2 Фессалоникэ 3 - Къэбарышӏур (Инджыл)

ЯЩЭНЭРЭШЪХЬ Тхьэм шъукъытфелъэӀу

¹ Аужыпкъэм, тшыхэр, шъуадэжь зэрэщыхъугъэм фэдэу, Зиусхьаным икъэбарышӀу цӀыфхэм тыдэкӀи анэсынэуи, цӀыфхэм а къэбарышӀум щытхъу фашӀынэуи Тхьэм шъуелъэӀу.

² ЦӀыф бзэджэ-наджэхэм тащиухъумэнэу Тхьэм шъуелъэӀу, сыда пӀомэ, зэкӀэ цӀыфхэм шӀошъхъуныгъэ яӀэп.

³ Ау Зиусхьаным ыӀорэр къегъэшъыпкъэ. Ащ шъугухэр ыгъэпытэщт, шэйтанми шъущиухъумэщт.

⁴ Тиунашъохэр зэрэжъугъэцакӀэхэрэмкӀи зэрэжъугъэцэкӀэщтхэмкӀи Зиусхьаным тыкъышъущегъэгугъы.

⁵ Тхьэм ишӀулъэгъурэ Христос итеубытагъэрэ Зиусхьаным шъугухэр аферэгъазэх.

ШӀошъхъуныгъэ зиӀэхэр мылажьэхэ хъущтэп

⁶ Тшыхэр, хэтрэ тшэу лэжьэныр зымыдэу, къышъуфэдгъэнэгъэ унашъохэм атемытым зыщышъудзыенэу ти Зиусхьан Исус Христос ыцӀэкӀэ унашъо къышъуфэтэшӀы.

⁷ Шъор-шъорэу шъошӀэ тилъэужхэм шъузэрарыкӀон фаер. Шъуадэжь тызыщэӀэм, тымылажьэу къыхэкӀыгъэп.

⁸ ЗыдгъэхьакӀэу зыми ихьалыгъуи тшхыгъэп. Ау тыулэоу, лъэшэу тылажьэу, шъуащыщэу зыми хьылъэ тыфэмыхъуным пае, чэщи мафи Ӏоф тшӀэщтыгъ.

⁹ ЗышъодгъэхьакӀэнэу фитыныгъэ тимыӀагъэп, ау тилъэужхэм шъуарыкӀоным пае, шапхъэ тышъуфэхъунэу тызэрэфэягъэр ары тызкӀэлэжьагъэр.

¹⁰ Шъуадэжь тызыщэӀэм, мы унашъор къышъуфэтшӀыгъ: лэжьэнэу зымыдэрэр орэмышхэ.

¹¹ Сыда пӀомэ, шъуащыщхэу заулэмэ лэжьэнхэр амыдэу зэхэтхыгъэ. Ахэмэ Ӏоф зи ашӀэрэп, ау яӀоф зыхэмылъым пылъых.

¹² Ащ фэдэ цӀыфхэр самбырэу лэжьэнхэу, ежь яхьалыгъуи ашхынэу ти Зиусхьан Исус Христос ыцӀэкӀэ унашъо афэтэшӀы ыкӀи тялъэӀу.

¹³ Шъо, тшыхэр, мыр шъотэӀо, шъуемызэщэу шӀушӀэным шъупылъ.

¹⁴ ЦӀыф горэ мы тхылъым итхэу шъуатӀохэрэм ямыдэӀумэ, а цӀыфым гъунэ лъышъуф, жъугъэукӀытэжьыным паи ащ гъусэ шъуфэмыхъу.

¹⁵ Ау шъуипыим фэдэу шъуемыплъ, шъушы фэдэу гурыжъугъаӀу нахь.

Аужырэ шӀуфэс гущыӀэхэр

¹⁶ ЗэкӀэ гупсэфыр къытэзытырэ Зиусхьаным зэкӀэмкӀи сыдигъуи гупсэф къышъуерэт. Зиусхьаныр шъо пстэуми шъуерэгъус.

¹⁷ Сэ, Паул, сӀэкӀэ мы шӀуфэс гущыӀэхэр къышъуфэсэтхы. Мары зэрэстхырэр.

¹⁸ Ти Зиусхьан Исус Христос ынэшӀу шъо пстэуми къышъущерэф. Амин.