Ефес 3 - Къэбарышӏур (Инджыл)

ЯЩЭНЭРЭШЪХЬ Паул хымэ лъэпкъхэм Ӏофэу афишӀагъэм къызэрэтегущыӀэрэр

¹ Ащ пае, сэ, Паул, Христос Исус сыфэлажьэу, шъо хымэ лъэпкъхэм къэбарышӀур къызэрэшъозгъэӀурэм пае, хьапсым сычӀадзагъэу сычӀэс.

² Тхьэм ынэшӀу щыфэныгъэкӀэ Ӏоф къышъуфэсшӀэнэу спшъэ къызэрэрилъхьагъэм икъэбар зэхэшъухыгъэн фае.

³ Тхьэм игухэлъ шъэф къысфигъэнафи, сигъэшӀагъэ, кӀэкӀэу къызэрэшъуфэстхыгъэм фэдэу.

⁴ Мы тхылъым шъузеджэкӀэ, Христос ехьылӀэгъэ шъэфым зэхэшӀыкӀэу фысиӀэм гу лъышъутэн шъулъэкӀыщт.

⁵ А шъэфыр Тхьэм ы Псэ ЛъапӀэ мы уахътэм апостол лъапӀэхэмрэ пегъымбар лъапӀэхэмрэ зэрафигъэнэфагъэм фэдэу, ыпэрэ лӀэшӀэгъухэм ащыпсэущтыгъэ цӀыфхэм Тхьэм аригъэшӀэгъагъэп.

⁶ А шъэфыр мыры: Христос Исус хымэ лъэпкъхэм агухэм арылъ хъоу, къэбарышӀур зэрадэрэмкӀэ Тхьэм израиль лъэпкъым ӀахьышӀоу фигъэшъуашэрэр ахэми къалъегъэӀэсы; а лъэпкъхэри Израиль игъусэхэу зы пкъым щыщых, Тхьэм израиль лъэпкъыр ӀофышӀухэу къызэригъэгугъагъэхэм ахэми яӀахь ахэлъ.

⁷ Тхьэм лъэкӀэу къысхилъхьагъэм тетэу, мы Ӏофыр згъэцэкӀэнэу ынэшӀу щыфэныгъэкӀэ тынэу къызэрэситыгъэмкӀэ, мы къэбарышӀум сыфэлэжьэнэу сигъэнэфагъ.

⁸ Тхьэм ицӀыф лъапӀэхэм санахь цӀыкӀуми, Тхьэм ынэшӀу щыфэныгъэкӀэ мы Ӏофыр спшъэ къырилъхьагъ: Христос хэлъ баиныгъэшхоу зыми ымыгъэунэфышъущтым икъэбар хымэ лъэпкъхэм язгъэӀунри,

⁹ Тхьэм игухэлъ шъэф цӀыф пстэуми нафэ афэсшӀынри ары. БлэкӀыгъэ лъэхъанхэм ащегъэжьагъэу а гухэлъ шъэфыр Тхьэу зэкӀэ къэзгъэхъугъэм аригъэшӀэгъагъэп.

¹⁰ Тхьэм аущтэу зыкӀишӀагъэр чылыс зэӀукӀэмкӀэ иакъылышӀогъэ зэмылӀэужыгъом икъэбар ошъо лъэныкъом щыӀэ Ӏэшъхьэтетхэми, тетыгъо зиӀэхэми джырэ уахътэм щаригъэшӀэныр ары.

¹¹ МыкӀодыжьын гухэлъэу иӀэм тетэу Тхьэм а Ӏофыр ыгъэцэкӀагъ – ти Зиусхьан Христос Исус иӀэмыркӀэ.

¹² Христос тыгухэм арылъэу, ежьыркӀэ шӀошъхъуныгъэ зэрэтиӀэм пае, тыгушхоу, ежь тыщыгугъэу Тхьэм пэблагъэ тыхъун тэлъэкӀы.

¹³ Арышъ, шъо сишӀуагъэ шъозгъэкӀынэу къин зэрэсщэчырэм пае, шъугу шъумыгъэкӀодынэу сышъолъэӀу. А къинэу сэ сщэчырэм шъоркӀэ щытхъу хэлъ.

Паул шӀошъхъуныгъэ зиӀэхэу Ефес дэсхэм Тхьэм зэрафелъэӀурэр

¹⁴ Арышъ, Ты ЛъапӀэм ыпашъхьэ лъэгонджэмышъхьэкӀэ сетӀысхьэ.

¹⁵ Уашъоми чӀылъэми ащыӀэу, сыдрэ унагъоу зыфаӀорэми ыцӀэ къызхэкӀырэр ежьыр ары.

¹⁶ Тхьэм сызэрелъэӀурэр мыры: ищытхъушхо тетэу, ежь ы Псэ ЛъапӀэкӀэ шъугухэмкӀэ кӀуачӀэ шъуигъэгъотыныр,

¹⁷ шъушӀошъ зэрэхъугъэмкӀэ Христос шъугухэм арылъыныр,

¹⁸ шъулъапсэхэр шӀулъэгъум хэлъхэу, ащ шъутетэу, Тхьэм ицӀыф лъэпӀэ пстэуми шъурягъусэу, Христос ишӀулъэгъу ишъомбгъуагъи, икӀыхьагъи, икууагъи, илъэгагъи къыжъугурыӀонхэм пае, лъэкӀ шъуиӀэныр,

¹⁹ а шӀулъэгъоу шӀэныгъэ пстэури зынэмысырэр шъушӀэныр арых, Тхьэм ишэн зэкӀэ шъухэлъыным пае.

²⁰ Тхьэм щытхъушхор ий. Ежь илъэкӀэу къытхэлъымкӀэ Ӏофэу тызэрелъэӀущтхэмрэ тызэгупшысэщтхэмрэ анахьи, егъэлыягъэу нахьыбэ ышӀэн елъэкӀы.

²¹ Тэ Христос Исус зыгухэм арылъэу, чылыс зэӀукӀэм щыщхэм мыкӀодыжьын лъэхъанэу къэкӀощтхэмкӀи лӀэшӀэгъоу къэкӀощтхэмкӀи щытхъушхор Тхьэм фэтэжъугъэшӀ. Амин.