1 Фессалоникэ 5 - Къэбарышӏур (Инджыл)

ЯТФЭНЭРЭШЪХЬ

¹ Тшыхэр, а Ӏофхэр къызыхъущт лъэхъанхэми сыхьатхэми яхьылӀагъэу къышъуфэттхыныр ищыкӀагъэп.

² ТыгъуакӀор чэщым цӀыфхэм амышӀахэу къызэрякӀурэм фэдэу, Зиусхьаныр дунаим къызыкӀожьыщт мафэр къызэрэкӀощтыр шъошӀэ.

³ «Джы гупсэфыгъо тиӀ, щынагъо зи щыӀэп», цӀыфхэм заӀокӀэ, етӀанэ амышӀахэу къинышхо къафэкӀощт, хъушъэн ихьэгъэ бзылъфыгъэм къинышхо къызэрэфакӀорэм фэдэу. Ащ хэкӀыжьыпӀэ иӀэщтэп.

⁴ Ау шъо, тшыхэр, шӀункӀым шъухэтэп. Арышъ, а мафэр тыгъуакӀом фэдэу шъумышӀахэу къышъуфэкӀощтэп.

⁵ Шъо, зэкӀэри, нэфынэм шъурибын, мафэми шъурибын. Тэ чэщыми шӀункӀыми ябынхэм тащыщэп.

⁶ Арышъ, адрэ цӀыфхэр зэрэчъыехэрэм фэдэу, тычъые хъущтэп, ау тымычъыеу тысакъын фае, щэӀэныгъи тиӀэн фае.

⁷ Сыда пӀомэ, чэщыр ары цӀыфхэу чъыехэрэр зычъыехэрэр, чэщри ары ешъохэрэр зешъохэрэр.

⁸ Ау тэ мафэм тырибынышъ, щэӀэныгъэ зитэжъугъэгъаӀ. ШӀошъхъуныгъэмрэ шӀулъэгъумрэ ашъоджанэм фэдэу зыщытэжъугъалъ, тымыкӀодэу Тхьэм тыкъызэригъэнэжьыщтыми тыщыгугъэу, тызэрэпаплъэрэр танджым фэдэу къэтэжъугъэӀэт.

⁹ Сыда пӀомэ, Тхьэм игубж къыттыригъэфэнэу арэп ибын тыхъунэу тызфигъэнэфагъэр, ти Зиусхьан Исус Христос къыпкъырыкӀэу тымыкӀодэу тыкъыгъэнэжьыныр ары нахь.

¹⁰ Тэщ пае Исус лӀагъэ, тыпсэуми, тылӀагъэми, ежь тыригъусэу тыпсэуным пае.

¹¹ Арышъ, шъузэрэгъэгушху, зым адрэми нахь лъэкӀ гурэ псэрэкӀэ рерэгъэгъот.

Аужырэ Ӏофхэр

¹² Тшыхэр, къышъуфэлажьэхэу, Зиусхьаным иӀофхэмкӀэ тетыгъо къышъуфызиӀэ цӀыфхэу къыжъугурызгъаӀохэрэм лъытэныгъэ афэшъушӀынэу тышъолъэӀу.

¹³ Ахэмэ Ӏофэу ашӀэрэм пае лъытэныгъэшхо афэшъушӀ, шӀу шъулъэгъух. ШъузэгурыӀу.

¹⁴ Тшыхэр, тышъолъэӀу, лэжьэнхэу зымыдэхэрэм шъуяушъый, зыгу кӀодыгъэхэр жъугъэгушхох, ӀэпыӀэгъу зищыкӀагъэхэми шъуадэӀэпыӀ, щэӀагъэкӀэ цӀыф пстэуми шъуапэгъокӀ.

¹⁵ Хэти зыгорэм ибзэджагъэ бзэджагъэкӀэ пэрэмыгъокӀыжь. Ау шъо шӀу зэрэзэфэшъушӀэщтым шъупылъ, цӀыф пстэуми шӀу зэрафэшъушӀэщтыми ыуж шъуит зэпыт.

¹⁶ Сыдигъуи шъугушӀу.

¹⁷ Зэпымыоу Тхьэм шъуелъэӀу.

¹⁸ Сыд къышъохъулӀэми, Тхьэм щытхъу фэшъушӀ, сыда пӀомэ, шъо, Исус Христос зыгу илъхэм, аущтэу шъузекӀоныр ары Тхьэр зыфаер.

¹⁹ Тхьэм ы Псэ ЛъапӀэ имашӀо шъумыгъэкӀуасэ.

²⁰ Тхьэм ежь игущыӀэхэр цӀыфхэм агухэм къарилъхьэхэу, къызэраригъаӀохэрэр пхъэтэпэмыхь шъумышӀы.

²¹ Ӏоф пстэуми яшъыпкъагъэ жъугъэунэфы, дэгъум шъутет.

²² Сыд фэдэ бзэджагъэми зыщышъудзый!

²³ Гупсэф къытэзытырэ Тхьэм шъугухэр икъукӀэ ерэгъэкъэбзэжь, иягъи къышъомыкӀэу шъугуи, шъупси, шъупкъи къерэухъум, Зиусхьан Исус Христос дунаим къызыкӀожьыкӀэ, зыми шъузэригъэмысэн зи щымыӀэным пае.

²⁴ Тхьэу къышъуаджэрэр шъыпкъэ, ащи а Ӏофыр ыгъэцэкӀэщт.

²⁵ Тшыхэр, Тхьэм шъукъытфелъэӀу.

²⁶ Тшы пстэуми гукъэбзагъэкӀэ ӀаплӀ яшъущэкӀэу шӀуфэс сфяшъухыжь.

²⁷ Мы тхылъым шъушы пстэуми шъукъафеджэнэу Зиусхьаным ыцӀэкӀэ унашъо къышъуфэсэшӀы.

²⁸ Ти Зиусхьан Исус Христос ынэшӀу къышъущерэф. Амин.