Ефес 5 - Къэбарышӏур (Инджыл)

ЯТФЭНЭРЭШЪХЬ

¹ Тхьэм шӀу шъуилъэгъоу шъузэрибынхэм пае, ежь илъэужхэм шъуарыкӀу.

² Христос шӀу тилъэгъуи, мэ ӀэшӀу зыпихырэ тынэуи Тхьэм ыгу зэӀурэ къурмэныпхъэуи тэщ пае ыпсэ зэритыгъэм фэдэу, шӀулъэгъу шъугухэм арылъэу шъузекӀу.

³ Ау Тхьэм ицӀыф лъапӀэхэм зэряфэшъуашэм фэдэу, зинэ шӀэным е сыд щыщ гумыкъэбзагъэм е нэйпсыягъэм ягугъу шъушӀы хъущтэп.

⁴ ЕмыкӀу гущыӀэныр, делэгъэ гущыӀэныр, мыхъун сэмэркъэуныр шъо къышъуфэшъуашэп, Тхьэм ищытхъу шъушӀын фае нахь.

⁵ Сыда пӀомэ, мы Ӏофыр зэжъугъашӀэ: зинэ зышӀэрэ цӀыфым е зыгу мыкъэбзэ цӀыфым е нэйпсые цӀыфым – ащ фэдэ цӀыфым тхьэ нэпцӀыр ыгъэлъапӀэу мэхъу – Христосрэ Тхьэмрэ я ТетыгъошхокӀэ Ӏахь къылъыӀэсыщтэп.

⁶ ГущыӀэ мыщыухэмкӀэ зыми зыкъешъумыгъэгъапцӀ, сыда пӀомэ, ащ фэдэ Ӏофхэм апае Тхьэм емыдэӀухэрэм игубж къалъигъэӀэсыщт.

⁷ Арышъ, ащ фэдэ цӀыфхэм гъусэ шъуафэмыхъу.

⁸ Сыда пӀомэ, зэгорэм шъушӀункӀыгъ, ау джы Зиусхьаныр шъугухэм зэрарылъым пае, нэфынэ шъухъугъ. Нэфынэм ибынхэр зекӀонхэ зэрэфаем фэдэу шъузекӀу,

⁹ сыда пӀомэ, нэфынэм шӀугъэу къыхэкӀырэр шӀугъэ пстэури, зэфэныгъэ пстэури, шъыпкъэгъэ пстэури ары.

¹⁰ Зиусхьаным Ӏофхэу игъоу ылъытэхэрэр жъугъэунэфых, зэжъугъашӀэх.

¹¹ ПкӀэ зимыӀэ шӀункӀ Ӏофхэм шъуиӀоф ахэшъумылъхь, ау а Ӏофхэр зыфэдэхэр къыхэжъугъэщых.

¹² Сыда пӀомэ, Ӏофхэу шъэфэу ашӀэхэрэм ягугъу пшӀынри емыкӀу.

¹³ Ау нэфынэм Ӏофхэр зэкӀэ къызигъэнафэхэкӀэ, ахэр къэлъагъох, сыда пӀомэ, къэлъэгъорэ пстэури нэфынэ мэхъу.

¹⁴ Джары моущтэу зыкӀаӀорэр: «О, чъыерэр, къэущыжь, лӀагъэхэм къахэтэджыкӀыжьи, Христос нэфынэр къыптыригъэпсэщт».

¹⁵ Арышъ, шъузэрэзекӀорэм инэу шъуфэсакъ, акъыл зимыӀэхэм шъуафэмыдэу, акъылышӀу зиӀэхэм шъуафэдэу шъузекӀу.

¹⁶ Игъор блэшъумыгъэкӀ, сыда пӀомэ, мы мафэхэр бзаджэхэшъ ары.

¹⁷ Арышъ, шъумыгупшысэу шъумызекӀу, Зиусхьаныр зыфаери зыгурыжъугъаӀу.

