Kocea 6 - Acoli Baibul

¹ “Wubin wek wadoku bot Rwot; pien en okilo komwa woko; wek en aye ocaŋwa; en otyeko pwodowa matek, dok bitweyo waŋ retwa.

² Ka nino okato aryo, en bicerowa woko, i nino me adekke bimiyowa kwo, wek dok wabed ma komwa yot i nyime.

³ Weku doŋ waŋeyu Rwot, wacuku cwinywa ka ŋeyo en; en bidwogo ada macalo rupiny; en bibino botwa macalo kot oma moyo, calo kot me cwir ma bido lobo.”

⁴ Abitimi niŋniŋ, in Epraim? Abitimi niŋniŋ in Juda? Mar mewu rom ki pol ma umo piny odiko, rom ki toyo ma two woko oyot.

⁵ En mumiyo amiyo lunebi otoŋogi woko, anekogi ki lok mua i doga; kop ma aŋolo i komgi ryeny calo ceŋ,

⁶ An cwinya mito mar ma pe lokke, pe lee me gitum, ŋeyo Lubaŋa ber, kato gitum awaŋa.

⁷ Ento gin gukalo wi gicikke macalo i Adam, gutiyo gin ma pe atir i koma ki kunnu,

⁸ Gilead aye gaŋ pa lutim aranyi, ma remo doŋ i obot tyengi.

⁹ Macalo luyak gikiyo dano, ajwagi bene gicokke kacel kumeno; gineko dano i yo ma cito i Cekem, kun gitimo gin marac twatwal.

¹⁰ Aneno gin mo marac makato i ot pa Lubaŋa pa Icrael, Tim kwele pa Epraim tye kunnu, Icrael bene oballe woko.

¹¹ In bene Juda, kare me kac doŋ ginyuto woko.