Acakki 16 - Acoli Baibul

Agar ki Icmael

¹ Carai dako pa Abram pe omedo ki nywalle latin mo, dok en onoŋo tye ki aŋecane ma anyira Ejipt ma nyiŋe Agar.

² Carai owaco ki Abram ni, “Nen, macalo Rwot ogeŋa nywalo latin mo-ni, cit idony i wi aŋecana, wek gwok nyo abinoŋo iye latin mo ma en binywalo.” Ci Abram owinyo dog Carai.

³ Kit meno, i kare ma Abram otyeko bedo i lobo Kanaan mwaka apar, Carai dako pa Abram otero Agar anyira Ejipt ma aŋecane, omiye bot cware Abram wek obed dakone.

⁴ Ocako bedo ki Agar, ci Agar ogamo ic. Ka Agar oneno ni doŋ egamo ic, ocako gayo Carai ki waŋ me cac.

⁵ Carai owaco ki Abram ni, “Kipwola mupoto i koma odok meri! Amiyo aŋecana i kori; ka en oneno ni doŋ egamo ic, ci ocako gayo an ki waŋ me cac. Myero Rwot doŋ oŋol kop mapol i kin in ki an!”

⁶ Ento Abram ogamo dog Carai ni, “Nen, aŋecani tye Dok i tweroni giri, in itim giri kit ma imito i kome.” Omiyo Carai ocako timme aromaroma, nio ka olwi, oriŋo woko ki bote.

⁷ Lamalaika pa Rwot onoŋe i waŋ it mo ma i dye tim; it meno tye i yo ma cito Cur.

⁸ Obino openye ni, “Agar, aŋeca pa Carai, in mono ia ki kwene kaa, dok icito wa kwene kaa?” En ogamo ni, “An alwi ariŋo Carai, min ot ma abedo i ode.”

⁹ Lamalaika ogamo ni, “Dok cen bot min ot meno, ci iwore.”

¹⁰ Lamalaika pa Rwot dok omedo lok ni, “An abimiyo likwayi nya mapol twatwal, ma ŋatti mo pe romo kwano welgi pi polgi.”

¹¹ Dok lamalaika pa Rwot omedde ka wacce ni, “Nen, igamo ic, ibinywalo latin laco, dok ibicako nyiŋe Icmael; pien Rwot obedo ka neno aromani,

¹² En bibedo dano ma cal ki kana me tim, en bitugge i kom dano ducu, ki dano ducu bene bitugge i kome; en bibedo i kabedone pat kun pyem ki utmegine ducu.”

¹³ Ci Agar ocako nyiŋ Rwot ma oloko kwede ni, “In Lubaŋa ma neno.” Onoŋo en owacci, “An atyeko neno Lubaŋa ada, aneno en ci pud atye makwo gira?”

¹⁴ Mumiyo nyiŋ waŋ it meno gicako ni, Beer-lakai-roi; ma tye i kin Kadec ki Bered.

¹⁵ Agar onywalo ki Abram latin laco; Abram ocako nyiŋ latinne ma Agar onywalo ni Icmael.

¹⁶ Abram onoŋo tye ki mwaka me ditte pyeraboro wiye abicel i kare ma Agar onywalo Icmael.