¹⁸ СэнэпсымкӀэ зышъумыгъэуташъу. Ащ къыхэкӀырэр мыхъо-мышӀэ псэукӀэр ары. Тхьэм ы Псэ ЛъапӀи икъугъэу шъугухэм арыжъугъэлъ.

¹⁹ ОрэдхэмкӀи, тхьэщытхъу орэдхэмкӀи, Тхьэм ы Псэ ЛъапӀэ шъугухэм къарилъхьэрэ орэдхэмкӀи шъузэдэгущыӀ. Шъугу етыгъэу Зиусхьаным щытхъу фэшъушӀэу, ежь пае орэд къашъуӀо.

²⁰ Ти Зиусхьанэу Исус Христос ыцӀэкӀэ Ӏоф пстэуми апае Тхьэу Ты лъапӀэм щытхъу фэшъушӀ зэпыт.

²¹ Христос ишӀолыкӀ шъугухэм зэрарылъым пае, шъузэфэӀорышӀ.

Шъузымрэ лӀымрэ зэрэзэфыщытынхэ фаер

²² Шъо, шъузхэр, Зиусхьаным шъузэрэфэӀорышӀэрэм фэдэу, шъуилӀыхэми шъуафэӀорышӀ.

²³ Сыда пӀомэ, Христос чылыс зэӀукӀэм шъхьэу зэриӀэм фэдэу, лӀыри ишъуз ышъхь. Чылыс зэӀукӀэр Христос ыпкъ, ежьыри ары а пкъыр мыкӀодэу къэзгъэнэжьырэр.

²⁴ Чылыс зэӀукӀэр Христос зэрэфэӀорышӀэрэм фэдэу, шъузыри сыд щыщымкӀи илӀ фэӀорышӀэн фае.

²⁵ Христос чылыс зэӀукӀэр шӀу ылъэгъоу, ыпсэ ащ зэрэфитыгъэм фэдэу, хэтрэ лӀи ишъуз шӀу ерэлъэгъу.

²⁶ Христос ыпсэ зыфитыгъэр псыкӀи игущыӀэхэмкӀи чылыс зэӀукӀэм щыщхэр ыгъэкъабзэхэу, ахэмэ гукъэбзагъэ яӀэ хъуныр ары.

²⁷ Ащ нэмыкӀэу, Христос ыпсэ зыфитыгъэр чылыс зэӀукӀэм идэхагъэкӀэ, бжьыгъэ е зэлъагъэ, е ащ фэдэ щыкӀагъэ зи имыӀэу, гукъэбзагъэ иӀэу, лажьэ зи имыӀэу, ежь ыпашъхьэ ригъэуцоныр ары.

²⁸ Ащ фэдэу лӀым ыпкъ иунае фэдэу ишъуз шӀу ылъэгъун фае. Зишъуз шӀу зылъэгъурэм ышъхьэ шӀу елъэгъужьы.

²⁹ Зыми ежь ыпкъ зыкӀи ыуджэгъужьыгъэп, ау пкъым ищыкӀагъэр регъэгъоты ыкӀи егугъу, Зиусхьаныр чылыс зэӀукӀэм зэрегугъурэм фэдэу;

³⁰ сыда пӀомэ, Христос ыпкъ тыщыщ, ыл тыщыщ, икупшъхьэхэми тащыщ.

³¹ Тхьэм игущыӀэ тхыгъэхэм зэрарытым фэдэу, «Ащ къыхэкӀыкӀэ лӀыр ятэ-янэхэм ахэкӀынышъ, ишъуз гъусэ фэхъунышъ, тӀури зыпкъ хъущтых».

³² А гущыӀэхэм шъэфэу ахэлъыр шъэфышху: сэ къызэрэзгурыӀорэмкӀэ, а гущыӀэхэр зэхьылӀагъэхэр Христосрэ чылыс зэӀукӀэмрэ ары.

³³ Аущтэу шъуащыщ пэпчъ ежь ышъхьэ шӀу зэрилъэгъурэм фэдэу, ишъузи шӀу ерэлъэгъу. Шъузыми илӀ лъытэныгъэ ферэшӀ.