2 Коринф 1 - Къэбарышӏур (Инджыл)

АПЭРЭШЪХЬ ШӀуфэсымрэ Тхьэм ищытхъумрэ

¹ Сэ сы Паул. Тхьэм шӀоигъуагъэти, Исус Христос иапостол сыхъунэу къысэджагъ. Тэ тшы Сосфен сигъусэу мы тхылъыр сэтхы.

² Зыфэстхыхэрэр шъоры, Коринф къалэм ичылыс зэӀукӀэ щыщхэр ары. Тхьэм Христос Исус шъугухэм арылъынэу шъуигъэнэфагъ, тыдэкӀи ти Зиусхьан Исус Христос елъэӀурэ цӀыф пстэуми шъурягъусэу, ежь ицӀыф лъапӀэхэм ащыщ шъухъунэу къышъоджагъ. Христос ахэми тэри ти Зиусхьан.

³ Тхьэу тя Тэ лъапӀэрэ Зиусхьан Исус Христосрэ анэшӀу къышъущарэфи, гупсэф къышъуарэт.

⁴ Христос шъугухэм зэрарылъымкӀэ Тхьэм ынэшӀу къызэрэшъущифагъэм пае, Тхьэм ищытхъу сэшӀ зэпыт.

⁵ Сыда пӀомэ, Христос шъугухэм зэрарылъымкӀэ зэкӀэмкӀи Тхьэм ынэшӀу къышъущифагъ. Лъэныкъо пстэумкӀи зэхэшъушӀыкӀынэуи, шъукъэгущыӀэнэуи лъэкӀ къышъуитыгъ,

⁶ сыда пӀомэ, тэ Христос шыхьат тызэрэфэхъугъэм шъугухэм лъапсэ афишӀыгъ.

⁷ Аущтэу зэрэхъугъэм пае, ти Зиусхьан Исус Христос къызылъэгъожьыщт мафэм шъупаплъэзэ, тынхэу Тхьэм ибынхэм аритхэрэм ащыщэу шъуимыӀэ зи щыӀэп.

⁸ Ти Зиусхьан Исус Христос къызылъэгъожьыщт мафэм зыми шъузэригъэмысэн щымыӀэу, кӀэухым нэс гъогу занкӀэм пытэу шъутыригъэтыщт.

⁹ Тхьэр шъыпкъэ. Ежьыр ары ы Къоу Исус Христосэу ти Зиусхьан гъусэ шъуфэхъунэу къышъоджагъэр.

Чылыс зэӀукӀэм щыщхэр зэрэзэгурымыӀуагъэхэр

¹⁰ Сшыхэр, шъо зэкӀэми шъузэгурыӀонэуи, куп-купэу шъузэрэмыгощэу зыгу-зыпсэу шъузэхэтынэуи ти Зиусхьан Исус Христос ыцӀэкӀэ сышъолъэӀу.

¹¹ Сшыхэр, шъузэрэзэгурымыӀорэр Хлой зыцӀэ бзылъфыгъэм иунагъо щыщхэм сагъэшӀагъэ.

¹² Сэ зыфасӀорэр мары: шъуащыщ горэм еӀо: «Сэ Паул икуп сыщыщ», нэмыкӀ горэм еӀо: «Сэ Аполлос икуп сыщыщ», нэмыкӀ горэми еӀо: «Сэ Кифэ икуп сыщыщ», етӀани нэмыкӀ горэми еӀо: «Сэ Христос икуп сыщыщ».

¹³ Христос гощыгъэ хъугъа? Паул ара шъощ пае къащым тыраӀулӀагъэр? Хьауми, Паул ыцӀэкӀэ шъуаумэхъыгъа?

¹⁴ Криспрэ Гайрэ анэмыкӀэу шъуащыщэу зи зэрэсымыумэхъыгъэмкӀэ Тхьэм щытхъу фэсэшӀы.

¹⁵ Арышъ, сэ сцӀэкӀэ шъуаумэхъыгъэу зыми къыӀон ылъэкӀыщтэп.

¹⁶ Шъыпкъэ, Стефан иунагъо щыщхэри сыумэхъыгъэх. Ащ нэмыкӀэу, зыгорэ сыумэхъыгъэу сшӀэрэп.

¹⁷ Сыда пӀомэ, Христос сыкъызфигъэкӀуагъэр цӀыфхэр сыумэхъынхэу арэп, къэбарышӀур язгъэӀунэу ары нахь – ау цӀыфхэм акъылышӀуагъэу зыфаӀорэр зыхэлъ гущыӀэхэмкӀэ арэп. Аущтэу щымытмэ, Христос къащым зэрэтелӀыхьагъэм икъэбар лъэкӀэу хэлъыр кӀодыжьыщтыгъ.

