Галатие 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сыапостол Паул. Апостол сыхъунэу сыкъыхэзыхыгъэхэр цӀыфхэр арэп, цӀыф горэми сыкъыгъэкӀуагъэп, сыкъыхэзыхыгъэхэр Исус Христосрэ ар лӀагъэхэм къахэзгъэтэджыкӀыжьыгъэ Тхьэу Ты лъапӀэмрэ ары.

² Сэррэ сигъусэ сшы пстэумрэ Галатие хэкум щыӀэ чылыс зэӀукӀэхэм шӀуфэс шъотэхыжьы.

³ Тхьэу тя Тэ лъапӀэрэ Зиусхьан Исус Христосрэ анэшӀу къышъущарэфи, гупсэф къышъуарэт.

⁴ Исус Христос ары джырэ дунаим ибзэджагъэ илъэкӀ тыӀэкӀихыжьыным пае, ти Тхьэу, тя Тэ ЛъапӀэ зэрэфэягъэм тетэу, типсэкӀодхэр ыпщыныжьынхэм пае, зыпсэ зытыгъэр.

⁵ МыкӀодыжьын щытхъушхор ий. Амин.

НэмыкӀ къэбарышӀу зи щыӀэп

⁶ Христос ынэшӀу щыфэныгъэкӀэ Тхьэу зибынхэм ащыщ шъухъунэу къышъоджагъэм игъогу шъутекӀэу, нэмыкӀ къэбарышӀоу зыфаӀорэм игъогу ащ фэдэу псынкӀэу шъузэрэтехьагъэр лъэшэу сэгъэшӀагъо.

⁷ НэмыкӀ къэбарышӀу зи щыӀэп. Ау цӀыф заулэмэ шъушъхьэхэр зэӀагъэхьэ, Христос ехьылӀэгъэ къэбарышӀури зэблахъунэу фаех.

⁸ КъэбарышӀоу тэ шъодгъэӀугъэм нэмыкӀ къэбарышӀоу зыфиӀорэр къышъозгъэӀурэм, тэрми уашъом щыщ мэлэӀичми, Тхьэм ынае къыщерэф.

⁹ ЫпэкӀэ къэтӀогъагъэр джыри къэсэӀожьы: КъэбарышӀоу шъудагъэм нэмыкӀ къэбарышӀоу зыфиӀорэр къышъозгъэӀурэм Тхьэм ынае къыщерэф.

¹⁰ Джы цӀыфхэм сызэрадэным сыпылъа, хьауми Тхьэм сызэридэныр ара сызыпылъыр? Хьауми цӀыфхэм агу къызэрэсэӀуныр ара сызыпылъыр? Джырэ нэс цӀыфхэм агу къызэрэсэӀуным сыпылъыгъэмэ, Христос сыфэлажьэщтыгъэп.

Паул апостол зэрэхъугъэр

¹¹ Сшыхэр, сэ шъозгъэӀугъэ къэбарышӀур цӀыфым дэжь къызэримыкӀыгъэр шъушӀэнэу сыфай.

¹² ЦӀыф горэм а къэбарышӀур къыӀысхыгъэп, зыми ар сигъэшӀагъэп, ау ежь Исус Христос а къэбарышӀур къысфигъэнэфагъ.

¹³ Джурт диныр сылэжьэу сищыӀэкӀагъэр зэхэшъухыгъэ. Тхьэм ичылыс зэӀукӀэ щыщхэм къин дэдэ язгъэщэчэу, згъэкӀодыным ыуж ситыгъ.

¹⁴ Слъэпкъ щыщхэу силэгъубэхэм анахьи, джурт диным сызэрэхэтыгъэмкӀэ апэ ситыгъ. Тятэжъхэм къытфагъэнэгъэ хабзэхэм сыгу етыгъэу сапылъыгъ.

^15-16 Ау сянэ ышъо сыхэлъэу Тхьэм сыкъыхихыгъ. ЫнэшӀу щыфэныгъэкӀи ибынхэм ащыщ сыхъунэу къысэджагъ. ЕтӀанэ ы Къо ехьылӀэгъэ къэбарышӀур хымэ лъэпкъхэм язгъэӀуным пае, ы Къо сигъэлъэгъунэу Тхьэм игъоу зелъытэм, зы цӀыфи упчӀэжьэгъу сшӀыгъэп.

¹⁷ Сэ сапэ апостол хъугъэ цӀыфхэу Ерусалим дэсыгъэхэм адэжь сыкӀуагъэп, ау Арабие хэгъэгум сыкӀуи, етӀанэ Дамаск къалэм згъэзэжьыгъэ.

¹⁸ Илъэсищ зытешӀэм, тызэрэшӀэнэу Кифэ дэжь Ерусалим сыкӀуагъ, ащ дэжьи мэфэ пшӀыкӀутфэ сыщыӀагъ.

¹⁹ Зиусхьаным ыш Якъубэ нэмыкӀэу, адрэ апостолхэм ащыщэу зи слъэгъугъэп.

²⁰ Тхьэ сэӀо, къышъуфэстхырэмкӀэ пцӀы сыусырэп.

²¹ Ащ ыуж Сириерэ Киликиерэ зыцӀэ хэкухэм сащыӀагъ.

²² Христос ичылыс зэӀукӀэхэу Иудей хэкум щыӀэхэм сынапэ алъэгъугъэу сашӀэщтыгъэп.

²³ Ахэмэ цӀыфхэм моущтэу зэраӀорэр зэхахыщтыгъ ныӀэп: «ЫпэкӀэ къин тэзгъэщэчыгъэ лӀэу, тишӀошъхъуныгъэ зыгъэкӀодынэу тауж итыгъэм а шӀошъхъуныгъэм икъэбарышӀу джы цӀыфхэм арегъэӀу».

²⁴ Аущтэу сэщ пае Тхьэм щытхъу фашӀыщтыгъ.