Ефес 4 - Къэбарышӏур (Инджыл)

ЯПЛӀЭНЭРЭШЪХЬ Зыпкъ закъом фэдэ тызэрэхъурэр

¹ Сэ Зиусхьаным сызэрэфэлажьэрэм пае, хьапсым сычӀадзагъэу сычӀэсэу сышъолъэӀу: псэукӀэу шъуиӀэнэу Тхьэр къызфышъоджагъэм тетэу шъузекӀу.

² Мыпэгэныгъэри, гушъэбагъэри, щэӀагъэри шъугухэм арыжъугъэлъ, шӀулъэгъукӀэ зым зыр ерэщыӀ.

³ Зы пкъэу шъущытынэу Тхьэм ы Псэ ЛъапӀэ шъуигъэгъотырэр зэзэгъыныгъэу шъузэзыпхырэмкӀэ зэрэшъуухъумэным ыуж шъуит.

⁴ Пкъэу тызщыщыр зы, Тхьэм ы Псэ ЛъапӀи зы, Ӏофэу тызщыгугъэу тызпаплъэу, Тхьэр къызфышъоджагъэри зы.

⁵ Зиусхьаныри зы, шӀошъхъуныгъэри зы, тызкӀаумэхъырэри зы.

⁶ Тхьэу цӀыф пстэуми я Тэ лъапӀи зы. Ащ цӀыф пстэуми тетыгъо афыриӀ, зэкӀэмкӀи Ӏоф ешӀэ, тэ зэкӀэми ар тыгухэм арылъ.

⁷ Тэ тщыщэу хэти Христос ынэшӀу къыщифагъ, хэти тынэу къыритынэу зэрэфигъэшъошагъэм тетэу.

⁸ Джары Тхьэм игущыӀэ тхыгъэхэм зыкӀарытыр: «ЫпшъэкӀэ зыдэкӀоежьым, гъэрхэри игъусэхэу зыдыдищэягъэх, цӀыфхэми тынхэр аритыгъ».

⁹ («ЫпшъэкӀэ дэкӀоежьыгъ» зыфиӀорэ гущыӀэхэм къарыкӀырэр ыпэкӀэ чӀылъэм ыхэ дэдэм нэс зэрехыгъэр ары.

¹⁰ Ыхэ дэдэм нэс ехыгъэ дэдэр ары ошъо пстэуми анахьи нахь лъагэу дэкӀоежьыгъэр, щыӀэ пстэуми щыкӀагъэ зи ямыӀэу, икъугъэу ыгъэхъуным пае.)

¹¹ Христос цӀыфхэм тынхэр зэраритыгъэр мары: ежь цӀыф заулэ апостолхэу ыгъэнэфагъ, нэмыкӀхэри пегъымбархэу ыгъэнэфагъэх, адрэхэри ежь икъэбарышӀу агъэӀунэу ыгъэнэфагъэх, етӀани нэмыкӀхэри дин пащэхэуи дин гъэсакӀохэуи ыгъэнэфагъэх.

¹² Тхьэм ахэр зыкӀигъэнэфагъэхэр ицӀыф лъапӀэхэр ежь фэлэжьэнхэу аригъэлъэкӀынри, Христос ыпкъ щыщхэм гурэ псэрэкӀэ нахь лъэкӀ аригъэгъотынри ары.

¹³ Аущтэу тэ зэкӀэ Тхьэм ы КъокӀэ шӀошъхъуныгъэ тиӀэу, ари тшӀэу, зы тыхъущт, Христос зишъыпкъагъэ щыкӀагъэ зи зимыӀэ зэрэцӀыф икъугъэм фэдэу, тэри зишъыпкъагъэ щыкӀагъэ зимыӀэ цӀыф икъугъэ тыхъущт.

¹⁴ ЕтӀанэ тысабыижьыщтэп, хыорхэм адыкӀэ мыдыкӀэ тызэрамыдзэжьэу, цӀыфхэм адрэ цӀыфхэр дин Ӏофхэу зыфагъасэхэрэм яжьыбгъэ пстэуми тызэридзэжьыщтэп. ЦӀыфхэу адрэ цӀыфхэр дахьыхынхэмкӀэ фэӀазэхэм ятхьагъэпцӀыгъэ тыкъыфэнэжьыщтэп.

¹⁵ Аущтэу мыхъоу, шӀулъэгъур тыгухэм арылъэу, шъыпкъагъэр къатӀозэ, сыд фэдэ лъэныкъокӀи Христос тыфэдэнэу тхэхъощт. Ежьыр ары шъхьэр.

