Апостол Петрэ ятӀонэрэ тхылъэу ытхыгъэр 1 - Къэбарышӏур (Инджыл)

АПЭРЭШЪХЬ ШӀуфэс

¹ Исус Христос фэлажьэрэ иапостолэу Симон Петрэ ары мы тхылъыр къэзытхырэр. Сэ сы Симон Петрэ, Исус Христос сыфэлажьэ, сыриапостол. Ти Тхьэу, тымыкӀодэу тыкъэзгъэнэжьырэ Исус Христос изэфагъэкӀэ осэшхо зиӀэ шӀошъхъуныгъэу тиӀэм фэдэ шӀошъхъуныгъэ зиӀэ хъугъэ цӀыфхэр арых мы тхылъыр зыфэстхыхэрэр.

² Ти Тхьэрэ ти Зиусхьан Исус Христосрэ нахьышӀоу зэрэшъушӀэхэрэмкӀэ Тхьэм ынэшӀу инэу къышъущерэфэ зэпыт, гупсэфышхуи къышъуерэт зэпыт.

Тхьэм ибынхэм ащыщ шъухъунэу къызэрэшъоджагъэри шъукъызэрэхихыгъэри къэжъугъэшъыпкъэжьых

³ Тхьэм шӀолӀыкӀ фытиӀэу тыпсэуным пае, тищыкӀэгъэ пстэури Тхьэм илъэкӀышхокӀэ Христос къытитыгъ. Аущтэу зыкӀишӀагъэр зищытхъушхокӀи зишӀугъэшхокӀи ибынхэм ащыщ тыхъунэу къытэджэгъэ Тхьэр зэрэтшӀэрэр ары.

⁴ Аущтэу Тхьэм тыкъызэригъэгугъэгъэ Ӏахьышхохэу осэшхо зиӀэхэр къытитыгъэх, ахэмкӀи дунаим тет хъопсэ Ӏаехэу цӀыфхэр зыгъэкӀодхэрэм защышъудзыенышъ, Тхьэм ищытыкӀэ-псэукӀэ щыщ Ӏахь жъугъотыным пае.

⁵ Арышъ, шъуишӀошъхъуныгъэ шӀугъэри зэрэхэжъугъэхъоным ыуж шъуит; шӀугъэми шӀэныгъэр хэжъугъахъу;

⁶ шӀэныгъэми щэӀэныгъэ хэжъугъахъу; щэӀэныгъэми теубытагъэ хэжъугъахъу; теубагъэми Тхьэм шӀолӀыкӀэу фышъуиӀэныр хэжъугъахъу;

⁷ Тхьэм шӀолӀыкӀэу фышъуиӀэм зэкъошныгъэр хэжъугъахъу; зэкъошныгъэми шӀулъэгъур хэжъугъахъу.

⁸ Мыхэр зэкӀэ шъухэлъхэу, ахахъохэмэ, зи шъумыгъахъэу, шӀугъи къышъухэмыкӀэу шъукъэнэщтэп, ти Зиусхьан Исус Христоси нахьышӀоу шъушӀэщт.

⁹ Ау мы Ӏофхэр зыхэмылъ цӀыфыр нэшъу, ынэхэри зэтепӀуагъэх. А цӀыфым ипсэкӀодшӀагъэхэр Тхьэм зэрэригъэукъэбзыкӀыжьыгъэхэр щыгъупшэжьыгъ.

¹⁰ Аущтэу зэрэщытым пае, сшыхэр, Тхьэм ибынхэм ащыщ шъухъунэу къызэрэшъоджагъэри шъукъызэрэхихыгъэри къызэрэжъугъэшъыпкъэжьыным нахьыбэу ыуж шъуит зэпыт. Джаущтэу шъушӀымэ, Тхьэм игъогу егъашӀэми шъутекӀыщтэп,

¹¹ сыда пӀомэ, аущтэу тымыкӀодэу тыкъэзгъэнэжьырэ ти Зиусхьан Исус Христос и Тетыгъошхоу мыкӀодыжьыщтым шъучӀэхьанэу фит шъухъущт.

¹² Арышъ, мы Ӏофхэр шъошӀэми, шъыпкъагъэми пытэу шъутет пэтми, мыхэр зэкӀэ шъугу къэзгъэкӀыжь зэпытыщт.

¹³ Спкъы ичэтэнгъэӀагъэ сычӀэтэу сэпсэуфэ, мы Ӏофхэр шъугу къызэрэзгъэкӀыжьырэмкӀэ шъукъэзгъэущыныр тэрэзэу сэлъытэ.

¹⁴ Бэ темышӀэу спсэ спкъы зэрэхэкӀыжьыщтыр сэшӀэ, ти Зиусхьан Исус Христос къызэрэзгуригъэӀуагъэм фэдэу.

¹⁵ Мы дунаим сызехыжьырэ ужми, мы Ӏофхэр сыдигъуи шъугу къыжъугъэкӀыжьышъуным джы сыпылъыщт.

Апостолхэм къаӀогъэ къэбарыр шъыпкъэ

¹⁶ Исус Христос лъэкӀышхоу иӀэмрэ дунаим къызэригъэзэжьыщтымрэ якъэбар къызышъотэгъэӀум, зэгъэкӀугъэу къэтыугупшысыгъэ тхыдэжъхэр къышъуфэтӀотагъэкӀэ арэп, тэ тынэхэмкӀэ ежь ищытхъушхо тлъэгъугъэ нахь.

¹⁷ Сыда пӀомэ, «Мары сэ шӀу слъэгъурэ с Къо кӀасэу сыгу зэӀурэр» – ыӀоу, щытхъушхо зиӀэ анахь Лъагэм ымакъэ къызынэсым, Тхьэу Ты лъапӀэм лъытэныгъэшхорэ щытхъушхорэ ащ фигъэшъошагъ.

¹⁸ А макъэу уашъом къиӀукӀыгъэр тэ ттхьакӀумэхэмкӀэ зэхэтхыгъ, сыда пӀомэ, тыригъусэу Ӏошъхьэ лъапӀэм тытетыгъ.

¹⁹ Джы нахь лъэшэу цыхьэ афэтэшӀы пегъымбархэм къаӀогъэ гущыӀэхэм. Нэф къэшъынышъ, нэфылъ жъуагъор шъугу къыщыкъокӀыфэ, ахэмэ къаӀуагъэхэу, чӀыпӀэ мэзахэ горэм къыщынэфырэ остыгъэм фэдэхэм шъуафэсакъызэ шъуядэӀумэ, шӀу шъошӀэ.

²⁰ ЗэкӀэми анахьэу мыр шъушӀэн фае: Тхьэм игущыӀэ тхыгъэхэм арытхэу пегъымбархэм къаӀуагъэхэр зыми ежь-ежьырэу зэхифынхэ ылъэкӀыщтэп.

²¹ Пегъымбархэм ягущыӀэхэр ежь-ежьырэу къаӀуагъэхэп, ау Тхьэм ы Псэ ЛъапӀэ а гущыӀэхэр пегъымбархэм агухэм къарилъхьэхи, къаригъэӀуагъ.