Апостол Паул ятӀонэрэ тхылъэу Тимофей фитхыгъэр 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул. Тхьэм шӀоигъуагъэти, Исус Христос тыгухэм зэрарылъымкӀэ мыкӀодыжьын щыӀэныгъэ дгъотынэу Тхьэм тыкъызэригъэгугъагъэм икъэбар цӀыфхэм язгъэӀунэу Исус Христос иапостол сыхъугъ.

² ШӀу слъэгъурэ скъоу Тимофей мы тхылъыр фэсэтхы. Тхьэу Ты лъапӀэмрэ ти Зиусхьан Христос Исусрэ анэшӀу къыпщарэфи, гукӀэгъу къыпфарэшӀи, гупсэф къыуарэт.

Христос икъэбарышӀу фэшъыпкъэнэу Паул Тимофей зэригъэгушхуагъэр

³ Сятэжъхэм сафэдэу сыгукӀэ мыхъун зи зыдэсымышӀэжьэу, сызфэлажьэрэ Тхьэм щытхъу фэсэшӀы. Тхьэм селъэӀузэ, чэщи мафи уигугъу сшӀы зэпытэу, Тхьэм щытхъу фэсэшӀы.

⁴ Унэпсхэр сыгу къэкӀыжьых, гушӀуагъо сыгу из хъуным пае, услъэгъу сшӀоигъу.

⁵ УишӀошъхъуныгъэ шъыпкъэ сыгу къэкӀыжьы. Ащ фэдэ шӀошъхъуныгъэ уянэжъэу Лоидэрэ уянэу Евникэрэ агухэм арылъыгъ; джы ар о угуи зэрилъым сыщэгугъы.

⁶ Арышъ, сэ сӀэхэр о пшъхьэ къызэрэтеслъхьагъэхэмкӀэ Тхьэм лъэкӀэу къыуитыгъэм имашӀо зэкӀэбгъэнэжьынэу угу къэсэгъэкӀыжьы.

⁷ Сыда пӀомэ, Тхьэм ежь ы Псэ ЛъапӀэу тыгухэм къарилъхьагъэм щынагъо тыгухэм арылъэу ыгъэхъурэп, лъэкӀи, шӀулъэгъуи, зыщыӀэни тыгухэм арылъхэу егъэхъу нахь.

⁸ УмыукӀытэу ти Зиусхьан шыхьат фэхъу. Сэри ежь сызэрэфэлажьэрэм пае, хьапсым сызэрэчӀадзагъэм фэшӀ, укъыстемыукӀытыхь, Тхьэм илъэкӀыкӀи къэбарышӀум паий къин къыздэщэч.

⁹ Тхьэр ары тымыкӀодэу тыкъэзгъэнэжьыгъэри, гукъэбзагъэкӀэ тыпсэунэу къытэджагъэри. Аущтэу зыкӀишӀагъэр ежь ащ фэдэ гухэлъ ышӀыгъэу, ынэшӀу къытщифагъэшъ ары. ТишӀушӀагъэхэм яӀоф ащ хэлъэп. Христос ИсускӀэ Тхьэм ынэшӀу къызытщифагъэр лъэхъан пстэуми апэ ары,

¹⁰ ау джы тымыкӀодэу тыкъэзгъэнэжьырэ Исус Христос къызэрэлъэгъуагъэмкӀэ, Тхьэм ынэшӀу щыфэныр нафэ къэхъугъ. Исус Христос лӀэныгъэр ыгъэкӀодыгъ, къэбарышӀумкӀи мыкӀодыжьын щыӀэныгъэр нафэ къытфишӀыгъ.

¹¹ А къэбарышӀур цӀыфхэм язгъэӀунэуи, иапостол сыхъунэуи, а къэбарышӀур цӀыфхэм язгъэшӀэнэуи Тхьэм сыкъыгъэнэфагъ.

¹² Джары мы къиныр зыкӀэсщэчырэр; ау сэ сыукӀытэрэп, сыда пӀомэ, Исус Христосэу шӀошъхъуныгъэ зыфысиӀэр сэшӀэ, ежьыми Ӏофэу сэ спшъэ къырилъхьагъэм а мафэм нэсыфэ къыфэсакъын зэрилъэкӀыщтым сыщэгугъы.

¹³ Христос Исус угу зэрилъым пае, шӀошъхъуныгъэрэ шӀулъэгъурэ уиӀэхэу, гущыӀэхэу сэ къасӀохэу зэхэпхыгъэхэу, узщыгугъышъущтхэр шапхъэм фэдэу Ӏыгъхэу уатемыкӀ.

¹⁴ Тхьэм Ӏофэу о ппшъэ къырилъхьагъэр Тхьэм ы Псэ ЛъапӀэу тыгухэм арылъымкӀэ къэухъум.

¹⁵ Асие хэкум ис пстэури, ахэмэ ащыщэу Фигелрэ Ермогенрэ, сыкъызэрабгынагъэр о ошӀэ.

¹⁶ Зиусхьаным Онесифор иунагъо гукӀэгъу къыферэшӀ, сыда пӀомэ, бэрэ ащ сыгу ыгъэпсэфыжьыгъ, Ӏэхъу-лъэхъу стелъыгъэми, къыстеукӀытыхьагъэп.

¹⁷ Ар Рим къэлэшхом къызэкӀом, сыкъегъотыфэ, емызэщэу къыслъыхъугъ.

¹⁸ Ахърэт мафэм Зиусхьаным ащ гукӀэгъу ферэшӀ. Ефес къалэм бэрэ къызэрэщыздэӀэпыӀагъэр о нахьышӀоу ошӀэ.