Buk me Aryo pa Moses ma Gilwoŋo Nia 38 - Acoli Baibul

Tiyo keno tyer me gitum awaŋa

¹ Dok otiyo keno tyer me gitum awaŋa ki bao yat lalwii; borre obedo futi abiro ki nucu, lacce bene futi abiro ki nucu, obedo ki twoke aŋwen ma rom, borre tuŋ malo oromo futi aŋwen ki nucu,

² Otimo ten keno aŋwen ducu; ten keno aŋwen ducu gubedo ma gukubbe kacel kwede, dok omwono kome woko ki mola.

³ Otiyo jami tic me keno tyer ducu, otako, ki akwaya latokke, ki becen, ki lacob riŋo, ki weer Iawau mac; otiyo jami tic meno ducu ki mola.

⁴ Dok oyu bo keikei pi keno tyer, me obwo mola ma oketo i te riine, ki i kore.

⁵ Oliyo agit aŋwen pi twoke aŋwen me keikeimola, me rwako iye tal me tinone,

⁶ Otiyo tal ki bao yat lalwii, ci omwono komgi woko ki mola.

⁷ Orwako tal odonyo i agit ma tye i but keno tyer-ri me latiŋŋe; otiyo ma iye twolo, ki bao.

Tiyo otako lwok

⁸ En dok otiyo otako mola ki tedi tere bene me mola; otiyo ki madara pa mon ma lutic ma gitiyo i doggola kema me rwatte,

Dyekal me kema

⁹ Otimo dyekal me kema; i tuŋ acuc me dyekal giŋabo iye boŋo cuka camanini ma giwiyo maberre ma borre tuŋ cel romo yadi pyerabic,

¹⁰ Wirre onoŋo giromo pyeraryo, ki tedi tergi me mola gubedo pyeraryo, ento gol me wir ki otacgi ducu gubedo me ryal.

¹¹ Ki tuŋ acam bene borre oromo yadi pyerabic, ki wirre pyeraryo ki tedi tergi pyeraryo me mola; ento gol me wir ki otacgi ducu gubedo me ryal.

¹² Ki bute ma tuŋ potoceŋ bene giŋabo iye boŋo cuka ma borre romo yadi pyeraryo wiye abic; wirre gubedo apar, ki tedi tergi bene apar; gol me wir ki otacgi ducu gubedo me ryal.

¹³ Nyime tuŋ wokceŋ onoŋo romo yadi pyeraryo wiye abic.

¹⁴ Boŋo ma giŋabo i ŋet doggola tuŋ cel onoŋo romo yadi abiro ki nucu; wirre gubedo adek, ki tedi tergi adek.

¹⁵ I ŋete tuŋ mukene bene kit meno; i ŋet doggaŋ tunŋi ki tuŋŋi giŋabo iye boŋo cuka ma romo yadi abiro ki nucu; wir gubedo adek ki tedi tergi adek.

¹⁶ Boŋo cuka ducu ma giŋabo i doggaŋ me dyekal onoŋo gubedo boŋo camanini ma giwiyo maberre.

¹⁷ Tedi te wir ducu onoŋo gibedo me mola, ento gol me wir ki otacgi gu bedo me ryal; gimwono wigi bene ki ryal, ki wir ducu ma i dyekal giketo iye otac ryal.

¹⁸ Boŋo cuka laum doggaŋ me dyekal gidero kome maber ki uci ma bulu, ki ma lamar lamar ki makwar, ki boŋo camanini ma giwiyo maberre, kun borre romo yadi apar, ki borre tuŋ malo romo futi abiro ki nucu, ma rom ki boŋo cuka me aŋaba me dyekal.

¹⁹ Wirre gubedo aŋwen, ki tedi tergi aŋwen me mola; golgi gubedo me ryal, ki wigi gumwono woko ki ryal, ki otacgi bene gubedo me ryal.

²⁰ Teke lagur kema ducu ki teke ma orumo dyekal ducu gubedo me mola.

Kwa nyonyo mapatpat ma gitiyo kwede pi kabedo maleŋ

²¹ Man aye weI jami ma gitiyo ki kema, en aye kema lok me caden, macalo gikwanogi i kare ma Moses ociko, ma yam obedo pi tic pa jo Levi, kun ladit wi ticgi en aye Itamar wod pa Aron ma ajwaka-ni,

²² Bejalel wod pa Uri ma wod pa Kur, ma i kaka pa Juda, otiyo jami ducu ma Rwot ociko ki Moses.

²³ Onoŋo tiyo kacel ki Okoliab wod pa Akicamak, ma i kaka pa Dan, dano ma ladiro, ma larot cal tic manyen, ki lader jami ki uci ma bulu, ki lamar lamar, ki makwar, ki boŋo camanini ma giwiyo maberre.

²⁴ Jabu ducu ma gitiyo kwede pi tic i kabedo maleŋ, ki jabu ducu ma oa i gityer, pekke onoŋo romo talanta pyeraryo wiye aboŋwen, ki cekel miya abiro ki pyeradek, kun giporo ki cekel me kabedo maleŋ,

²⁵ Ki ryal ma oa ki bot lwak ma gikwano onoŋo pekke romo talanta miya acel ki cekel alip acel, ki miya abiro ki pyerabiro wiye abic, kun giporo ki cekel me kabedo maleŋ,

²⁶ Onoŋo dano acel acel okelo beka acel, (en aye nucu cekel me kabedo maleŋ), pi dano acel acel ma yam gikwano welgi, cakke i kom jo ma ditogi romo mwaka pyeraryo ki dok kwede malo, jo alip miya abicel ki adek, ki miya abic ki pyerabic.

²⁷ Talanta miya acel me ryal onoŋo obedo me aliya pi tedi te wir me kabedo maleŋ, ki pi tedi te wir me boŋo kicika; tedi tere ma romo miya acel gua ki i kom talanta miya acel, en aye talanta acel pi tedi te wir acel acel.

²⁸ Ki cekel alip acel ki miya abiro ki pyerabiro wiye abic, otimo ki gol me wir ducu, omwono wigi ducu, dok otiyo ki otacgi.

²⁹ Mola ma gimiyo onoŋo talanta pyerabiro, ki cekel alip aryo ki miya aŋwen.

³⁰ Otiyo ki tedi te wir me doggola kema me rwatte, ki ke no tyer me mola, ki keikei me mola, ki jami tic ducu me keno tyer,

³¹ ki tedi te wir ma orumo dyekal, ki tedi te wir me doggaŋ me dyekal, ki teke me guro kema, ki teke ma orumo dyekal.