Христос ары Тхьэм иакъылышӀуагъэри илъэкӀышхори

¹⁸ Сыда пӀомэ, кӀодыпӀэм игъогу тетхэмкӀэ къащым икъэбар делагъэ, ау тэ мыкӀодхэу Тхьэм къыгъэнэжьхэрэмкӀэ Тхьэм илъэкӀышхо къащым хэлъ.

¹⁹ Сыда пӀомэ, Тхьэм къызэриӀорэр игущыӀэ тхыгъэхэм арыт: «АкъылышӀу зиӀэхэм яакъылышӀуагъэу зыфаӀорэр згъэкӀодыщт, Ӏушхэм яӀушыныгъэу зыфаӀорэр сымыдэу, лъэныкъокӀэ езгъэзыкӀыщт».

²⁰ АкъылышӀу зиӀэ цӀыфыр тыдэ щыӀэу къэнагъа? Тэурат егъэджэкӀо пащэр тыдэ щыӀэу къэнагъа? Мы лъэхъаным щыщ цӀыфэу гущыӀэхэмкӀэ нэкъокъоным фэӀазэр тыдэ щыӀэу къэнагъа? Мы дунаим иакъылышӀуагъэ Тхьэм делагъэу къыгъэлъэгъуагъэба?

²¹ Сыда пӀомэ, Тхьэм иакъылышӀуагъэкӀэ зэриухэсыгъэм тетэу, мы дунаим ицӀыфхэм яакъылышӀуагъэу зыфаӀорэмкӀэ Тхьэр зыфэдэр ашӀагъэп, ау тэ дгъэӀурэ къэбарышӀоу ахэмэ делагъэу къашӀошӀырэмкӀэ ХристоскӀэ шӀошъхъуныгъэ зиӀэхэр мыкӀодхэу къыгъэнэжьынхэр Тхьэм игъоу ылъытагъ.

²² Джуртхэр нэшэнэ гъэшӀэгъонхэм афаех, алыджхэри акъылышӀуагъэм лъэхъух.

²³ Ау къащым тыраӀулӀэгъэ Христос икъэбар тэ тэгъэӀу: джуртхэмкӀэ ар агу зэмыӀун Ӏоф мэхъу, нэмыкӀрэ лъэпкъхэмкӀи делагъэ мэхъу.

²⁴ Ау тэ, Тхьэм ибынхэм ащыщ хъунхэу къызэджагъэхэмкӀэ, джуртми алыджми, Христос ары Тхьэм илъэкӀышхори иакъылышӀуагъэри.

²⁵ Сыда пӀомэ, Тхьэм имыакъылышӀуагъэу зыфаӀорэм нахьи цӀыфхэм яакъылышӀуагъэу зыфаӀорэр нахь акъылышӀуагъ, Тхьэм икӀочӀэнчъагъэу зыфаӀорэри цӀыфхэм ялъэкӀ нахьи нахь лъэш.

²⁶ Сшыхэу Тхьэм ибынхэм ащыщ хъунхэу къызэджагъэхэр, шъузэплъыжь. Мы дунаим ицӀыфхэм акъылышӀу зиӀэхэу алъытэхэрэри, тетыгъо зиӀэхэри, унэгъо байхэм ащыщхэри бэ хъухэу къышъухэтхэп.

²⁷ Ау акъылышӀу зиӀэ цӀыфхэр ыгъэукӀытэжьынхэм пае, мы дунаим ицӀыфхэм акъылынчъэхэу зыфаӀорэ цӀыфхэр Тхьэм къыхихыгъэх. ЛъэкӀ зиӀэхэри ыгъэукӀытэжьынхэм пае, мы дунаим лъэкӀ щызимыӀэхэри Тхьэм къыхихыгъэх.

²⁸ Мы дунаим ицӀыфхэм тхьамыкӀэхэу зыфаӀорэ цӀыфхэри, зэрамыпэсырэ цӀыфхэри Тхьэм къыхихыгъэх. Аущтэу пкӀэ зимыӀэхэу зыфаӀорэ цӀыфхэр ары Тхьэм къыхихыгъэхэр, пкӀэ зиӀэхэу зыфаӀорэ цӀыфхэр ыгъэцӀыкӀунхэм пае.

²⁹ Тхьэм аущтэу зыкӀишӀагъэр ежь ыпашъхьэ зы нэбгыри зыщыщымытхъужьыным паешъ ары.

³⁰ Христос Исус шъугухэм арылъэу зыгъэхъугъэр Тхьэр ары. Христос Исус Тхьэм къытфыригъэхыгъэ акъылышӀуагъ. Ежь Исус ары Тхьэм дэжькӀэ шъыпкъагъэ тиӀэу езгъэлъытэрэри, тыгухэр зыгъэкъэбзэжьыгъэри, тшъхьэхэр зыщэфыжьыгъэри.

³¹ Арышъ, Тхьэм игущыӀэ тхыгъэхэм зэрарытым фэдэу, «Зыгорэ зыгорэм щэтхъумэ, Зиусхьаным щэрэтхъу».