Acakki 2 - Acoli Baibul

¹ Polo ki lobo yam giketo otum kit meno, ki lwak mony ma tye iye ducu.

² I kom nino me abiro en aye Lubaŋa otyeko iye ticce ducu ma yam otiyo; en oywe i kom nino me abiro i kom ticce ducu ma yam otiyo.

³ Ci Lubaŋa omiyo gum i kom nino me abiro, olonyo obedo maleŋ, pien i kom nino meno en aye Lubaŋa yam oywe iye i kom ticce ducu ma en obedo ka tiyo me keto lobo.

⁴ Man aye acakki nya pa kwa gin ma i polo ki i lobo i kare ma giketogi kwede. I nino meno ma Rwot Lubaŋa otiyo iye polo ki lobo-ni,

⁵ yat mo me tim onoŋo peya tye i wi lobo, onoŋo doo mo pud pe ma otwi wi lobo, onoŋo Rwot Lubaŋa peya omiyo kot ocwer i lobo, dok onoŋo peya tye dano mo ma puro lobo;

⁶ ento lupu ocako duny malo, ci obido lobo ducu.

⁷ Ci Rwot Lubaŋa ocweyo dano ki apwa me ŋom, okuto yamo me yweyo i ume, dano odoko gin makwo.

Poto Eden

⁸ Rwot Lubaŋa opito yadi i poto ma tye i Eden, tuŋ wokceŋ: en aye oketo iye dano ma en ocweyo-ni.

⁹ Dok Rwot Lubaŋa omiyo yadi gutwi i ŋom, kwa yadi ducu mamwonya ma neno ber, ki mabeco me acama, dok oketo yat me kwo i dye poto bene, ki yat me ŋeyo gin maber ki marac.

¹⁰ Kulu yam onoŋo mol a ki i Eden, ma kelo pii i poto, iye opokke ki kunnu, odoko kulu aŋwen.

¹¹ Nyiŋ kulu mukwoŋone Picon; en aye kulu ma mol rumo lobo Kavila ducu, ma a iye jabu.

¹² Jabu ma tye i lobo meno beco; odok yat ma gilwoŋo bedola ki got onik tye kunnu bene.

¹³ Nyiŋ kulu me aryone Gikon, ma orumo lobo ducu me Kuc.

¹⁴ Ki nyiŋ kulu me Taigric; mol dok tuŋ wokceŋ me Aciria. Ki kulu me aŋwenne Euprate.

¹⁵ Rwot Lubaŋa otero dano, oketo i poto Eden wek opur, dok ogwok bene,

¹⁶ ci Rwot Lubaŋa ociko dano ni, “Yadi ducu ma tye i poto, camgi macalo imito;

¹⁷ ento yat me ŋeyo gin maber ki marac pe icam, pien i nino ma ibicamo iye, en aye ibito iye bene.”

¹⁸ Ka doko Rwot Lubaŋa owaco ni, “Pe ber dano obed kene; abitimo lakony ma romme.”

¹⁹ Ci Rwot Lubaŋa ocweyo lee tim ducu ki winyo ducu me polo, nia ki i ŋom, okelogi bot dano me neno kit ma ebicako ki nyiŋgi. Kit ma yam dano ocako ki nyiŋ gin makwo acel acel ducu, en aye obedo nyiŋgi.

²⁰ Dano ocako nyiŋ lee ma paco ducu, ki winyo me polo, ki lee tim ducu; ento lakony pa dano ma romme aye onoŋo pud pe onen.

²¹ Rwot Lubaŋa omiyo nino madwoŋ omako waŋ dano; ka en tye ka nino, ci okwanyo cogo lakŋete acel, omwono waŋe woko ki riŋo,

²² Ci cogo ma Rwot Lubaŋa okwanyoni ocweyo odoko dako, ka okelo bote.

²³ Dano owacci, “Man aye cogo mua i cogona kikome, ki riŋo bene mua i riŋona kikome; gibilwoŋo nyiŋe ni Dako, pien gikwanyo ki i kom Laco.”

²⁴ Mumiyo laco weko wonne ki minne, moko kom dakone likaŋ, gin aryo gidoko kom acel.

²⁵ I kare meno laco ki dakone onoŋo pud gibedo munero ma lewic pe makogi.