Kocea 7 - Acoli Baibul

Bal pa jo Icrael ki jemogi

¹ I kare ma amito dwoko gum bot jona, ki i kare ducu ma amito caŋo iye Icrael, ci bal pa Epraim otugi nen woko cut, ki tim maraco ma jo Camaria gutimo; pien gitimo bwami, lakwo turo ot, kun luyak giyako dano ki i gudo.

² Ento pe giparo ni an apo i kom gin maraco ducu ma gitiyoni. Koni timgi doŋ orumogi woko i dyere, doŋ timgi tye i nyima.

³ Giyomo cwiny kabaka ki timgi mareco-ni kun giyomo cwiny rwodigi ki bwolagi.

⁴ Gin ducu lutim abor; girom ki keno malyet, ma lated mugati pe dok cwako iye mac, nia i kare ma en orubo iye tobi ki moko nio ka oyenyo, ocako kwot.

⁵ I nino pa kabaka mewa, rwodi ducu gucako two pi lyeto koŋo vino; kabaka ocako ryeyo ciŋe malo kacel ki luŋala.

⁶ Pien cwinygi obedo malyet calo keno; pi lok ma gubedo ka piro; kinigagi okur calo mac dyewor benebene, odiko obedo ma lyel calo mac arum.

⁷ Gin ducu gidoko lyet macalo keno, guneko lulocgi woko ducu, Lukergi ducu guto woko, pe tye ŋat mo i kingi ma okok bota.

⁸ Epraim orubbe woko i kin lurok; Epraim en mugati capat ma pe giloko.

⁹ Rok mukene gutyeko tekke woko, ento en pe oneyo; lwar okwaŋ i wiye, ento en pe ŋeyo,

¹⁰ Wakke pa Icrael odoko caden i kome; ento pe gudwogo bot Rwot Lubaŋagi, kadi bed gineno can, pe giyenyo Lubaŋa.

¹¹ Epraim min rom ki amam ma wiye bene pe tiyo; gikok mere bot Ejipt, dok cito mere wa i Aciria.

¹² Abiciko obwona i yo ma gicito iye ducu, aretogi piny macalo winyo ma tuk malo, abipwodogi pi timgi maraco-ni.

¹³ Gibineno can, pien guŋak guweka woko! Gityekgi woko, pien gujemo koma! Onoŋo amito larogi, ento giloko lok goba i koma.

¹⁴ Pe gikok bota ki cwinygi ducu, ento gibedo ka cur ki i wi kitandagi; giŋolo komgi kekengi ki pala pi kal ki koŋo vino, kun gijemo kwede i koma.

¹⁵ Kadi bed yam apwonyogi kun amiyo badgi bedo matek, ento gin gidok ka yubo lok marac i koma.

¹⁶ Gilokke gidok bot jok Baal; girom ki atum ma bayo piny. Rwodigi bi to ki pala lucwan, pi ŋala ma i doggi. Man bimiyo gicayogi wa i lobo Ejipt.