Данил 5 - ФӀыцӀагъэ ЛъапӀэ

Блыным тратха псалъэхэр

¹ Пащтыхь Бэлъщэцар, и блыгущӀэтхэм ящыщ миным ефэешхэшхуэ яхузэхишауэ, абыхэм я гъусэу санэ ефэрт зэгуэрым.

² Фадэр къыпкърыхьауэ, Бэлъщэцар унафэ ищӀащ дыжьынымрэ дыщэмрэ къыхэщӀыкӀа фалъэхэр, и адэжь Нэбыхъунэщыр Тхьэм и Унэу Ерусалим дэтым къришауэ щытахэр, къахьыну: езыри, и блыгущӀэтхэри, и фызхэри, и жэщгъуэлъ цӀыхубзхэри абыхэмкӀэ ефэн папщӀэ.

³ Арати, Тхьэм и Унэу Ерусалим дэтым кърашауэ щыта фалъэхэр къахьри, абыхэмкӀэ ефэн щӀадзащ пащтыхьми, абы и блыгущӀэтхэми, и фызхэми, и жэщгъуэлъ цӀыхубзхэми.

⁴ Санэ здефэм псоми я тхьэхэр ягъэлъапӀэрт – дыщэм, дыжьыным, гъуаплъэм, гъущӀым, пхъэм, мывэм къыхэщӀыкӀахэр.

⁵ Асыхьэтым цӀыхуӀэм и Ӏэпэхэр къэхутэри пащтыхь сэрейм и блынджабэ джафэхум, уэздыгъэм и нэхур здытридзэм деж тетхыхьын щӀидзащ. Пащтыхьым цӀыхуӀэ тхэр къилъагъури

⁶ и фэр пыкӀащ. Апхуэдизу шынагъэм зэщӀищтати, и лъэгуажьэхэр зэкӀэщӀэзызэри и лъакъуэхэр щӀэщӀащ.

⁷ Пащтыхьыр ину кӀиящ, нэщыпхъуэхэри, мэгъухэри, удхэри къыхуашэну унафэ ищӀу. Ахэр – Бабылейм и усэрэжхэр – къызэрысу захуигъэзащ: «Мо тхыгъэм къысхуеджэу абы къикӀыр къызгурызыгъаӀуэр чэтэныплъ лъапӀэкӀэ езгъэхуэпэнурэ, дыщэ лэрыпси и пщэм ирезгъэлъхьэнущ, си пащтыхьыгъуэм и Ӏэтащхьэ ещанэуи згъэувынущ», – жиӀэри.

⁸ Бэлъщэцар и усэрэжу хъуар къызэхуэса щхьэкӀэ, ахэр тхыгъэм къеджэфакъым, абы къикӀри пащтыхьым жраӀэфакъым.

⁹ Абдежым Бэлъщэцар пащтыхьыр нэхъ Ӏеижу къэшынащ, и фэри шэхум хуэдэу пыкӀащ, и блыгущӀэтхэми ящӀэнур ямыщӀэжу къызэхэнащ.

¹⁰ Абыхэм я зэрызехьэ макъыр пащтыхь гуащэм зэхихри, ефэешхэр щекӀуэкӀ пэшым щӀыхьащ. «Зи щӀыхьыр ин ди пащтыхь! УщӀэгузэвэни уи фэр щӀыпыкӀыни щыӀэкъым! – жиӀащ абы.

¹¹ – Уи пащтыхьыгъуэм исщ цӀыху, тхьэ лъапӀэхэм я псэр зыхэт. Уи адэжьым и тетыгъуэм наӀуэ къэхъуауэ щытащ абы акъыл нэхуи зэхэщӀыкӀыныгъэшхуи зэриӀэр, тхьэхэм я Ӏущыгъэм хуэдэ Ӏущыгъи зэрыхэлъыр. Уи адэжь Нэбыхъунэщыр ар Ӏэзэгъуазэхэми, нэщыпхъуэхэми, мэгъухэми, удхэми тхьэмадэ яхуищӀауэ щытащ.

¹² А Данил жыхуаӀэу, уи адэжьым Бэлътэщэр зыфӀищыгъар, и акъылыфӀагъымкӀэ, и щӀэныгъэмкӀэ, и зэхэщӀыкӀыныгъэшхуэмкӀэ, пщӀыхьэпӀэхэр зэрызэхихуфымкӀэ, щэхухэр сэтей къызэрищӀыфымкӀэ, Ӏуэху зэхэзэрыхьахэр зэрызэхихыжыфымкӀэ хуэбгъэдэн щымыӀэу цӀэрыӀуэ хъуат. Аращи, Данил къегъаши, абы псори гурыӀуэгъуэ пхуищӀынщ».

¹³ Данил къашэри, пащтыхьым абы жриӀащ: «Уэра Данил хъужыр, си адэжь пащтыхьым Ехьудейм къриша гъэрхэм ящыщыр?

¹⁴ Сэ зэхэсхаи уэ тхьэхэм я псэр пхэту икӀи акъыл нэхуи зэхэщӀыкӀыныгъэшхуи уиӀэу, Ӏущыгъэшхуи ббгъэдэлъу.

