Апостол Иуан ятӀонэрэ тхылъэу ытхыгъэр 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ чылыс зэӀукӀэм инахьыжъхэм сащыщэу, Тхьэм къыхихыгъэ о, гощэ лъапӀэу ыкӀи уибынхэу шъыпкъагъэкӀэ шӀу слъэгъухэрэм, мы тхылъыр къышъуфэсэтхы. Шъо шӀу шъузылъэгъурэр сэ сизакъоп, шъыпкъагъэр зэзгъэшӀэгьэ пстэуми шӀу шъуалъэгъу.

² Шъыпкъагъэу тыгухэм арылъэу, егъашӀэми илъыщтым къыхэкӀыкӀэ шъо шӀу шъутэлъэгъу.

³ Тхьэу Ты лъапӀэмрэ Ты лъапӀэм ы Къоу Зиусхьан Исус Христосрэ тэ шъыпкъэр зышӀэхэрэми шӀу зэрэлъэгъухэрэми анэшӀу къытщафэщт, гукӀэгъушхуи къытфашӀыщт, гупсэфи къытатыщт.

Шъыпкъагъэмрэ шӀулъэгъуныгъэмрэ

⁴ Ты лъапӀэм къытфишӀыгъэ унашъом фэдэу, уибынхэм ащыщэу куп шъыпкъагъэм тетэу зекӀоу зысэлъэгъум, лъэшэу сыгушӀуагъ.

⁵ Джы гощэ лъапӀ, сыолъэӀу: шӀу тызэрэжъугъэлъэгъу. Ар унэшъуакӀэм фэдэу къыпфэстхырэп, ар апэм къыщегъэжьагъэу тиӀэгъэ унашъу.

⁶ ШӀулъэгъуныгъэу зыфасӀорэр Тхьэм иунашъохэм татетэу тызекӀоныр ары. Апэм къыщегъэжьагъэу зэхэшъухыгъэ унашъор – шӀулъэгъуныгъэ шъухэлъэу шъузэрэзекӀорэр ары.

⁷ Исус Христос дунаим цӀыфэу къызэрэкӀуагъэр зымыдэрэ цӀыфыбэу нэмыкӀ цӀыфхэр зыгъапцӀэхэрэр дунаим къыщылъэгъуагъэх. Ащ фэдэ цӀыфхэр гъэпцӀакӀох ыкӀи антихристых.

⁸ Ӏофэу къэжъугъэхъагъэр шъумыгъэкӀодэу, шъуиӀахьышӀу лъыкӀэжъугъахьэу жъугъотыжьыным пае, шъузфэсакъыжь.

⁹ Хэти Христос тигъэшӀэгъэ Ӏофхэм атемыт зэпытэу, атекӀырэ цӀыфым ыгу Тхьэр илъэп, ау Христос тигъэшӀэгъэ Ӏофхэм атет зэпытым ыгу Ты лъапӀэри Къо лъапӀэри илъых.

¹⁰ Шъуадэжь зыгорэ къакӀоу, Исус тигъэшӀэгъэ Ӏофхэм атемытэу шъуигъашӀэмэ, ар шъуиунэ къишъумыгъахь, шӀуфэси ешъумых.

¹¹ Сыда пӀомэ, ащ шӀуфэс езыхырэр ащ ибзэджэшӀагъэхэмкӀи игъус.

Аужырэ шӀуфэс гущыӀэхэр

¹² Джыри къышъуфэстхынэу сиӀэр бэ, ау тхылъыпӀэрэ мэрчэп къамзыйрэкӀэ стхынэу сыфаеп. Ау тигушӀуагъо икъугъэ хъуным пае, шъуадэжь сыкъэкӀонышъ, тызэдэтӀысэу тызэдэгущыӀэным сыщэгугъы.

¹³ Тхьэм къыхихыгъэ пшыпхъу ибынхэм шӀуфэс къыуахыжьы. Амин.