Buk me Aryo pa Moses ma Gilwoŋo Nia 11 - Acoli Baibul

Gitito pi to pa litino kayo

¹ Rwot owaco bot Moses ni, “Pud odoŋ gemo acel ma abikelo i kom Parao ki i kom Ejipt; lacen biweko wun wua ki kany wucito; ka biwekowu ni wuciti, biryemowu woko magicel.

² Lok kombeddi i it lwak, laco acel acel oleg laco wadi ma ka ŋete, ki dako acel acel bene oleg dako wadi ma ka ŋete, wek omiye atego ryal ki atego jabu.”

³ Ci Rwot omiyo dano gunoŋo gum i nyim jo Ejipt. Dok bene Moses yam obedo dano madit twatwal i lobo Ejipt, wa i nyim lutic pa Parao ki i nyim lwak ducu.

⁴ Moses owaco ni, “Rwot owaco kuman ni, I cwiny dyewor abiwot i dye Ejipt;

⁵ ci litino kayo ducu ma i lobo Ejipt gibito woko, nia i kom latin kayo pa Parao ma bedo i wi komkerre-ni, nio kwede i kom latin kayo pa aŋeca ma tye ka rego; wa litino kayo pa limgi makwo ducu.

⁶ Koko bibedo malik mada ma oromo i lobo Ejipt ducu, kit ma yam peya otimme, dok pe bitimme matwal.

⁷ Ento i kom jo Icrael ducu, dano onyo lee, kadi gwok pe bigweyo; wek wune ni Rwot opoko kin jo Ejipt ki jo Icrael.

⁸ Luticci ducu gibibino bota, gibiryebbe piny i nyima, kun giwaco ni, ‘A woko, ki lwak ma gilubi ducu.’ Ci i ŋe meno, abicito woko gira.” Ci okato woko ki bot Parao ki kiniga madwoŋ.

⁹ Ka dok Rwot owaco bot Moses ni, “Parao pe biwinyi; wek taŋona omedde orom i lobo Ejipt.”

¹⁰ Moses ki Aron gutiyo taŋo meno ducu i nyim Parao; ento Rwot ojino cwiny Parao odoko nwaŋ, pe oweko jo Icrael gucito woko ki i lobone,