Ефес 6 - Къэбарышӏур (Инджыл)

ЯХЭНЭРЭШЪХЬ Ятэ-янэхэмрэ ялъфыгъэхэмрэ зэрэзэфыщытынхэ фаер

¹ Шъо, бынхэр, Зиусхьаныр шъугухэм зэрарылъым пае, шъуятэ-шъуянэхэм шъуядэӀу. Аущтэу зышъушӀыкӀэ, тэрэзэу шъозекӀо.

² «Уятэрэ уянэрэ лъытэныгъэ афэшӀ» ыӀуи, джары апэрэ унашъоу Тхьэм мы гъэгугъэныгъэр зэрипхыгъэр, моущтэу ыӀозэ:

³ «шӀу къыохъулӀэным ыкӀи бэрэ мы дунаим ущыпсэуным пае».

⁴ Шъо, тыхэри, шъуилъфыгъэхэр шъумыгъэгубжых, ау Зиусхьаным зэрэшӀоигъом тетэу, шъупӀух, агурыжъугъаӀу.

УнэӀутхэмрэ тхьэматэхэмрэ зэрэзэфыщытынхэ фаер

⁵ Шъо, унэӀутхэр, мы дунаим шъутетыфэ, шъуитхьэматэхэм шъуащыщынэу, шъугухэри кӀэзэзхэу шъуядэӀу, гу шъыпкъэкӀи Христос шъузэредэӀурэм фэдэу, ахэми шъуядэӀу.

⁶ ШъуядэӀу сэӀо, ау агу къызэдгъэӀун шъуӀоу, анэхэмкӀэ гъунэ къызэрэшъулъафырэм изакъоп, ау Христос шъузэрэфэлажьэрэм пае, сыдигъуи шъугу етыгъэу шъуядэӀузэ, Тхьэр зыфаер жъугъэцакӀэ.

⁷ ЦӀыфхэм шъузэрафэлажьэрэм фэдэу орэмыхъу, Зиусхьаным шъузэрэфэлажьэрэм фэдэу, шъуигуапэу шъуитхьэматэхэм шъуафэлажь,

⁸ сыда пӀомэ, хэт щыщ цӀыфми, унэӀутми шъхьафитми, сыд фэдэ шӀугъэ ышӀэми, иӀахьышӀу Зиусхьаным ащ къызэрэлъигъэӀэсыщтыр шъо шъошӀэ.

⁹ Шъо, тхьэматэхэр, шъори шъуиунэӀутхэм джащ фэдэу шъуадэзекӀу, пхъэшагъэкӀэ шъуапэмыгъокӀ, сыда пӀомэ, шъо бгъуитӀуми а зы Зиусхьаныр уашъом зэрэщышъуиӀэр шъошӀэшъ ары. Ятеплъэ емыплъэу, ащ цӀыф пстэури изэфэд.

Тхьэм иӀэшэ-шъуашэхэр

¹⁰ Аужыпкъэм Зиусхьаным илъэкӀышхокӀэ кӀуачӀэ зижъугъаӀ.

¹¹ Тхьэм зэкӀэ иӀэшэ-шъуашэхэмкӀэ зышъуфап, шэйтаным итхьагъэпцӀыгъэ гухэлъхэм шъуапэуцужьыным пае.

¹² Сыда пӀомэ, тызэзаохэрэр лымрэ лъымрэ къахэкӀыгъэ цӀыфхэр арэп, ау джынэпцӀэ Ӏэшъхьэтетхэри, тетыгъо зиӀэхэри, мы дунэе шӀункӀым ипэщэшхоу джынапцӀэхэри, бзэджагъэм иджынапцӀэу ошъо лъэныкъомкӀэ щыӀэхэри ары.

¹³ Арышъ, Тхьэм иӀэшэ-шъуашэхэр къэшъуӀэтых, мэфаер къызыскӀэ, шъузэкӀэмыкӀожьыным, зэкӀэми шъузатекӀуахэкӀэ, шъулъакъохэм шъуатетыным пае.

¹⁴ Джащ фэдэу пытэу шъущыт; шъыпкъагъэр шъуибгырыпхым фэдэу зижъугъаӀ; шъыпкъагъэу Тхьэм дэжькӀэ тиӀэри ашъоджанэм фэдэу зыщышъулъ.

¹⁵ Тхьэм ежь тызэрэзэригъэшӀужьыгъэм икъэбарышӀу жъугъэӀуным ихьазырыни цуакъэхэм афэдэу зыщышъулъ.

¹⁶ Ахэмэ анэмыкӀэу, шӀошъхъуныгъэр мэӀум фэдэу къэшъуӀэт. АщкӀэ шэйтаным ищэ плъыгъэхэр жъугъэкӀосэнхэ шъулъэкӀыщт.

¹⁷ ШъумыкӀодэу Тхьэм шъукъызэригъэнэжьырэр танджым фэдэу къэшъуӀэт. Чатэу Тхьэм ы Псэ ЛъапӀэ къышъуитырэр къэшъуӀэт. А чатэр Тхьэм игущыӀэхэр ары.

¹⁸ Сыдигъуи Тхьэм ы Псэ ЛъапӀэ илъэкӀыкӀэ тхьэлъэӀу пстэумкӀи шъуелъэӀу, шъуищыкӀагъэмкӀи Тхьэм шъуелъэӀу. Шъусакъэу, шъуемызэщэу Тхьэм ицӀыф лъапӀэхэм зэкӀэмэ шъуафелъэӀу зэпыт.

¹⁹ Сэщ паий, сыжэ зызэтесхыкӀэ, къэбарышӀум ишъэф гушхокӀэ къэсӀонхэу гущыӀэхэр Тхьэм сыгу къырилъхьанхэу шъуелъэӀу.

²⁰ Ӏэхъу-лъэхъу къыстыралъхьагъэу, мы къэбарышӀум сырилӀыкӀу. КъэбарышӀур гушхокӀэ къызэрэсӀон фаем фэдэу къэсӀонэу Тхьэм шъукъысфелъэӀу.

Аужырэ шӀуфэс гущыӀэхэр

²¹ Шъори сикъэбархэмрэ Ӏофхэу сшӀэхэрэмрэ шъушӀэнхэм пае, шӀу тлъэгъурэ тшы Тихик зэкӀэ шъуигъэшӀэщт. Ар Зиусхьаным иӀофкӀэ шъыпкъагъэ зыхэлъ ӀэпыӀэгъу.

²² Мы Ӏоф дэдэу тиӀофхэр зытетхэр шъуигъэшӀэнри шъуигъэгушхонри ары Тихик шъуадэжь къызфэзгъакӀорэр.

²³ Тхьэу Ты лъапӀэмрэ Зиусхьан Исус Христосрэ тшыхэм гупсэфырэ шӀулъэгъоу шӀошъхъуныгъэ зигъусэмрэ къарарэт.

²⁴ МыкӀодыжьын шӀулъэгъу зиӀэхэу, ти Зиусхьан Исус шӀу зылъэгъухэрэм Тхьэм ынэшӀу къащерэф. Амин.