Еврей цӀыфхэм афэтхыгъэ тхыл 1 - Къэбарышӏур (Инджыл)

АПЭРЭШЪХЬ Ы Къо ыӀупэкӀэ Тхьэр къызэрэгущыӀагъэр

¹ Пасэм Тхьэр пегъымбархэм аӀупэхэмкӀэ бэрэ ыкӀи зэтефыгъэу тятэжъхэм къадэгущыӀэщтыгъ.

² Ау мы уахътэм, мы дунаим иаужрэ мэфэ дэдэхэм, ы Къо ыӀупэкӀэ тэ къыддэгущыӀагъ. Тхьэм Ӏоф пстэури ы Къо иӀахьышӀу хъунэу ыгъэнэфагъ, ащи дунаир къыригъэгъэхъугъ.

³ Тхьэм ищытхъушхо инэфынэ ы Къо дэжь къикӀэу къепсы; ы Къо ищытыкӀэ-псэукӀэ Тхьэм ищытыкӀэ-псэукӀэ фэдэ къабз, игущыӀэу лъэкӀышхо зиӀэмкӀи щыӀэ пстэури щегъаӀэ. ЬӀ Къо цӀыфмэ агухэм псэкӀодхэр зэрариукъэбзыкӀыжьыщт гъогу къафишӀыгъ, уашъоми дэкӀоежьи, тетыгъошхор зэкӀэ зиӀэ Тхьэм иджабгъукӀэ готӀысхьагъ.

⁴ Тхьэм «с Къо» ыӀозэ, къызэреджэрэ цӀэшхор мэлэӀичхэм ацӀэ зэрэнахь лъапӀэм фэдэу, Тхьэм ежь ы Къо мэлэӀичхэм апшъэ ышӀыгъ.

Къо лъапӀэр мэлэӀичхэм апшъэ щыӀ

⁵ Сыда пӀомэ, Тхьэм мэлэӀичхэм ащыщэу зыгорэм, «Оры с Къор, непэ Ты сыпфэхъугъ» риӀуагъа? Тхьэм мэлэӀич горэми ехьылӀагъэу, «Сэ Ты ащ сыфэхъущт, ежьыри с Къо хъущт» къыӀуагъа?

⁶ ЕтӀани Тхьэм ежь къыхихыгъэ ы Къо кӀасэ дунаим къызытырегъахьэм, къыӀуагъ: «Тхьэм имэлэӀич пстэуми ар арэгъэлъапӀ».

⁷ МэлэӀичхэм яхьылӀагъэу Тхьэм моущтэу къыӀуагъ: «Тхьэм имэлэӀичхэр жьыбгъэм фэдэ ешӀых, а Ӏофтабгэхэр мэшӀотхъуабзэхэм афэдэхэ ешӀых».

⁸ Ау ы Къо ехьылӀагъэу Тхьэм моущтэу къыӀуагъ: «О Тхьэ, уитетыгъошхо тӀысыпӀэ егъашӀэм утесыщт. Уитетыгъошхо ибэщ – зэфагъэр ары.

⁹ Шъыпкъагъэр шӀу олъэгъу, бзэджагъэри оуджэгъу. Ащ пае Тхьэу уи Тхьэ уигъусэхэм анахьи гушӀуагъом идагъэ о нахь къыпщифагъ».

¹⁰ Тхьэм моущтэуи къыӀуагъ: «О Зиусхьан, ублапӀэм дэжь чӀылъэм лъапсэхэр фэпшӀыгъ, уашъохэри уиӀэшӀагъэх.

¹¹ Ахэр кӀодыжьыщтых, ау о умыкӀодэу укъэнэжьыщт. Щыгъыным фэдэу ахэр жъы хъущтых.

¹² Щыгъыным фэдэу зэкӀоцӀыпщыхьащтых, зэхъокӀыгъэуи хъущтых; ау о узэрэщытым утетэу укъэнэжьыщт, о уиилъэсхэми кӀэух яӀэщтэп».

¹³ Тхьэм мэлэӀичхэм ащыщэу зыгорэми, «О уипыихэр лъэгукӀэтын пфэсшӀыхэфэ, сиджабгъукӀэ къызготӀысхь» риӀуагъа?

¹⁴ Аущтэу мэлэӀичхэр Тхьэм фэлэжьэрэ псэх, цӀыфхэу мыкӀодхэу Тхьэм къызэригъэнэжьыщтхэр зиӀахьышӀу къызлъыӀэсыщтхэм афэӀофтэбгэнхэуи Тхьэм ахэр къегъакӀох.