1 Коринф 1 - Къэбарышӏур (Инджыл)

АПЭРЭШЪХЬ ШӀуфэс

¹ Сэ сы Паул. Тхьэм шӀоигъуагъэти, Исус Христос иапостол сыхъугъ. Тшы Тимофей сигъусэу шъо, Тхьэм ичылыс зэӀукӀэу Коринф къалэм щыӀэм щыщхэмрэ Тхьэм ицӀыф лъапӀэхэу Ахаие хэкум зэкӀэ щыпсэухэрэмрэ, мы тхылъыр къышъуфэсэтхы.

² Тхьэу тя Тэ лъапӀэрэ Зиусхьан Исус Христосрэ анэшӀу къышъущарэфи, гупсэф къышъуарэт.

Паул Тхьэм щытхъу зэрэфишӀырэр

³ Тхьэу ти Зиусхьан Исус Христос я Тэ щытхъушхор ий. ГукӀэгъушхо зиӀэ Ты лъапӀэу, гукъаоу тиӀэхэр зэкӀэ тшъхьащызыхырэу къыткъот Тхьэм,

⁴ сыд фэдэ гузэжъогъу тыхэтми, тегъэгушхо. Аущтэу Тхьэр къыткъотэу тызэригъэгушхорэм фэдэ къабзэу, тэри сыд фэдэ гузэжъогъу хэтхэри дгъэгушхонхэ тлъэкӀыщт.

⁵ Сыда пӀомэ, Христос ыщэчыгъэ къинхэм тиӀахьышхо зэрахэлъым фэдэу, Христос тыгухэм арылъэу Тхьэм инэу тегъэгушхо.

⁶ Тэ гузэжъогъу тызыхэткӀэ, ащ тызкӀыхэтыр шъо Тхьэм шъуигъэгушхонэу, шъумыкӀодэу шъукъыгъэнэжьынэу ары. Тхьэм тызигъэгушхокӀэ, тызкӀигъэгушхорэр тэ къинхэу тщэчыхэрэм фэдэ къинхэр теубытагъэкӀэ шъущэчынэу шъуигъэлъэкӀызэ, Тхьэм шъуигъэгушхонэу ары.

⁷ Инэу тыкъышъущэгугъы, сыда пӀомэ, къинхэу тщэчыхэрэм шъуиӀахь къыддэшъущэчынэу ахэлъышъ, Тхьэм шъори шъузэригъэгушхощтыр тэшӀэ.

⁸ Асие хэкум гузэжъогъоу тызщыхэтыгъэм икъэбар шъумышӀэным тыфаеп. Псэоу тыкъэнэжьынэу гугъапӀэ тимыӀэжьэу, тфэщэчыщтым нахьи нахьыбэрэ гузэжъогъушхо дэдэм тыхэтыгъ.

⁹ ШъыпкъэмкӀэ, хьыкумэшӀым укӀ хьыкум къыттыралъхьанэу къыӀуагъэм фэдэу къытщыхъугъ. Ар зыкӀэхъугъэр тшъхьэ тыщымыгугъэу, лӀагъэхэр къэзгъэтэджыжьырэ Тхьэм тыщыгугъыныр ары.

¹⁰ Ащ фэдэ лӀэныгъэу къытпыщылъым Тхьэм тыкъыӀэкӀихыжьыгъ, джыри тыкъыӀэкӀихыжьыщт. ШъуитхьэлъэӀухэмкӀи шъукъыддэӀэпыӀэзэ, Тхьэм къиным тыкъыӀэкӀихищыжьынэу ежь тыщэгугъы.

¹¹ Аущтэу цӀыфыбэ къытфелъэӀунышъ, Тхьэм ынэшӀу къытщифэщт, ынэшӀу къызэрэтщифагъэм паий, цӀыфыбэмэ тэ тцӀэкӀэ Тхьэм ищытхъу аӀотэщт.

