Acakki 7 - Acoli Baibul

Pii aluka ocorre i wi lobo

¹ Rwot owaco bot Nua ni, “Dony i yeya, in kacel ki jo ma i odi ducu, pien atyeko neno ni in aye kiti atir i nyima ki i kin yalwak me kare man.

² Ter lee ma gicamo abiro abiro, twonne ki minne, ki lee ma gikwero aryo aryo, twonne ki minne;

³ ki winyo me polo bene abiro abiro, ma co ki ma mon, wek kit kwagi obed makwo wi lobo ducu.

⁴ Pien odoŋ nino abiro, ka doŋ abimiyo kot cwer i lobo nino pyeraŋwen dyeceŋ ki dyewor benebene, ci gin ducu makwo ma yam aketo-ni, abijwerogi woko ki i wi lobo.”

⁵ Nua ocobo kit ma Rwot ocike kwede ducu.

⁶ Nua onoŋo doŋ tye ki mwaka me ditte miya abicel i kare ma pii aluka ocorre i wi lobo.

⁷ Ci Nua ki dakone ki awo bene ki mongi gudonyo i yeya pi riŋo pii aluka.

⁸ Lee ducu ma gicamo ki ma gikwero, ki winyo-gu, ki gin ma lak alaka i ŋom,

⁹ gudonyo i yeya bot Nua aryo aryo, laco ki dako.

¹⁰ I ŋe nino abiro pii aluka opoŋ, obyennye i wi lobo.

¹¹ I mwaka me miya abicel me dit pa Nua, i dwe me aryo, i nino dwe me apar wiye abirone, i nino meno aye waŋ it ducu me kut matut gumwoc woko ki pii, ki polo bene oyabbe.

¹² Ci kot ocorre i wi lobo nino pyeraŋwen dyeceŋ ki dyewor benebene.

¹³ I kom nino meno kikome, Nua ki awobene Cem, Kam ki Yafeci, ki dakone en Nua, ki mon wote adek kacel kwedgi, gudonyo i yeya,

¹⁴ gin ki lee tim ducu macalo kit kwagi tye, ki lee ma paco ducu macalo kit kwagi tye, ki gin ducu ma lak alaka wi lobo macalo kit kwagi tye, ki winyo ducu macalo kit kwagi tye, winyo ducu ki kitgi ducu mapatpat.

¹⁵ Gin ducu ma gitye ki kwo gudonyo i yeya bot Nua ki aryo aryo.

¹⁶ Gin ma gudonyo iye me kit kom ducu mapatpat, ma co ki ma mon, gudonyo iye kit ma con Lubaŋa ociko ki Nua; ci Rwot oloro wigi woko,

¹⁷ Pii aluka ori wi lobo pi nino pyeraŋwen kulu; pii opoŋ, omedde ameda nio ka otiŋo yeya, otero yeya malo twatwal nia ki wi lobo.

¹⁸ Pii opoŋ, omedde, ocegge woko wi lobo; yeya obedo ka kwaŋ i wi pii malo,

¹⁹ Pii ocegge woko wi lobo ki tekke, nio ka oumo wi godi maboco ma tye i te polo ducu.

²⁰ Pii omedde, omwonyo wi godi woko futi pyeraryo kulu,

²¹ Gin makwo ducu ma yam giwoto i wi lobo guto woko; winyo, lee ma paco, ki lee tim, gin ducu ma nya, ma gicorre limuk i wi lobo, kacel ki dano, ducu guto woko.

²² Gin ducu ma yam gitye ki yweyo me kwo i umgi, ma i wi tura, guto woko.

²³ Lubaŋa ojwero gin ducu makwo ma yam gitye wi lobo, dano ki lee ki gin ma lak alaka, ki winyo me polo; ojwerogi woko nia ki i lobo. Nua keken aye odoŋ, ki jo ma yam gitye kwede i yeya-ni.

²⁴ Ci pii ocegge wi lobo nino miya acel ki pyerabic kulu.