¹⁵ АтӀэ, сэ мо тхыгъэм къезгъаджэу къикӀри къезгъэӀуэтэну усэрэжхэри мэгъухэри къезгъэшати, абыхэм ар яхузэфӀэкӀакъым.

¹⁶ Ауэ, уэ птеухуауэ сэ зэхэсхащ пщӀыхьэпӀэхэм къарыкӀыр къэпщӀэфу икӀи зэхэзэрыхьа Ӏуэхухэр зэхэпхыжыфу. Иджы, мо тхыгъэм укъысхуеджэрэ ар къызгурыбгъаӀуэмэ, чэтэныплъ лъапӀэкӀэ уезгъэхуэпэнурэ, дыщэ лэрыпси уи пщэм ирезгъэлъхьэнущ, си пащтыхьыгъуэм и Ӏэтащхьэ ещани усщӀынущ».

¹⁷ Данил пащтыхьым жэуап иритыжащ: «Тыгъэхэр къызыхуэгъэнэж, саугъэтхэмкӀи нэгъуэщӀ зыгуэрым хуэупсэ. Арыншауи сэ уэ тхыгъэм сыкъыпхуеджэнщи, къикӀри бжесӀэнщ.

¹⁸ Ди пащтыхь лъапӀэ, Тхьэуэ я нэхъ Лъагэм уи адэжь Нэбыхъунэщыр тепщэныгъи, лъэкӀыныгъи, щӀыхьышхуи, пщӀэшхуи къылъигъэсат.

¹⁹ Тхьэм абы апхуэдиз лъэщыгъэшхуэ къритати, сыт хуэдэ лъэпкъым щыщри, сыт хуэдэбзэкӀэ псалъэри, цӀыхуцӀэ зиӀэ псори абы и пащхьэ щыкӀэзызу къыщышынэрт. Абы зыхуейр иукӀырт, зыхуейм гущӀэгъу хуищӀырт; зэрыхуейуэ хэти иӀэтырт, хэти тридзырт.

²⁰ Нэбыхъунэщыр пагагъэр къытекӀуэри зыкъыфӀэщӀыжащ, абы къыхэкӀыуи и тахътэм кърагъэщэтэхри и щӀыхьри фӀагъэкӀуэдащ.

²¹ Ар, цӀыхухэм къыхахури, хьэкӀэкхъуэкӀэхэм хуэдэу акъылыншэ хъуауэ, шыд Ӏэлхэм я гъусэу, Ӏэщым хуэдэу удзыр и шхыныгъуэу, уафэм къех уэсэпсыр и пкъым къытехэу псэуащ, Тхьэуэ я нэхъ Лъагэм цӀыхухэм я пащтыхьыгъуэр зыхуейм ириту зэрыӀэщӀэлъыр зэхищӀыкӀыху.

²² Ауэ уэ, абы и къуэ Бэлъщэцар, а псом ущыгъуазэ пэтрэ, Ӏэсэ зыпщӀакъым.

²³ Уэ зыбгъэлъагэри уафэм и Тепщэм упэщӀэуващ: Абы и Унэм къыщӀаха фалъэхэр къебгъэхьри, уэри, уи блыгущӀэтхэри, уи фызхэри, уи жэщгъуэлъ цӀыхубзхэри абыхэмкӀэ фефащ! Уэ дыщэм, дыжьыным, гъуаплъэм, гъущӀым, пхъэм, мывэм къыхэщӀыкӀа тхьэхэр, зыри зымылъагъурэ зыхэзымыхӀахэр, акъыли зимыӀэхэр бгъэлъэпӀащ, атӀэ уи гъащӀэри уи гъуэгу псори Зи ӀэмыщӀэ илъ Тхьэм лъытэныгъэ хуэпщӀакъым.

²⁴ Аращ мо тхыгъэр зытха цӀыхуӀэр Абы щӀыуигъэлъэгъуар.

²⁵ Мыбдежым тетым къызэреджэр мыпхуэдэущ: МЕНЕ, МЕНЕ, ТЕКЕЛ, УПАРСИН.

²⁶ А псалъэхэм къикӀыр мыращ: МЕНЕ – уи тетыгъуэм и махуэхэр Тхьэм ибжри кӀэ иритащ.

²⁷ ТЕКЕЛ – уэ тэрэзэкӀэ уашэчати, упсынщӀэ Ӏейуэ укъыщӀэкӀащ.

²⁸ ПАРСИН – уи пащтыхьыгъуэр ягуэшри мыдхэмрэ къэжэрхэмрэ иратащ».

²⁹ Абдежым Бэлъщэцар и унафэкӀэ Данил чэтэныплъ щыгъынкӀэ къахуапэри, и пщэм дыщэ лэрыпси къралъхьащ, пащтыхьыгъуэм и Ӏэтащхьэ ещанэуи ягъэӀуащ.

³⁰ А жэщ дыдэм Бэлъщэцар, бабылейхэм я пащтыхьыр, яукӀри,

³¹ абы и пӀэм иуващ мыд лъэпкъым щыщ Дарий. Ар абы щыгъуэ илъэс хыщӀрэ тӀурэ хъурт.