Acakki 38 - Acoli Baibul

Juda ki Tamar

¹ I kare meno Juda oa woko ki bot omegine, ocito odak bot laco mo ma i Adulam, ma nyiŋe Kira,

² Juda oneno nya pa Lakanaan mo ma nyiŋe Cua; ci onyomo, ka obedo kwede.

³ Ci ogamo ic, onywalo latin laco, wonne ocako nyiŋe Er.

⁴ Dako dok ogamo, onywalo latin laco, ocako nyiŋe Onan.

⁵ Dok ogamo ic aye, onywalo latin laco, ocako nyiŋe Cela, Latin meno en onywalo i Kejib.

⁶ Juda onyomo nyako ma nyiŋe Tamar ki wode Er ma latin kayone.

⁷ Ento Er latin kayo pa Juda yam onoŋo dano marac i nyim Rwot, ci Rwot oneke woko.

⁸ Ci Juda owaco bot Onan ni, “Dony i wi ci-omeru, ci ibed kwede macalo won ot, wek inywal kwede wi omeru.”

⁹ Ento Onan oŋeyo ni litino pe bibedo mere; pi meno ka odonyo i wi ci-ominne, ci onyeto kodine piny, wek pe enywal kwede wi ominne.

¹⁰ Gin ma otimo pe oyomo cwiny Rwot, ci oneke woko bene,

¹¹ Juda dok owaco bot ci-wode Tamar ni, “Koŋ doŋ ibed macalo daa-to i ot pa woru, nio waŋ ma woda Cela bidoŋo”, pien onoŋo lworo ni gwok bito woko, macalo omegine. Kit meno Tamar odok obedo i ot pa wonne.

¹² Ka kare okato, ci dako pa Juda ma nya pa Cua-ni oto woko. Ka cwiny Juda doŋ opye, ci ocito i Timna bor luŋol yer romine, onywako yo ki lareme Kira ma La-adulam.

¹³ Ka gitito bot Tamar ni, “Kwaru okato obecito i Timna ka ŋolo yer rom ine”,

¹⁴ ci olunyo boŋo cola me dalako woko, ka oumme ki kitambara, odwalo ki kome woko ducu, ka ocito obedo kwede i dogcel me Enaim, ma okemo yo me Timna; pien onoŋo oneno ni kadi bed Cela doŋ oteggi, ento peya gimiye ni olake.

¹⁵ Ka Juda onene, ci otamo ni gwok dako lakwele mo, pien onoŋo en oumo waŋe woko ducu,

¹⁶ Ka ocito bote ka ma obedo iye i ŋet yo, owacce ni, “Bin wek abed kwedi,” kun pe ŋeyo ni ci-wode. En ogamo ni, “Ibimiya gin aŋo kono, ka wek ibin ibed kweda?”

¹⁷ En odok iye ni, “Abikwanyo latin dyel ki i kin dyegina, acwalli.” Dako-nu ogamo ni, “Ibijeno gin aŋo bota, ka doŋ ibicwalla?”

¹⁸ Ogamo ni, “In imito ajeŋŋi gin aŋo?” En odok iye ni, “Agit meri, ki tolli, ki odooni ma tye i ciŋi-ni.” Ci otiŋo omiyogi ducu bote, ka odonyo obedo kwede, ci dako-nu oyac kwede.

¹⁹ Dako oa okato ocito gire woko, olunyo boŋo kitambara ma oumme kwede-ni, ka doŋ oruko boŋo cola me dalako.

²⁰ Ka Juda ocwalo La-adulam ma lareme pi terre latin dyel, wek odwokke jami ma yam ojeŋo bot dako-nu, pe omedo ki noŋo kome.

²¹ Obedo ka penyo jo ma i kabedo-nu ni, “Dako mo ma lakwele-ni tye kwene, ma onoŋo yam bedo i ŋet yo Enaim?” Guwacce ni, “Lakwele mo pe obedo kany.”

²² Ka odok cen bot Juda, ci owacce ni, “Pe amedo ki noŋo dako-nu; ki jo ma i kabedo meno bene guwacci, ‘Lakwele mo pe yam obedo kunnu.’ ”

²³ Juda ogamo ni, “Wek doŋ oter jami-nu obed mere, giwek nyerowa; nen, acwalo latin dyel man, ci noŋo kome aye oloyi.”

²⁴ Ka dwe adek okato, ci gitito ki Juda ni, “Ci-wodi Tamar obedo ka timme kwele kwele, ci doŋ oyac woko ki tim kwelene-ni.” Juda owacci, “Wukele woko, wek giwaŋe woko.”

²⁵ Ka gitye ka kele woko, ci en ocwalo lok bot kwarone, ni “Won jami man en aye ayac kwede.” Dok onwoyo aye ni, “Alegi ŋi inigi, Agit, ki tol ki odoo-nu jami pa aŋa kaa?”

²⁶ Juda oŋiyogi, ci otuco kun waco ni, “Dako man kite atir makata woko, pien pe amedo ki miyo en bot woda Cela.” Pe bene omedo ki bedo kwede.

²⁷ Ka kare me gonnyene oromo, ci onen ni litino rudi tye i iye.

²⁸ Ka mwoc doŋ ogoye, latin ocwalo ciŋe woko, ci lacolo otweyo uci makwar i ciŋe, kun wacci, “Man aye okwoŋo katti woko.”

²⁹ Ka doŋ oŋunyo ciŋe, odwoko cen, nen, ominne aye dok okatti woko, ci dako-nu owacci, “In doŋ ituro ki baro dye ic, ikatti woko niŋniŋ?” Mumiyo gicako nyiŋe Perej.

³⁰ Ka lacen ominne dok ginywalo kun uci makwar-tye i ciŋe; ci gicako nyiŋe jera.