Acakki 40 - Acoli Baibul

Yucepu ogonyo te lek pa lumabuc

¹ Ka kare okato, latyer koŋo vino pa kabaka me Ejipt ki lated mugatine gubalo i nyime.

² Kiniga’ omako Parao i kom ludito ticce aryo-nu, ladit latyer koŋo vino ki ladit me tedo mugati,

³ ci oketogi i ot pa ladit ma loyo askari lukur-piny po gwokogi, i ot mabuc ma Yucepu bene gitweye iye-ni.

⁴ Ladit ma loyo askari lukur-piny oketogi i ciŋ Yucepu, en okurogi; ka gitweyogi i ot kol kare mo.

⁵ Ci guleko lek i nino acel, latyer koŋo vino ki lated mugati pa kabaka me Ejipt, ma gitweyogi i ot mabuc; ŋat acel acel oleko gire lekke, kun lek acel acel tye ki tyen lokke.

⁶ Ka Yucepu obino botgi odiko, ci onenogi kun gitye ki cwercwiny.

⁷ Ci openyo ludito tic aryo pa Parao ma gitye kwede i ot kol i ot pa laditte, ni, “Tin waŋwu oballe woko piŋo?”

⁸ Gugamo ni, “Tin waleko lek, ci pe tye dano mo ma gonyowa te lekke.” Yucepu owacogi ni, “Pe Lubaŋa gire aye lagony tere? Koŋ wutitta lekke mono.”

⁹ Ci latyer koŋo vino ocako tito lekke bot Yucepu, kun wacce ni, “I waŋ lekka onoŋo olok tye i nyima,

¹⁰ olok onoŋo tye ki jaŋe adek; ka pud oluro me keto: ture, ci onyak, olugo ocek woko.

¹¹ Ka amako kikopo pa Parao i ciŋa, ci aŋolo nyige, abiyo i kikopo, ka amiyo kikopo i ciŋ Parao.”

¹² Yucepu ogamo, owacce ni, “Man aye te lekke: jaŋe adek-ki, meno nino adek;

¹³ i nino me adekke Parao bitiŋi ci dwoki i dog ticci, ci dok’ ibimiyo kikopo pa Parao i ciŋe kit macon ca, kit macalo con i kare ma in latyer koŋo vinone,

¹⁴ Ento ber ipo pira ka doŋ idok i dog ticci; alegi ni in bene itima ber do, itit pira bot Parao, wek gigonya woko ki i ot man,

¹⁵ Pien yam gikwala akwala ki i lobo pa jo Ibru; man bene dok giketa kany i ot kol noŋo ma pe abalo gin mo.”

¹⁶ Ka ladit me tedo mugati oneno ni gigonyo te lek maber, en owaco ki Yucepu ni, “An bene onoŋo aleko lekka: onoŋo adodo aduku adek i wiya.

¹⁷ I aduku mamalone ca onoŋo tye iye lwak kit gin ma gitedo ducu pi Parao, ento winyo obedo ka camogi woko ki i aduku ma tye i wiya-ni.”

¹⁸ Yucepu ogamo ni, “Man aye te lekke: aduku adek en aye nino adek;

¹⁹ i nino me adekke Parao bitiŋi malo, ci biŋabi i kom yat, ka winyo gibicamo riŋo komi woko.”

²⁰ Ka nino adek oromo, en aye nino ma ginywalo iye Parao, ci otedo karama ki luticce ducu, ci Parao okelo ladit latyer kono yino kacel ki ladit lated mugati i nyim luticce.

²¹ Odwoko ladit latyer koŋo vino i dog ticce me tyero koŋo vino, ci otiŋo kikopo pa Parao omiyo i ciŋe;

²² ento oŋabo: ladit lated mugati malo i kom yat kit ma nene Yucepu ogonyo kwede te lekgi.

²³ Ento ladit latyer koŋo vino pe omedo ki po pi Yucepu, wiye owil woko i kome matwa!’