Паул игухэлъ зыкӀызэблихъугъэр

¹² Мыры тызэрызыщытхъужьырэр: тызэрагъэмысэн зи щымыӀэу, Тхьэм ыгу зэӀурэ гухэлъ къабзэ тиӀэу мы дунаим, пстэуми апэу шъуадэжь, тызэрэщызекӀуагъэмкӀэ тыгухэр шыхьат къытфэхъух. Тхьэм ынэшӀу къызэрэтщифагъэм тетэу, аущтэу тызекӀуагъ, мы дунаим ицӀыфхэм яакъылышӀуагъэу зыфаӀорэм тетэу арэп.

^13-14 Сыда пӀомэ, шъузэджэшъуным, къыжъугурыӀошъуным нэмыкӀ къышъуфэттхырэп. Икъоу къыжъугурымыӀуагъэри ижъугъэкъужьэу къызэрэжъугурыӀощтым сыщэгугъы. Ащыгъум ти Зиусхьан Исус къызыкӀожьыщт мафэм шъоркӀэ тызэрэзыщытхъужьыщтым фэдэу, шъори тэркӀэ шъузщытхъужьыщт.

¹⁵ Ащ сыщэгугъыти, апэу шъуадэжь сыкъэкӀонэу сыфэягъ, тӀо сишӀуагъэ къышъозгъэкӀыным пае.

¹⁶ Македоние хэкум сызежьэкӀэ, шъуадэжь сыкъекӀолӀэн сыгу хэлъыгъ; ащ сыкъызикӀыжькӀи, шъуадэжь сыкъыдырекӀолӀэжь сшӀоигъуагъ. Иудей хэкум сыкӀоным пае, сигъогукӀэ ӀэпыӀэгъу шъукъысфэхъунэуи сышъущыгугъыгъ.

¹⁷ Аущтэу гухэлъ сиӀэ зэхъум, сыгу илъыр сымышӀэу сызекӀуагъэу ара? Е мы дунаим ицӀыфхэм ягухэлъхэр зэрашӀыхэрэм фэдэу, сигухэлъхэр сэшӀыха? Зэ «Ары», зэ «Хьау, арэп» сӀонэу сихабза?

¹⁸ ГущыӀэу къышъотӀуагъэр зэ арэу, зэ зэрэармырыр Тхьэм ишъыпкъагъэмкӀэ сэӀо.

¹⁹ Сыда пӀомэ, Силуан, Тимофей, сэры, Тхьэм ы Къо Исус Христосэу зикъэбар шъуадэжь щыдгъэӀугъэр зэ арэу, зэ армырэу хъурэп, ау Исус Христосыр ары Тхьэм тыкъызэригъэгугъэгъэ Ӏофхэр къэзгъэхъурэр, шъыпкъэу зышӀырэр.

²⁰ Сыда пӀомэ, Тхьэм тыкъызэригъэгугъэгъэ Ӏоф пстэуми «Ары» ыкӀи «Амин» афэхъоу, ахэр къэзгъэхъурэр, шъыпкъэуи зышӀырэр Христос ары, тэ Тхьэм щытхъушхо фэтшӀыным пае.

²¹ Тхьэр ары шъори тэри Христос игъогу пытэу тытезгъэтырэри, тиӀоф тшӀэнэу тпшъэ къизылъхьагъэр.

²² Ежьыр ары ибынхэм тызэращыщыр тэзгъашӀэрэ мыхъурэу, шӀугъэ къызэрэтигъэгъотыщтым ишэсэу ежь ы Псэ ЛъапӀэ тыгухэм къарызылъхьагъэр.

²³ Шъыпкъэр сымыӀомэ, сэрэкӀод. Сыкъышъушъхьасыти ары Коринф къалэм джырэ нэс сыкъызкӀэмыкӀуагъэр. АщкӀэ шыхьат къысфэхъунэу, Тхьэм зыфэсэгъазэ.

²⁴ Шъо шъуишӀошъхъуныгъэ тетыгъо фытиӀэнэу тыфаеп, шъудгъэгушӀонэу тыкъыжъудэлажьэ нахь, сыда пӀомэ, шӀошъхъуныгъэм игъогу пытэу шъутет.