Ефес 2 - Къэбарышӏур (Инджыл)

ЯТӀОНЭРЭШЪХЬ Христос тыгухэм арылъ зэрэхъугъэм пае, икӀэрыкӀэу тыкъалъфыжьыгъ

¹ Шъуибзэджагъэрэ шъуипсэкӀодхэмрэ къахэкӀыкӀэ, лӀагъэхэм шъуафэдагъ.

² А Ӏофхэм ягъогу шъурыкӀощтыгъ. Мы дунаим ихэбзэжъ Ӏае шъутетэу, жьыбгъэм тетыгъо щызиӀэ Ӏэшъхьэтетэу, джынапцӀэу Тхьэм емыдэӀухэрэм агухэм арылъыр зэрэфаем тетэу шъузекӀощтыгъ.

³ Тэ пстэури а цӀыфхэм тахэтэу, типсэкӀодышӀэ шэныжъ зыкӀэхъопсыщтыгъэ Ӏоф мыхъунхэм атетэу тыпсэущтыгъ. ТипсэкӀодышӀэ шэныжърэ тигупшысэхэмрэ зыкӀэхъопсыщтыгъэ Ӏофхэр дгъэцакӀэщтыгъэх. Тишэныжъ уеплъымэ, нэмыкӀ цӀыфхэм тафэдэу, тэри Тхьэм игубж ыӀэчӀэгъ тычӀэтыгъ.

^4-5 ТипсэкӀодхэм къахэкӀыкӀэ лӀагъэхэм тафэдагъэ пэтми, Тхьэу гукӀэгъушхо зиӀэм шӀулъэгъоу къытфыриӀэм пае, Христос тыригъусэу тыкъыгъэпсэужьыгъ. Тхьэм ынэшӀу щыфэныгъэкӀэ тымыкӀодэу тыкъыгъэнэжьыгъ.

⁶ Христос тыгухэм зэрарылъым пае, ащ тыригъусэу Тхьэм тыкъыгъэтэджыжьыгъ, ащ тыригъусэуи уашъом тӀысыпӀэ къыщытитыгъ.

⁷ Тхьэм аущтэу зыкӀишӀагъэр Христос Исус къыпкъырыкӀэу шӀугъэу къытфишӀагъэмкӀэ ежь ынэшӀу щыфэныгъэшхоу гъунэ зимыӀэр къэкӀощт лъэхъанхэм яцӀыфхэми аригъэлъэгъуныр ары.

⁸ Тхьэм ынэшӀу щыфэныгъэкӀэ шъумыкӀодэу шъукъыгъэнэжьыгъ, шӀошъхъуныгъэ шъуиӀэ зэрэхъугъэм пае. Ар къызпкъырыкӀыгъэр шъорэп, ар Тхьэм итын нахь.

⁹ ШӀу зэрэтшӀагъэр арэп тымыкӀодэу Тхьэм тыкъызкӀигъэнэжьырэр. ЦӀыфыр зыщымытхъужьыным пае, Тхьэм а Ӏофыр аущтэу ыгъэпсыгъ.

¹⁰ Сыда пӀомэ, тыкъэзгъэхъурэр Тхьэр ары. Тхьэм тыкъыгъэхъугъ Христос тыгухэм зэрарылъымкӀэ, ӀофышӀухэу Тхьэм къытфигъэпсыгъагъэхэр дгъэцэкӀэнхэм пае.

ХристоскӀэ шӀошъхъуныгъэ зиӀэхэр зы лъэпкъ зэрэхъухэрэр

¹¹ Арышъ, шъо, хымэ лъэпкъэу къалъфыгъэхэр, шъукъэдаӀу. Сунэт ашӀыгъэхэр (ӀэкӀэ сунэт ашӀыгъэхэр ары зыфасӀохэрэр) шъо, «сунэт амышӀыгъэхэкӀэ» заджэхэрэм, мыр шъугу къэжъугъэкӀыжьын фае:

¹² пасэм Христос шъугухэм арымылъэу шъупсэущтыгъ. Израиль лъэпкъым шъущымыщэу, Тхьэм а лъэпкъыр къызэригъэгугъэгъэ Ӏофхэм атет зэзэгъыныгъэхэмкӀэ Ӏахь шъуимыӀэу, шъухымагъ. ГугъапӀэ шъуимыӀэу, Тхьэр шъумышӀэу мы дунаим шъутетыгъ.

¹³ Ау джы, Христос шъугухэм арылъ зэрэхъугъэм пае, шъо, зэгорэм Тхьэм пэчыжьагъэхэр, Христос ылъэу къащым щыкӀэкӀыгъэмкӀэ джы Тхьэм пэгъунэгъу шъухъугъ.

¹⁴ Сыда пӀомэ, ежь Христос ары тызэзгъэшӀужьыгъэр. Ежьыр ары итӀур зы зышӀыгъэри, ыпкъыкӀэ ахэмэ азыфагу дэлъыгъэ пыиныгъэм идэпкъ зэхэзгъэуагъэри.

¹⁵ Унашъохэмрэ хабзэхэмрэ зэрыт Тэурат хабзэр лъэныкъокӀэ ригъэзэкӀыгъ. Христос аущтэу зыкӀишӀыгъэр цӀыфхэр ежь зэригъэшӀужьыныр, а лъэпкъитӀур зы лъэпкъ ыгъэхъуныр арых,

¹⁶ зэпыиныгъэри къащым щигъэкӀодэу, итӀур зыпкъ хъугъэу, Христос къащым зэрэтелӀыхьагъэмкӀэ ахэр Тхьэм ригъэшӀужьынхэр ары.

¹⁷ Христос къакӀуи, шъо, Тхьэм пэчыжьэгъэ цӀыфхэми, пэгъунэгъугъэ цӀыфхэми, зэшӀужьыным икъэбар къышъуигъэӀугъ.

¹⁸ Сыда пӀомэ, Христос Ӏофэу ышӀагъэм пае, а Псэ ЛъапӀэр тыгухэм арылъэу, титӀуи Ты лъапӀэм пэгъунэгъу тыхъун тэлъэкӀы.

¹⁹ Арышъ, шъухымэжьэп, шъухэхэсыжьэп, ау Тхьэм ицӀыф лъапӀэхэм ащыщ шъухъугъ, Тхьэм иунагъо щыщи шъухъугъ.

²⁰ Апостолхэмрэ пегъымбархэмрэ лъапсэу агъэуцугъэм шъутет. Ежь Христос Исус ары унэр зыӀыгъ лъэпсэ мыжъошхор.

²¹ Зиусхьан Исус ары унэр зэкӀэри зэтезгъэуцорэр, ежьыри а унэм зэрэщыӀэм пае, Тхьэм иунэшхо лъапӀэ хъунэу хэхъо.

²² Шъо Христос шъугухэм арылъэу мыжъохэм шъуафэдэу, Тхьэм ы Псэ ЛъапӀэ зэрыс унэм Христос шъори шъухегъэуцо.