Апостол Иуан ящэнэрэ тхылъэу ытхыгъэр 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ чылыс зэӀукӀэм инахьыжъхэм сащыщэу, о, Гай лъапӀэу шъыпкъэкӀэ шӀу слъэгъурэм, мы тхылъыр къыпфэсэтхы.

² СилъапӀ, упсэоу, пстэумкӀи утхъэжьэу ущыӀэнэу Тхьэм селъэӀу, угурэ упсэрэ зэрэпсэфыхэрэм фэдэу.

³ Сыда пӀомэ, тшы куп заулэ къакӀуи, о уишъыпкъагъэ игугъу ашӀызэ, шъыпкъагъэм тетэу узэрэзекӀорэр къызаушыхьатым, лъэшэу сыгушӀуагъ.

⁴ Сибынхэр шъыпкъагъэм тетхэу зэрэзекӀохэрэр зызэхэсхыкӀэ, ащ нахь гушӀогъошхо зи сиӀэп.

⁵ СилъапӀ, тшыхэр хымэхэми, шӀоу афапшӀэрэмкӀэ шъыпкъагъэ уиӀэу озекӀо.

⁶ Ахэмэ чылыс зэӀукӀэм ыпашъхьэ уишӀулъэгъу къыщаушыхьатыгъ. Тхьэм ыгу зэреӀурэм тетэу, ягъогукӀэ ахэмэ ӀэпыӀэгъу уафэхъумэ, шӀу пшӀагъэу мэхъу.

⁷ Сыда пӀомэ, а тшыхэм шӀошъхъуныгъэ зимыӀэхэм ӀэпыӀэгъу зи къаӀамыхэу, Христос ыцӀэ пае гъогум техьагъэх.

⁸ Арышъ, ащ фэдэ цӀыфхэм ӀэпыӀэгъу тафэхъун фае, Ӏофэу шъыпкъэм фашӀэрэмкӀэ гъусэ тафэхъуным пае.

Диотрефрэ Димитрыйрэ

⁹ Чылыс зэӀукӀэм тхылъ фэстхыгъ, ау Диотрефэу ахэмэ пащэу афэхъунэу фаем тидэрэп.

¹⁰ Арышъ, сыкъызыкӀокӀэ, Ӏофхэу ащ ышӀэхэрэр къыхэзгъэщыщтых, гущыӀэ ӀаехэмкӀэ къызэрэттегущыӀэрэр къэсӀощт. Ащи къыщымыуцоу, тшыхэр ригъэблагъэхэрэп, езгъэблэгъэнхэу фаехэми афимыдэу апэуцу, чылыс зэӀукӀэми чӀефыжьых.

¹¹ СилъапӀ, ер зышӀэрэм илъэужхэм шъуарымыкӀоу, шӀу зышӀэрэм илъэужхэм шъуарыкӀу. ШӀу зышӀэрэр ары Тхьэм ибын. Ер зышӀэрэм шӀошъхъуныгъэкӀэ Тхьэр ылъэгъугъэп.

¹² ЦӀыф пстэури Димитрый шӀукӀэ шыхьат къыфэхъух, ежь шъыпкъэри шӀукӀэ ащ шыхьат фэхъу. Тэри шӀукӀэ шыхьат тыфэхъу, тишыхьатныгъи зэрэшъыпкъэр ошӀэ.

Аужырэ шӀуфэс гущыӀэхэр

¹³ Къыпфэстхынэу сиӀэр бэ, ау джы къэлэмрэ мэрчэп къамзыйрэкӀэ къыпфэстхынэу сыфаеп.

¹⁴ ШӀэхэу услъэгъунышъ, тызэдэтӀысэу тызэдэгущыӀэным сыщэгугъы.

¹⁵ Гупсэф уиӀэу опсэу. МыщкӀэ щыӀэ ныбджэгъухэми шӀуфэс къыуахыжьы. МодыкӀэ щыӀэ ныбджэгъухэм ацӀэкӀи шӀуфэс сфяхыжьи, аӀапэ сфэубытыжь. Амин.