2 Фессалоникэ 2 - Къэбарышӏур (Инджыл)

ЯТӀОНЭРЭШЪХЬ Бзэджэныгъэм ицӀыф

¹ Ти Зиусхьан Исус Христос дунаим къызэрэкӀожьыщтымрэ ежь дэжь тызэрэщызэрэугъоижьыщтымрэ яхьылӀагъэу, тшыхэр, моущтэу тышъолъэӀу:

² Христос дунаим къызыкӀожьыщт мафэр къэсыгъэу, Тхьэм ы Псэ ЛъапӀэ ежь ыгу къырилъхьагъэу цӀыф горэм ыӀозэ, пцӀы къеусыми, е а мафэр къэсыгъэу къэбар къаӀуатэми, е тэ тхылъэу къэттхыгъэм аущтэу итэу цӀыфхэм пцӀы къаусыми, а Ӏофым псынкӀэу зешъумыгъэгъэгумэкӀ, зешъумыгъэгъэщын.

³ Хэт щыщи зыкӀи зыкъешъумыгъэгъапцӀ. ЦӀыфхэм акӀыб Тхьэм фагъазэным ыпэкӀэ, бзэджэныгъэм ицӀыфэу Тхьэм ыгъэкӀодыжьыщтыр къэлъэгъоными ыпэкӀэ, а мафэр къэсыщтэп.

⁴ А цӀыфыр тхьэхэу зыфаӀохэрэми, цӀыфхэм агъэлъапӀэрэ Ӏоф пстэуми апэуцужьыщт, ахэмэ пстэуми анахьи нахь инэу зилъытэжьыщт. Тхьэм иунэшхуи итӀысхьанышъ, «Сэ сы Тхь» ыӀощт.

⁵ Шъуадэжь сызыщэӀэм, мы Ӏофхэр къызэрэшъосӀуагъэхэр шъугу къэкӀыжьырэба?

⁶ Бзэджэныгъэм ицӀыф джы гъогу езымытырэри шъо шъошӀэ. Ау игъо къызыскӀэ, бзэджэныгъэм ицӀыф къэлъэгъощт.

⁷ Сыда пӀомэ, бзэджэныгъэм илъэкӀ шъэф джы Ӏоф ешӀэ. Ау джы нэс бзэджэныгъэм ицӀыф гъогу езымытыгъэр ыпэ рапшӀэу ӀукӀыжьын фае.

⁸ ЕтӀанэ бзэджэныгъэм ицӀыф къэлъэгъощт. Ау Зиусхьан Исус щытхъушхо иӀэу къызыкӀожьыкӀэ, ыжэкӀэ къыщэрэ жьымкӀэ ар ыукӀыжьыщт, ыгъэкӀодыжьыпэщт.

⁹ Бзэджэныгъэм ицӀыф къызыкӀокӀэ, шэйтаным илъэкӀ иӀэу къэкӀощт. ЛъэкӀ Ӏофышхо нэпцӀхэри зэкӀэ, нэшэнэ гъэшӀэгъон нэпцӀхэри, Ӏофышхо гъэшӀэгъон нэпцӀхэри цӀыфхэм аригъэлъэгъущт.

¹⁰ Сыд щыщырэ бзэджэныгъэкӀи цӀыфхэу кӀодыпӀэм игъогу тетхэр ыгъэпцӀэщтых. Ахэр зыкӀэкӀодхэрэр мыкӀодхэу зыкъагъэнэжьыным пае, шъыпкъэр шӀу алъэгъунэу зэрамыдагъэр ары.

¹¹ Арышъ, пцӀыр ашӀошъ хъуным пае, Тхьэм ахэмэ ягупшысакӀэ зэрегъэкӀокӀы.

¹² Аущтэу шъыпкъэр зышӀошъ мыхъугъэхэу бзэджагъэм зыгу еӀурэ цӀыф пстэури Тхьэм ыгъэмысэщт.

ШъумыкӀодэу шъукъыгъэнэжьыным пае Тхьэм шъукъыхихыгъ

¹³ Ау шъо, тшыхэу Зиусхьаным шӀу ылъэгъухэрэр, шъощ пае Тхьэм щытхъу фэтшӀ зэпытын фае, сыда пӀомэ, ублапӀэм щегъэжьагъэу шъумыкӀодэу шъукъыгъэнэжьыным пае, Тхьэм шъукъыхихыгъ. Тхьэм ежь ы Псэ ЛъапӀэу шъугухэр зыгъэкъэбзэжьырэм илъэкӀыкӀи, шъыпкъэр шъушӀошъ зэрэхъугъэмкӀи шъумыкӀодэу шъукъегъэнэжьы.

¹⁴ Тхьэр ибынхэм ащыщ шъухъунэу къызэрэшъоджагъэр къэбарышӀоу шъодгъэӀугъэр ары. Аущтэу ти Зиусхьан Исус Христос ищытхъушхокӀэ Ӏахь къышъулъыӀэсыщт.

¹⁵ Арышъ, тшыхэр, шъукъызэкӀэмыкӀоу, бзэгукӀи тхылъымкӀи шъодгъэшӀэгъэ Ӏофхэм пытэу шъуатетэу гъогум шъурыкӀон фае.

^16-17 Тхьэу Тятэ лъапӀэу шӀу тызылъэгъугъэу, зынэшӀу щыфэныгъэкӀэ сыдигъуи тызгъэгушхорэм шӀум тыщегъэгугъы. Ежьыррэ ти Зиусхьан Исус Христосрэ сыд щыщ шӀугъэ жъугъэцэкӀэным, шъуӀоным пае шъуарэгъэгушху, шъугухэри арэгъэпытэх.