмэ зэкӀэми ар агъэшӀэгъуагъ.

⁶⁴ Ардэдэм ыбзэ къытӀупщыжьыгъ, Тхьэм щытхъу фишӀэзэ, къэгущыӀэжьыгъ.

⁶⁵ Гъунэгъухэу къегъэтӀысыкӀыгъэхэр зэкӀэ щынэгъошхом хэфагъэх, Иудей Ӏошъхьэ хэкум тыдэкӀи а пстэури зэкӀэ щызэлъашӀагъ.

⁶⁶ А Ӏофхэр зэхэзыхыгъэ пстэуми ахэр агухэм раубытагъэу аӀощтыгъ: – Мы сабыир сыд фэдэ хъущта? Сыда пӀомэ, Зиусхьаным ынэшӀу ащ къыщифагъ.

Зэчрей ыгу Тхьэм къырилъхьэгъэ гущыӀэхэр къызэриӀуагъэхэр

⁶⁷ Тхьэм ы Псэ ЛъапӀэ сабыим ятэу Зэчрей ыгу инэу илъ хъуи, мы гущыӀэхэр къыригъэӀуагъэх:

⁶⁸ – Зиусхьанэу Израиль и Тхьэ щытхъушхор ий, сыда пӀомэ, ицӀыф лъэпкъэу Израиль нэшӀукӀэ къеплъи, шъхьафитыныгъэ къыритыгъ.

⁶⁹ Тхьэм ежь фэӀорышӀэрэ пачъыхьэ Даутэ къытекӀыгъэ цӀыфхэм ащыщэу лъэкӀышхо зиӀэу, тымыкӀодэу тыкъэзгъэнэжьыщтыр къытфигъэкӀуагъ,

⁷⁰ пасэм щегъэжьагъэу ипегъымбар лъапӀэхэм агухэм къарилъхьи, къызэраригъэӀуагъэм фэдэу.

⁷¹ Ащ типыйхэм тащиухъумэу, тымыкӀодэу тыкъыгъэнэжьыщт, тызыуджэгъухэрэми тыкъаӀэкӀихыжьыщт.

⁷² Аущтэу Тхьэм тятэжъышхохэм гукӀэгъушхо къафешӀы, зэзэгъыныгъэ лъапӀэу ежьыррэ тятэжъышхоу Ибрахьимэрэ азыфагу гущыӀэ пытэкӀэ дилъхьагъэри егъэцакӀэ.

⁷³ А гущыӀэ пытэр мыры:

⁷⁴ Тэ типыйхэм тыкъаӀэкӀихыжьыщт, щынагъуи тыгухэм арымылъэу, ежь тыфэлэжьэныр тигъэлъэкӀыщт,

⁷⁵ Ежь ыпашъхьэ тигъашӀэкӀэ гукъэбзагъэрэ шъыпкъагъэрэ тиӀэхэзэ.

⁷⁶ ЕтӀанэ Зэчрей къыпигъэхъожьыгъ: – О сикӀал, анахь Лъагэм урипегъымбарэу аӀощт, сыда пӀомэ, Зиусхьаным игъогу бгъэпсынэу ежь ыпэ укӀощт.

⁷⁷ О Зиусхьаным ицӀыф лъэпкъ ебгъэшӀэщт, япсэкӀодхэр зэрафигъэгъухэрэмкӀэ ахэр мыкӀодхэу, Тхьэм къызэригъэнэжьхэрэр.

⁷⁸ Ти Тхьэ гукӀэгъоу иӀэр ины. Ар къыкъокӀырэ тыгъэм фэдэу уашъом къикӀэу къытфэкӀощт,

⁷⁹ лӀэныгъэм ищынагъо хэтхэмрэ шӀункӀым хэтхэмрэ атепсэным паий, мамырныгъэ гъогум тытыригъэхьаным паий.

⁸⁰ Сабыим зыкъыӀэтыгъ, ыгуи ыпси хэхъуагъ. Израиль цӀыфмэ апашъхьэ къызщихьащт мафэм нэс шъоф нэкӀым щыӀагъ.