¹⁶ Ежь Христос ары пкъым кӀуачӀэ езгъэгъотырэри, пкъыр зэзыпхырэ щыӀэ пстэумкӀэ пкъыр зэкӀэ зэхэзгъэуцорэри, зэкӀэзыубытэрэри. Аущтэу пкъым щыщэу сыдрэ Ӏахьыр зэрэлэжьэн фаем фэдэу зылажьэкӀэ, пкъым хэхъо, шӀулъэгъуныгъэкӀи нахь кӀуачӀэ егъоты.

Христос зыгу илъхэм щыӀэкӀакӀэу яӀэр

¹⁷ Зиусхьаным ыцӀэкӀэ лъэшэу къышъуфэсэгъэпытэ: хымэ лъэпкъхэм яшъхьэнэкӀыгъэкӀэ зэрэзекӀохэрэм фэдэу шъумызекӀу.

¹⁸ ЯзэхэшӀыкӀ шӀункӀы, ягуркъагъэ къыхэкӀыкӀи зи амышӀэу, Тхьэм цӀыфхэм къаритырэ щыӀэныгъэм пэчыжьэх.

¹⁹ Агухэм гулъытэ зи ямыӀэу, мыхъо-мышӀэ псэукӀэм зыратыгъ, загъэшхэкӀыни амылъэкӀэу, сыд щыщырэ гумыкъэбзагъэм хэтых.

²⁰ Ау Христос икъэбар шъозгъэшӀэгъэ цӀыфхэм аущтэу шъузекӀонэу шъуагъэшӀагъэп.

²¹ Сыда пӀомэ, Христос икъэбар шъо зэхэшъухыгъ, ежьыри шъугухэм арылъэу, ежь хэлъ шъыпкъагъэр зэжъугъэшӀагъ.

²² ШъуипсэукӀэжъ щыщ шъуишэныжъ бзаджэр хэшъунэжьын зэрэфаер зэжъугъэшӀагъ. Сыда пӀомэ, шъуишэныжъ бзаджэ ихъопсэ мыхъунхэу шъукъэзгъапцӀэхэрэмкӀэ шъуигъэкӀод пэтыгъ.

²³ Шъугухэм арылъи шъуигупшысакӀи Тхьэм зэрежъугъэхъокӀын зэрэфаери зэжъугъэшӀагъэ.

²⁴ Шъыпкъагъэрэ гукъэбзагъэрэ шъыпкъэу шъуиӀэнэуи, ежь шъуфэдэнэуи, Тхьэм шъукъыгъэхъужьыгъэу, шэныкӀэшӀур шъуашэу зэшъущэкӀын зэрэфаери зэжъугъэшӀагъэ.

²⁵ Арышъ, пцӀыусыныр хэшъунэжьи, хэти игъунэгъу шъыпкъэр рерэӀу, сыда пӀомэ, тэ зэкӀэри зы пкъы закъом тыщыщ.

²⁶ Шъугубжыми, псэкӀод шъумышӀэ. Шъугубжыгъэу, тыгъэр къошъумыгъэхьажь.

²⁷ Шэйтаным гъогу ешъумыт.

²⁸ ТыгъуакӀор орэмытыгъожь, ау орэлажьи, ыӀэхэмкӀэ шӀу ерэшӀ, щыкӀагъэ зиӀэхэм афигощын иӀэным пае.

²⁹ ГущыӀэ емыкӀухэр шъужэхэм къадэшъумыгъэкӀ, ау адрэ цӀыфхэм зэрящыкӀагъэм фэшъуашэу, гурэ псэрэкӀэ нахь лъэкӀ яжъугъэгъотызэ, гущыӀэшӀухэр шъужэхэм къадэжъугъэкӀых нахь, цӀыфхэу зэхэзыххэрэм шъуишӀуагъэ яжъугъэкӀыным пае.

³⁰ Тхьэм ы Псэ ЛъапӀэ ыгу хэшъумыгъэкӀ. Тхьэм шъушъхьэхэр зищэфыжьыщт мафэм нэсыфэ, ежь ы Псэ ЛъапӀэ мыхъурым фэдэу, Тхьэм шъугухэм къарилъхьагъ.

³¹ Сыд фэдэ гужъри, къызэкӀэплъыхьанри, губжыни, куо-хьауни, цӀыфхэм ӀаекӀэ атегущыӀэни, сыд щыщырэ бзэджагъи хэшъунэжьых.

³² Зыр зым шӀу фэрэхъу, гукӀэгъу зэфэшъушӀ, зэфэжъугъэгъу, Тхьэм Христос ихьатыркӀэ шъо къызэрэшъуфигъэгъугъэм фэдэу.